^{އެކްސިޑެންޓުގައި ހިމެނޭ ލޯންޗު.}

ޅ. މަޑިވަރު އެއާޕޯޓާއި ދިމާ ބޭރު ކަނޑުމަތިން ލޯންޗަކާއި ޑިންގީއެއް ޖެހި ނުރައްކާތެރި އެކްސިޑެންޓެއް ހިނގައި 3 މީހަކަށް ފަރުވާދޭން ފަށައިފި އެވެ.

މިރޭ 20:26 ހާއިރު ހިނގި މި ހާދިސާގައި ހިމެނޭ ޑިންގީ އެކްސިޑެންޓަށް ފަހު ވަނީ ގެއްލިފައެވެ. ފުލުހުން މަޢުލޫމާތު ދޭ ގޮތުގައި އެ ޑިންގީ ވަނީ އަޑިއަށް ގޮސްފައި ކަމަށް ބެލެވެއެވެ.

އެ އެކްސިޑެންޓުގައި އަނިޔާ ލިބިފައިވަނީ ޑިންގީގައި ތިބި 3 މީހުންނަށެވެ. އެ މީހުންނަށް ލިބުނީ ކިހާ ވަރެއްގެ އަނިޔާއެއްކަން ސާފު ނުވެއެވެ. މިވަޤުތު އެ 3 މީހުންނަށް ވެސް ދަނީ ޅ. އަތޮޅު ހޮސްޕިޓަލުގައި ފަރުވާ ދެމުންނެވެ.