ރައްޔިތުންގެ މަޖިލީހުގެ ނައިބު ރައީސްގެ މަގާމުން ދިއްގަރު ދާއިރާގެ މެންބަރު އަހުމަދު ނާޒިމް މިއަދު އިސްތިއުފާ ދެއްވައިފިއެވެ. ނާޒިމް އިސްތިއުފާ ދެއްވާފައިވަނީ އޭނާ މަގާމުން ވަކިކުރުމުގެ މައްސަލަ މިއަދުގެ ޖަލްސާއަށް އެޖެންޑާކޮށްފައި ވަނިކޮށެވެ.

މަޖިލީހުގެ ނައިބު ރައީސްކަމުން ނާޒިމް ވަކިކުރުމުގެ މައްސަލަ މިއަދު ހެނދުނު 9:00 އަށް ތާވަލުކުރި ނަމަވެސް، ޖަލްސާ ފެށުމުގެ ކުޑަވަގުތުކޮޅެއް ކުރިން އޭނާ ވަނީ އިސްތިއުފާ ދެއްވިކަން އެކްސް މެދުވެރިކޮށް އާންމުކުރައްވާފައެވެ. ނާޒިމް ނެރުއްވި ބަޔާނުގައި ވިދާޅުވީ އޭނާގެ މައްޗަށް ކޮށްފައިވާ ތުހުމަތުތަކަކީ އެއްވެސް އަސާސެއް ނެތް ދޮގު ތުހުމަތުތަކެއް ކަމަށެވެ.

ވެރިކަން ކުރާ ޕީއެންސީގެ މެންބަރުން ހުށަހެޅި އިތުބާރު ނެތްކަމުގެ ގަރާރުގައި ނާޒިމްގެ މައްޗަށް ތުހުމަތުކޮށްފައިވަނީ މަގާމުގެ ނުފޫޒު ބޭނުންކޮށްގެން ނާޖާއިޒު ފައިދާ ނެގުމާއި، މަޖިލީހުގެ ތެރޭގައި ފިތުނަ އުފައްދައި މަސްލަހަތު ގެއްލުވާލަން މަސައްކަތް ކުރެއްވި ކަމަށެވެ. ނަމަވެސް ނާޒިމް ވިދާޅުވީ އޭނާ މަސްއޫލިއްޔަތު އަދާކުރެއްވީ ގާނޫނީ ހަމަތަކުގެ މަތިން ތެދުވެރިކަމާއެކު ކަމަށެވެ.

ނާޒިމް އިސްތިއުފާ ދެއްވުމާ ގުޅިގެން، މަޖިލީހުގެ ރައީސް އަބްދުއްރަހީމް އަބްދުﷲ ވަނީ މިއަދުގެ ޖަލްސާ ނިންމަވާލައްވާފައެވެ. އަދި އާ ނައިބު ރައީސަކު އިންތިހާބު ކުރުމަށްޓަކައި މިއަދު މެންދުރުފަހު 1:00 އަށް ޖަލްސާއެއް ތާވަލުކުރި ނަމަވެސް، ފަހުން އެ ޖަލްސާ ވަނީ މާދަމާ ބާއްވާ ގޮތަށް ފަސްކޮށްފައެވެ.

މަޖިލީހުގެ މީޑިއާ އޮފިޝަލް މައުލޫމާތު ދެއްވި ގޮތުގައި، އާ ނައިބު ރައީސަކު ހޮވުމުގެ މަސައްކަތް މާދަމާގެ ޖަލްސާގައި ކުރިއަށްދާނެއެވެ. ނާޒިމް ވިދާޅުވީ މަގާމުން އިސްތިއުފާ ދެއްވީ ވެރިކަން ކުރާ ޕާޓީގެ ހުރިހާ މެންބަރުން އޭނާ ވަކިކުރަން އެދުމުން، އެކަމަށް އިޖާބަ ދިނުމަކީ ޑިމޮކްރަސީގެ ހަމަތަކުން އެންމެ ތަހުޒީބީ ގޮތް ކަމަށް ދެކޭތީ ކަމަށެވެ.