ޕައިލެޓުންނަށް މިވަގުތު ވަޒީފާގެ ފުރުސަތު ނެތުމާއި އިތުރަށް ފުރުސަތުތައް ހުޅުވެމުންނުދާތީ، ޕައިލެޓުކަން ކިޔެވުމަށް ލޯނުގެ ފުރުސަތު ހުޅުވާނުލާނެ ކަމަށް ޓްރާންސްޕޯޓް މިނިސްޓަރު މުޙައްމަދު އަމީން ވިދާޅުވެއްޖެއެވެ. މިނިސްޓަރު މިހެން ވިދާޅުވީ ދިވެހިރާއްޖޭގެ އަޑުގެ ”އަހާށޭ ބުނާނަން“ ޕްރޮގްރާމުގައި، ޕައިލެޓުކަން ކިޔަވައިގެން ވަޒީފާ ނުލިބޭ މައްސަލަ ހައްލުކުރަން ސަރުކާރުން ކުރަނީ ކޮންކަމެއްތޯއާއި ޕައިލެޓުކަން ކިޔަވަން ލޯނަށް ހުޅުވާލާނެތޯ ދެންނެވި ސުވާލަކަށް ޖަވާބުދެއްވަމުންނެވެ.
މިނިސްޓަރު އަމީން ވިދާޅުވި ގޮތުގައި، ކެޑޭޓް ޕައިލެޓުން ލައިގެން ރާއްޖޭގައި އެއްވެސް އެއަރލައިނެއް އޮޕަރޭޓު ނުކުރެވޭނެއެވެ. އަދި އެހެން ޤައުމުތަކުގައިވެސް މަސައްކަތްކުރުމުގެ ފުރުސަތު ލިބެނީ ތަޖުރިބާހުރި ޕައިލެޓުންނަށް ކަމަށް އެމަނިކުފާނު ފާހަގަކުރެއްވިއެވެ.
ޕައިލެޓުންނަށް ވަޒީފާ ނުލިބުމުގެ މައްސަލަ ހައްލުކުރުމަށްޓަކައި، މިހާރު އޮންނަ މިންގަނޑަށްވުރެ އިތުރަށް ވަޒީފާ ދޭން އެއަރލައިން އޮޕަރޭޓަރުންނަށް އަންގާފައިވާނެ ކަމަށްވެސް މިނިސްޓަރު ވިދާޅުވިއެވެ.
އެމަނިކުފާނު އިތުރަށް ވިދާޅުވީ، މިހާރުވެސް ޤައުމަށް ބޭނުންވާ ވަރަށްވުރެ އިތުރަށް ޕައިލެޓުކަން ކިޔަވަން ފުރުސަތު ދެވިފައިވާ ކަމަށެވެ. އެހެންކަމުން މި ދާއިރާއިން ކިޔެވުމަށް ލޯނު ނުދޭނެ ކަމަށް އެމަނިކުފާނު ހާމަކުރެއްވިއެވެ.
މިނިސްޓަރު އަމީން ވިދާޅުވި ގޮތުގައި، މި ދާއިރާއިން ކިޔެވުމަށް ލޯނު ހަމަޖެހި، ނަމަވެސް ކިޔަވަން ނުގޮސް ތިބި ދަރިވަރުންނާއި ބެލެނިވެރިންނާ ވާހަކަދައްކައިގެން ކޯސް ބަދަލުކުރުމުގެ ފުރުސަތު ހުޅުވައިލުމުން ބައެއް ކުދިން ކޯސް ބަދަލުކޮށްފައިވެސް ވެއެވެ.
ކަން މިހެން އޮތުމާއެކު، ދެން ލޯނު ދޫކުރާނީ ޤައުމަށް ބޭނުންވާ އެހެން ދާއިރާތަކުން ކިޔެވުމަށް ކަމަށް ޓްރާންސްޕޯޓް މިނިސްޓަރު މުޙައްމަދު އަމީން ވަނީ ވިދާޅުވެފައެވެ.
