އޭޝިއާ ޕާލަމެންޓޭރިއަނުންގެ އާބާދީ އާއި ތަރައްގީއާ ބެހޭ ފޯރަމްގެ ޒުވާނުން ބިނާކުރުމާ ބެހޭ ހިންގާ ކޮމިޓީގެ ސަރަހައްދީ ބައްދަލުވުމުގެ ޖަލްސާ ރާއްޖޭގައި މިއަދު އިފްތިތާހުކޮށްފި އެވެ.
ރައްޔިތުންގެ މަޖިލީހުން ބުނީ އެ ޖަލްސާ އިފްތިތާހުކޮށްދެއްވީ މަޖިލީހުގެ ނައިބު ރައީސް އަހްމަދު ނާޒިމް ކަމަށެވެ.
ދެކުނު އޭޝިއާ ސަރަހައްދުގައި އަންހެނުން ބާރުވެރިކޮށް، ޒުވާނުން ކުރިމަގަށް ތައްޔާރު ކުރުމާބެހޭ މައުޟޫއަށް ރާއްޖޭގައި ބާއްވާ ދެ ދުވަހުގެ އެ ބައްދަލުވުން އިފްތިތާހުކޮށްދެއްވައި، ނާޒިމް ވިދާޅުވީ އާބާދީއަށް އަންނަ ހަލުވި ބަދަލުތަކާ ކުރިމަތިލުމަށާއި އަންހެނުންނާއި ޒުވާނުން ބާރުވެރިކުރުވުމަށްޓަކާ ވަށާޖެހޭ ސިޔާސަތުތަކެއް އެކުލަވާލަން ޖެހޭ ކަމަށެވެ.
Advertisement
ނާޒިމް ވަނީ 2014 ވަނަ އަހަރުގެ ބޯހިމެނުމާ ހަވާލާދެއްވަމުން ރާއްޖޭގެ އާބާދީ ތަރައްގީވަމުން އަންނަ ގޮތުގެ ތަސައްވަރެއް ހުށަހަޅުއްވައިދެއްވައިފަ އެވެ.
ރާއްޖޭގެ އާބާދީ، 2054 ވަނަ އަހަރުގެ ނިޔަލަށް އެއް މިލިއަނާ ގާތްކުރާނެ ކަމަށް ލަފާކުރެވޭއިރު، އާބާދީގެ ގިނަ އަދަދެއްގެ މީހުން ދިރިއުޅޭނީ މާލެ ސަރަހައްދުގަ އެވެ. އަދި، އާބާދީގެ ދުޅަހެޔޮކަން ދެމެހެއްޓުމަށް ހަރުދަނާ ސިއްހީ ފަރުވާ އާއި ނަފްސާނީ ސިއްހަތަށް ސަމާލުކަންދިނުމާއި، މިންތީގެ ހަމަހަމަކަމާ ގުޅޭ ސިޔާސަތުތަކެއް އެކަށައެޅުން މުހިންމު ކަމަށް ނާޒިމް ވިދާޅުވި އެވެ.
"ރާއްޖޭގެ އިންސާނީ ރައުސްމާލަށް ރާއްޖޭގެ ތަރައްގީ ދެމެހެއްޓޭނެ. އެކަން ދެމެހެއްޓެނެވި ގޮތެއްގައި ކުރިއަށް ގެންދިއުމަށް އިންސާނީ ރައުސުމާލަށް އިންވެސްޓްކުރަން ޖެހޭ. ޒުވާނުން، ވަކިން ހާއްސަކޮށް ޒުވާން އަންހެނުންނަށް ތައުލީމާއި ހުނަރާއި ލީޑާޝިޕްގެ ދައުރު ފަހިކޮށްދޭން ޖެހޭ،" އޭނާ ވިދާޅުވި އެވެ.
ނާޒިމް ވިދާޅުވީ މުޖުތަމައުގެ ދުޅަހެޔޮ ކަމަށް ރައީސް ޑރ. މުހައްމަދު މުއިއްޒުގެ ސަރުކާރުން ކުރިއަށް ގެންދާ "ހެޕިނެސް މޯލްޑިވްސް ޕްރޮގްރާމް"ގެ ދަށުން ގައުމީ ހެޕިނެސް އިންޑެކްސްއެއް ކަނޑައެޅުމަކީ މި ސަރުކާރުން އިޖުތިމާއީ ދުޅަހެޔޮކަން ބައްޓަންކުރުމަށް އިސްކަންދޭ ކަމުގެ ހެއްކެއް ކަމަށެވެ.
