ޤައުމުތަކުގެ ޚާރިޖީ ސިޔާސަތުތައް ބައްޓަންކުރުމުގައާއި ބައިނަލްއަޤްވާމީ ހަމަޖެހުމާއި ތަރައްގީގައި އަންހެނުން އަދާކުރަނީ މުހިންމު ދައުރެއް ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ. އެމަނިކުފާނު މިހެން ވިދާޅުވީ ބައިނަލްއަޤްވާމީ ގޮތުން ފާހަގަކުރާ "ވިމެން އިން ޑިޕްލޮމަސީ" ދުވަހާ ގުޅުވައިގެން ސޯޝަލް މީޑިއާގައި ހިއްސާ ކުރެއްވި ޕޯސްޓެއްގައެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ، އދ.ން ފެށި މި ހަރަކާތުގެ މައި ހިއްސާދާރެއްގެ ގޮތުގައި ދިވެހިރާއްޖޭން މި ދުވަސް ފާހަގަކުރަނީ ފަޚުރުވެރިކަމާއެކު ކަމުގައި ވިދާޅުވެފައެވެ. އެމަނިކުފާނު އިތުރަށް ވިދާޅުވީ، ގޮތް ނިންމާ ފެންވަރުގެ މަޤާމުތަކުގައި އަންހެނުންގެ ދައުރު ފުޅާކުރުމާއި އަންހެނުންނާއި އަންހެން ކުދިން ތަމްސީލްކުރާ، އެމީހުންގެ އަޑުއަހާ، އަދި އިހުތިރާމްކުރާ މުސްތަގުބަލެއް ބިނާކުރުމުގައި ރާއްޖޭން އަބަދުވެސް ދެމި އޮންނާނެ ކަމަށެވެ.

ކޮންމެ އަހަރެއްގެ ޖޫން މަހުގެ 24 ވަނަ ދުވަހަކީ "ވިމެން އިން ޑިޕްލޮމަސީ" ނުވަތަ ޚާރިޖީ ދާއިރާގައި މަސައްކަތް ކުރާ އަންހެނުންގެ ދުވަހުގެ ގޮތުގައި ބައިނަލްއަޤްވާމީ ގޮތުން ފާހަގަކުރާ ދުވަހެކެވެ. މި ދުވަސް ފާހަގަކުރަން ފެށީ އދ. ގެ އާންމު މަޖިލީހުގެ 76 ވަނަ ސެޝަންގައި ނިންމި ނިންމުމަކާއި ގުޅިގެންނެވެ. މި ދުވަހުގެ މައިގަނޑު މަޤްޞަދަކީ ޚާރިޖީ ދާއިރާގައި މިންތީގެ ހަމަހަމަކަން ކަށަވަރުކުރުމާއެކު ޤައުމުތަކުގެ ތަރައްގީގައި އަންހެނުން އަދާކުރާ ދައުރު ފާހަގަކުރުމެވެ.