ރައްޔިތުންގެ މަޖިލީހުގެ ނައިބު ރައީސް، ދިއްގަރު ދާއިރާގެ މެންބަރު އަޙްމަދު ނާޒިމް އެ މަޤާމުން ވަކިކުރުމުގެ މައްސަލަ މާދަމާ ހެނދުނު 9:00 އަށް އެޖެންޑާ ކޮށްފިއެވެ. އެޖެންޑާގައި މާދަމާ އޮތީ އެ މައްސަލަ އެކަންޏެވެ.

ނާޒިމުގެ މައްޗަށް އިތުބާރު ނެތް ކަމަށް ނިންމައި، އޭނާ މަގާމުން ވަކިކުރުމަށް 73 މެންބަރުންގެ ސޮޔާއެކު މަޖިލީހަށް ހުށަހެޅީ މޭ މަހުގެ 14 ވަނަ ދުވަހުއެވެ. މަޖިލީހުގެ ޤަވާއިދު ބުނާގޮތުން މަޖިލީހުގެ ރައީސް ނުވަތަ ނައިބުރައީސް ވަކިކުރުމުގެ ނޯޓިސް ފޮނުވާތާ 14 ދުވަސް ހަމަވުމަށްފަހު ފުރަތަމަ އަންނަ ރަސްމީ ދުވަހެއްގައި އެ މައްސަލައާމެދު ގޮތެއް ނިންމަން ޖަލްސާއެއް ބާއްވަން ޖެހެއެވެ. ޕީޕަލްސް ނެޝަނަލް ކޮންގްރެސް (ޕީއެންސީ) ގެ ޕާލަމެންޓްރީ ގުރޫޕުގެ ވަޓްސްއެޕް ގުރޫޕުން މި މަހުގެ 13 ވަނަ ދުވަހު އޭނާ ވަނީ ބޭރުކޮށްލާފައެވެ. ޕީއެންސީގެ ގިނަ މެންބަރުންގެ މެދުގައި ނާޒިމަށް އޮތް އިތުބާރު ގެއްލިފައިވާއިރު، މީގެ ކުރިން އޭނާ އިންނެވި މާލިއްޔަތު ކޮމިޓީއާއި 241 ކޮމިޓީން ވެސް ވަނީ ވަކިކޮށްފައެވެ. ނާޒިމް މިހާރު އިންނަވަނީ އެންވަޔަރްމެންޓް ކޮމިޓީގައެވެ.

މަޖިލީހުގެ ޤަވާއިދުގައިވާ ގޮތުން ނައިބުރައީސް މަގާމުން ވަކިކުރުމަށް ބޭނުންވަނީ އެ ޖަލްސާގައި ބައިވެރިވެ ވޯޓުދޭ މެންބަރުންގެ އަޣުލަބިއްޔަތެވެ

މާދަމާ ބާއްވާ މަޖިލީހުގެ ޖަލްސާއަކީ މި ދައުރުގެ އެންމެ ފަހު ޖަލްސާއެވެ.