އިޓަލީގައި މެޗު އޮފިޝަލުންނަށް ހަމަލާދޭ މީހުންނަށް ޖަލު ހުކުމެއް އަންނަ ގޮތަށް އެ ގައުމުގެ ގާނޫނަށް ބަދަލެއް ގެނެސްފިއެވެ.
އިޓަލީން ބުނީ ހުކުރު ދުވަހު މި ބަދަލު ގެނެސްފައިވަނީ މެޗު އޮފިޝަލުންނަށް ދެމުންދާ ހަމަލާތައް އިތުރުވުމާއި ގުޅިގެންނެވެ. މި ބަދަލާއެކު، މެޗު އޮފިޝަލުންނަށް ފުލުހުންނާއި އެހެން ސަރުކާރުގެ އޮފިޝަލުންނަށް ލިބޭ ފަދަ ގާނޫނީ ހިމާޔަތެއް ލިބިގެންދާނެއެވެ.
ގާނޫނަށް ގެނެވުނު މި ބަދަލުގެ ސަބަބުން، މެޗު އޮފިޝަލުންނަށް ކުރިމަތިވާ ބިރުދެއްކުންތަކަށް ވެސް ކުރިން ދިން އަދަބަށްވުރެ މާ ބޮޑެތި އަދަބުތަކެއް ދެވޭނެއެވެ.
އިޓަލީގެ ޖޫނިއަރ ޖަސްޓިސް މިނިސްޓަރ އެންޑްރިއާ އޮސްޓެލާރީ ވިދާޅުވީ، ރެފްރީންނާއި ދެކޮޅަށް ހިންގާ އަނިޔާވެރި އަމަލުތަކާއި ދޭ ހަމަލާތަކަށް ލަސްނުކޮށް އަދަބު ކަނޑައެޅޭނެ ކަމަށެވެ.
މެޗު އޮފިޝަލުންނަށް ދެމުންދާ ހަމަލާތައް އިތުރުވުމާ ގުޅިގެން، އިޓަލީގެ ސަރުކާރުން އިޓާލިއަން ސޮކަރ ރެފްރީސް އެސޯސިއޭޝަން އާ އެކު މިދިޔަ ޑިސެމްބަރު މަހުން ފެށިގެން މަޝްވަރާކޮށްފައިވެއެވެ. އެ މަހު ސެރީ އޭ (Serie A) ގެ ރެފްރީން ވަނީ މެޗުތަކުގައި ކަޅު ކުލައިގެ ނިޝާނެއް ބޭނުންކޮށް، އެމީހުންނަށް ކުރިމަތިވާ ހުތުރު ބަހުގެ ހަމަލާތަކަށް ނުރުހުން ފާޅުކޮށްފައެވެ.
