މަތީ ތަޢުލީމާއި އިޤުތިޞާދީ ގޮތުންނާއި، ސިއްޙީ ދާއިރާއިން އިތުރަށް ގުޅުން ބަދަހިކުރުމަށް މިޞްރުގެ ސަރުކާރާއެކު ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިއަދު މަޝްވަރާ ކުރައްވައިފިއެވެ. މި މަޝްވަރާތައް އޮތީ މިޞްރު ސަރުކާރުން ދިވެހިރާއްޖެއަށް ކަނޑައެޅުއްވި އައު ނޮން-ރެޒިޑެންޓް ސަފީރު، ހިޒް އެކްސަލަންސީ އާދިލް އިބްރާހީމް، އެމަނިކުފާނުގެ ސަފީރުކަމުގެ ފަތްކޮޅު ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުއަށް މިއަދު ހެނދުނު އަރުވުމަށްފަހު ރައީސުލްޖުމްހޫރިއްޔާގެ އޮފީހުގައެވެ.

މި ރަސްމިއްޔާތަށް ސަފީރު އާދިލް އިބްރާހީމް ވަޑައިގެންނެވީ، ޖުމްހޫރީ މައިދާނުން ފެށިގެން ރައީސުލްޖުމްހޫރިއްޔާގެ އޮފީހާ ހަމައަށް ހަތްކޮޅުގައި ރަސްމީ އިއްޒަތުގައި، ބެރު ދުންމާރި ތާޅަފިލީގައި، ހެވިކަމުގެ ލަޝްކަރީންނާއެކު ހިންގަވާފައެވެ. މި ރަސްމިއްޔާތަކީ ދެޤައުމުގެ ދެމެދުގައިވާ ގުޅުން ރަސްމީކޮށް އައު ކުރައްވާ، އެ ގުޅުން އިތުރަށް ބަދަހިކުރެއްވުމުގެ ގޮތުން ބޭއްވުނު ރަސްމިއްޔާތެކެވެ.

މިޞްރުގެ އައު ސަފީރު، އެމަނިކުފާނުގެ ސަފީރުކަމުގެ ފަތްކޮޅު ރައީސުލްޖުމްހޫރިއްޔާއަށް އެރުވުމުން، ރައީސުލްޖުމްހޫރިއްޔާ ވަނީ އައު ސަފީރަށް ތަހުނިޔާ ވިދާޅުވެ، ދިވެހިރާއްޖެއަށް ވަޑައިގެންނެވިކަމަށްޓަކައި ހޫނު މަރުޙަބާއެއް ވިދާޅުވެފައެވެ.

ތަޢުލީމާއި ޞިއްޙަތާއި އިޤްތިޞާދީ ދާއިރާއިން ދެޤައުމުގެ ގުޅުން ބަދަހިކުރުމަކީ ދެޤައުމަށް ވެސް ފައިދާކުރާނެ ކަމެއްކަން ދެ ބޭފުޅުން ފާހަގަކުރެއްވިއެވެ.

ދިވެހިރާއްޖެއާ މިޞްރާ ދެމެދު ސިޔާސީ ގުޅުން ގާއިމުކުރީ 1969 ވަނަ އަހަރުގެ ފެބުރުވަރީ މަހުގެ 12 ވަނަ ދުވަހުގައެވެ. މިގުޅުން މިހާރު 50 އަހަރަށްވުރެ ގިނަ ދުވަސްވެފައިވާއިރު، މިޞްރަކީ އިސްލާމީ އުއްމަތުގެ މުހިންމު ޤައުމެކެވެ. ދެ ޤައުމުގެ ގުޅުމަކީ ދިގު ތާރީޚެއް ދައްކުވައިދޭ ގުޅުމެކެވެ.