ރައީސުލްޖުމްހޫރިއްޔާ ޑރ. މުޙައްމަދު މުއިއްޒާއި ސަރުކާރާ ދެކޮޅަށް މަސައްކަތް ކުރައްވާ ކަމުގެ ތުހުމަތުގައި، ރައްޔިތުންގެ މަޖިލީހުގެ ނައިބު ރައީސް އަހްމަދު ނާޒިމް އެ މަގާމުން ވަކިކުރުމުގެ މައްސަލަ މާދަމާ އޮންނަ މަޖިލީހުގެ ޖަލްސާއަށް ހުށަހެޅުމަށް ނިންމައިފި އެވެ.
މި މައްސަލަ ކުރިއަށް ގެންދިއުމަށް ނިންމާފައިވަނީ މަޖިލީހުގެ ސުޕަ މެޖޯރިޓީ އޮތް ޕީއެންސީގެ ޕާލަމަންޓްރީ ގްރޫޕުން މިއަދު ބޭއްވި ބައްދަލުވުމެއްގަ އެވެ. މި ބައްދަލުވުމުގައި މަޖިލީހުގެ ނައިބު ރައީސް ކަމުން ނާޒިމް ވަކިކުރުމަށް ވަނީ ފާސްކޮށްފަ އެވެ. ނަމަވެސް، މި ބައްދަލުވުމުގައި ނާޒިމް ބައިވެރިވެވަޑައިގެންފައެއް ނުވެ އެވެ.
ޕީއެންސީގެ ޕާލަމަންޓްރީ ގްރޫޕުން މިގޮތަށް ފާސްކުރުމާ ގުޅިގެން، ނާޒިމް ވަކިކުރުމުގެ މައްސަލަ ހުށަހެޅުމަށް ބޭނުންވާ ސޮއި ހޯދުމުގެ މަސައްކަތް ވަނީ ވަގުތުން ފަށާފައެވެ. އެގޮތުން، ބައްދަލުވުން ނިމުނުތާ ކުޑައިރުކޮޅެއްގެ ތެރޭގައި ޕީއެންސީގެ 40 އަށް ވުރެ ގިނަ މެންބަރުން ވަނީ މި ގަރާރުގައި ސޮއިކުރައްވާފަ އެވެ.
ރައްޔިތުންގެ މަޖިލީހުގެ ގަވާއިދު ބުނާގޮތުން، މަޖިލީހުގެ ނައިބު ރައީސް މަގާމުން ވަކިކުރެވޭނީ މަދުވެގެން މަޖިލީހުގެ ހަތަރުބައިކުޅަ އެއްބައި މެންބަރުންގެ ސޮޔާއެކު ހުށަހަޅާ ގަރާރަކުންނެވެ. އެއީ މަދުވެގެން 24 މެންބަރުންގެ ސޮޔެވެ. އަދި ނައިބު ރައީސް މަގާމުން ވަކިކުރެވޭނީ ޖަލްސާއަށް ހާޒިރުވެވަޑައިގަންނަވާ މެންބަރުންގެ އައުލަބިއްޔަތުންނެވެ. މަޖިލީހުގައި ތިއްބަވާ 93 މެންބަރުންގެ ތެރެއިން 74 މެންބަރުންނަކީ ޕީއެންސީއަށް ނިސްބަތްވާ މެންބަރުންނެވެ.
މައުލޫމާތު ލިބިފައިވާ ގޮތުގައި، މި މައްސަލަ މާދަމާގެ ޖަލްސާއަށް ހުށަހެޅުމަށް މިހާރު ވަނީ ތާވަލުކޮށްފަ އެވެ. މަޖިލީހުގެ ރައީސް ޢަބްދުއްރަހީމް އަބްދުﷲ މިވަގުތު ރާއްޖެއިން ބޭރުގައި ހުންނެވި ނަމަވެސް، އެމަނިކުފާނު މާދަމާ ރާއްޖެ ވަޑައިގަންނަވާނެ އެވެ. ޖަލްސާ ބާއްވާނެ ސީދާ ގަޑިއެއް އަދި ކަށަވަރު ނުވި ނަމަވެސް، މާދަމާ މެންދުރުފަހު ނުވަތަ ރޭގަނޑު ޖަލްސާއެއް ބާއްވައިގެން މި މައްސަލަ ކުރިއަށް ގެންދިއުމަށް ވަނީ ނިންމާފަ އެވެ.
