މިއަހަރުގެ އޭޕްރީލް 18 ވަނަ ދުވަހު ހ. މިޓާޒްގެ ފުރާޅުމަތީގައި ޙައްވާ ޔުމްނު ރަޝީދު ވެއްޓިފައި އޮތް ހާދިސާ ތަޙްޤީޤްކުރުމަށް އުފެއްދެވި ރިޔާސީ ކޮމިޝަންގެ ރިޕޯޓުގައި ދިވެހި ފުލުހުންގެ ޚިދުމަތުން ޢަމަލުކޮށްފައިވާ ގޮތުގެ ފަރުވާކުޑަކަން ފާހަގަކުރައްވައި، އެފަދަ ކަންކަން ތަކުރާރުވިޔަ ނުދިނުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ހަރުކަށި އަމުރުފުޅެއް ނެރުއްވައިފިއެވެ. އެމަނިކުފާނު މި އަމުރުފުޅު ނެރުއްވީ ދާޚިލީ ސަލާމަތާއި ފަންނިއްޔާތާއި ބެހޭ ވުޒާރާއަށެވެ.

ރިޔާސީ ކޮމިޝަންގެ ރިޕޯޓުގައި ފާހަގަކުރެވިފައިވާ ގޮތުގައި، ޙާދިސާގެ މަޢުލޫމާތު ލިބުނުތާ ގަޑިއެއްހާއިރު ފަހުން މެނުވީ ފުލުހުންގެ ކޮމާންޑް ސެންޓަރުން އިންވެސްޓިގޭޝަން އޮފިސަރަށް މަޢުލޫމާތު ދީފައެއްނުވެއެވެ. މިކަމުގެ ސަބަބުން، ކުށުގެ ވެށިން ތަޙްޤީޤަށް ބޭނުންވާނެ ހެކިތައް ނެގި ނިމުނު ފަހުން މެނުވީ އިންވެސްޓިގޭޝަން އޮފިސަރަށް ހާދިސާ ހިނގި ސަރަޙައްދަށް ދެވިފައެއްނުވެއެވެ. އަދި ކްރައިމް ސީން ޕްރޮސެސްކޮށް ނިމުނުއިރުވެސް ތަޙްޤީޤުކުރާ އޮފިސަރަކު ސީންއަށް ހާޒިރުވެފައި ނެތުމުގެ ސަބަބުން، ތަޙްޤީޤަށް ބޭނުންވާ ފުރިހަމަ މަޢުލޫމާތާއި ހެކިތައް އެވަގުތު ހޯދިފައިނުވާކަން ރިޕޯޓުން ހާމަވެއެވެ.

އަދި ކުށުގެ ވެއްޓަށް ދިޔަ ސީން އޮފް ކްރައިމް އޮފިސަރު، ކްރައިމް ސީން ޕްރޮސެސްކުރިއިރު، ހުރިހާ ސަރަޙައްދެއް އެކަށީގެންވާ ގޮތެއްގައި ޕްރޮސެސްކޮށްފައި ނުވާކަމަށާއި، ޙައްވާ ޔުމްނު އޮތް ހ. މިޓާޒްގެ ފުރާޅުމަތިން އެއްވެސް ހެއްކެއް ލިބޭތޯ މަސައްކަތެއް ކުރެވިފައިނުވާކަން ވެސް ރިޕޯޓުގައި ފާހަގަކުރެވިފައިވެއެވެ. މީގެ އިތުރުން، ކުށުގެ ވެށީގެ ބައުންޑްރީއެއް ކަނޑައެޅިފައި ނެތްކަމާއި، ކުށުގެ ވެށި ރައްކާތެރިކުރެވިފައި ނެތްކަން ވެސް ރިޕޯޓުން ހާމަވެއެވެ.

މިކަންކަން ތަކުރާރުވިޔަ ނުދިނުމަށް، ފުލުހުންގެ އެސް.އޯ.ޕީތައް ރިވައިސްކޮށް، މުވައްޒަފުން އަހުލުވެރިކޮށް ތަމްރީނު ދިނުމަށާއި، މި ހާދިސާގައި ފަރުވާކުޑަކުރި މުވައްޒަފުންގެ މައްސަލަ ބަލައި، އެ މުވައްޒަފުންނާމެދުގައި އިޞްލާޙީ ފިޔަވަޅު އެޅުމަށް ރައީސުލްޖުމްހޫރިއްޔާ ވަނީ އަންގަވާފައެވެ.