އޮފްޝޯ ބުކިން ޕްލެޓްފޯމްތަކާއި ބޭރުގެ ޓުއާ އޮޕަރޭޓަރުންނާއި ޓްރެވަލް އެޖެންޓުން ފޯރުކޮށްދޭ ހިދުމަތްތަކުން ޓީޖީއެސްޓީ ނެގުމަށް ގެނައި އިސްލާހުތަކާ ގުޅިގެން ފަތުރުވެރިކަމުގެ ދާއިރާގެ ކަންބޮޑުވުންތައް ހުރުމުން، 'ޑެސްޓިނޭޝަން ޕްރިންސިޕަލް' ގެ އުސޫލުން ޓީޖީއެސްޓީ ގާނޫނަށް އަވަސް ބަދަލުތަކެއް ގެންނެވުމަށް ސަރުކާރުން ނިންމަވައިފިއެވެ.
މިކަން ހާމަކުރައްވާފައިވަނީ ގައުމީ ފަތުރުވެރިކަމުގެ ދުވަހުގެ ރަސްމިއްޔާތުގައި ވާހަކަފުޅު ދައްކަވަމުން، ޓޫރިޒަމް މިނިސްޓަރު މުހައްމަދު އަމީނެވެ.
މުދަލާއި ހިދުމަތުގެ އަގުން ޓެކްސް ނެގުމުގެ ގާނޫނަށް ގެނައި އިސްލާހު މިދިޔަ އޮގަސްޓް މަހުގެ 31 ވަނަ ދުވަހު ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވަނީ ތަސްދީގު ކުރައްވާފައެވެ. އެ އިސްލާހުގެ ދަށުން، ރާއްޖޭގައި ދާއިމީ ގާއިމުވެ ތިބުމެއް ނެތް ނަމަވެސް، ރާއްޖެއާ ގުޅޭ ފަތުރުވެރިކަމުގެ ހިދުމަތްތައް—އޭގެ ތެރޭގައި އެކޮމޮޑޭޝަނާއި، ކެއިންބުއިމާއި އަދި ދަތުރުފަތުރު ހިމެނޭހެން—ފޯރުކޮށްދޭ ބޭރުގެ ފަރާތްތަކުން ޓެކްސް ދެއްކުން ލާޒިމުކުރެވުނެވެ. މި ބަދަލާއެކު ދައުލަތަށް އަހަރަކު ގާތްގަނޑަކަށް 1.61 ބިލިއަން ރުފިޔާގެ އާމްދަނީއެއް ލިބޭނެ ކަމަށް ކުރިން އޮތީ އަންދާޒާކޮށްފައެވެ.
Advertisement
ނަމަވެސް، ގާނޫނު ތަންފީޒުކުރުމުގެ މުއްދަތުތަކާއި އެހެނިހެން ކަންކަމާ ގުޅިގެން ޓްރެވަލް އެޖެންޓުންނާއި ސިނާޢަތުގެ އިސް ފަރާތްތަކުން ވަނީ ގިނަ ކަންބޮޑުވުންތަކެއް ފާހަގަކޮށް، ރައީސުލްޖުމްހޫރިއްޔާގެ އަރިހަށް އިލްތިމާސްތަކެއް ހުށަހަޅާފައެވެ. މި ކަންބޮޑުވުންތަކަށް ރިއާޔަތްކުރައްވައި، ސިނާޢަތަށް ލުއިފަސޭހަވާނެހެން 'ޑެސްޓިނޭޝަން ޕްރިންސިޕަލް' އުސޫލަށް ބިނާކޮށް ގާނޫނަށް އަވަސް އިސްލާހުތަކެއް ގެނައުމަށް ރައީސުލްޖުމްހޫރިއްޔާ ނިންމަވާފައިވާ ކަމަށް މިނިސްޓަރ އަމީން ވިދާޅުވިއެވެ.
