އެމެރިކާގެ ކަމާބެހޭ އިދާރާތަކުން ގޫގުލްގެ ސޮފްޓްވެއާ އިންޖިނިއަރެއްގެ މައްޗަށް އިންސައިޑާ ޓްރޭޑިންގ ނުވަތަ ކުންފުނީގެ ސިއްރު މައުލޫމާތު ބޭނުންކޮށްގެން ނާޖާއިޒު ފައިދާ ހޯދުމުގެ ދައުވާ އުފުލައިފި އެވެ. މި މައްސަލާގައި ތުހުމަތު ކުރެވެނީ "ޕޮލީމާކެޓް" ކިޔާ ޕްރިޑިކްޝަން މާކެޓް ޕްލެޓްފޯމެއްގައި ބާޖީ ހަދައިގެން 1.2 މިލިއަން ޑޮލަރަށްވުރެ ގިނަ ފައިދާ އޭނާ ހޯދާފައިވާ ކަމަށެވެ.
ސްވިޒަލޭންޑްގައި ދިރިއުޅޭ އިޓަލީގެ ރައްޔިތެއް ކަމަށްވާ އުމުރުން 36 އަހަރުގެ މިޝޭލް ސްޕަގްނުއޯލޯގެ މައްޗަށް ބުދަ ދުވަހު ނިއުޔޯކްގެ ފެޑަރަލް ކޯޓުގައި ވަނީ މަކަރާއި ހީލަތް ހެދުމާއި، މަނީ ލޯންޑަރިންގްގެ ދައުވާ އުފުލާފައެވެ. ދައުވާގައިވާ ގޮތުން އޭނާ ވަނީ ގޫގުލްއިން ކޮންމެ އަހަރަކު ނެރޭ "އިޔަރ އިން ސާޗް" ނުވަތަ އެންމެ ގިނައިން ސާޗްކުރި ތަކެތީގެ ލިސްޓުގެ ސިއްރު މައުލޫމާތު ބޭނުންކޮށްގެން ބާޖީ ހަދާފައެވެ.
ޕްރޮސެކިއުޓަރުން ބުނާ ގޮތުގައި ސްޕަގްނުއޯލޯ ބޭނުންކުރީ "އަލްފާ ރެކޫން" ނަމަކަށް ކިޔާ އެކައުންޓެކެވެ. މި އެކައުންޓް މެދުވެރިކޮށް އޭނާ ވަނީ ގޫގުލްގެ 2025 ވަނަ އަހަރުގެ ސާޗް ނަތީޖާތަކާ ގުޅޭގޮތުން ގާތްގަނޑަކަށް 2.75 މިލިއަން ޑޮލަރުގެ ބާޖީ ހަދާފަ އެވެ. އޭގެ ތެރޭގައި، މަޝްހޫރު މިއުޒިކް ކުޅޭ ދީވްޑް (d4vd) އަކީ އެންމެ ގިނައިން ސާޗްކުރި މީހާގެ ގޮތުގައި ހިމެނޭނެކަން، ލިސްޓު އާންމުވުމުގެ މަދު ގަޑިއިރުތަކެއް ކުރިން އޭނާ ވަނީ ދެނެގަނެ ބާޖީ ކާމިޔާބުކޮށްފަ އެވެ.
Advertisement
މި މައްސަލައާ ގުޅިގެން ނިއުޔޯކްގެ ސަދަން ޑިސްޓްރިކްޓްގެ ޔޫއެސް އެޓާނީ ޖޭ ކްލޭޓަން ވިދާޅުވީ، ކުންފުނިތަކުގެ އެތެރޭގެ ސިއްރު މައުލޫމާތު ބޭނުންކޮށްގެން އަމިއްލަ މަންފާ ހޯދުމަކީ ބަލައިގަނެވޭނެ ކަމެއް ނޫން ކަމަށާއި، މިފަދަ ދަހިވެތި އަމަލުތައް ތަހުގީގުކޮށް ދައުވާ ކުރާނެ ކަމަށެވެ.
ގޫގުލްއިން ނެރުނު ބަޔާނެއްގައި ބުނެފައިވަނީ މި މައްސަލާގައި ތަހުގީގީ އިދާރާތަކަށް އެއްބާރުލުން ދެމުންދާ ކަމަށާއި، ކުންފުނީގެ ސިއްރު މައުލޫމާތު ނަހަމަ ގޮތުގައި ބޭނުންކުރުމަކީ ކުންފުނީގެ ސިޔާސަތުތަކާ ކަނޑައެޅިގެން ހިލާފު ކަމެއް ކަމަށެވެ. މިހާރު ސްޕަގްނުއޯލޯ ވަނީ ވަޒީފާއިން ސަސްޕެންޑްކޮށްފަ އެވެ.
ޕޮލީމާކެޓްގެ ތަރުޖަމާނަކު ބުނި ގޮތުގައި، އެ ކުންފުނިން ވަނީ މި ތަހުގީގުގައި އެމެރިކާގެ އެޓާނީ އޮފީހަށް ފުރިހަމަ އެއްބާރުލުން ދީފަ އެވެ. މިއީ މިފަދަ ޕްލެޓްފޯމެއްގެ އެހީތެރިކަމާއެކު އިންސައިޑާ ޓްރޭޑިންގްގެ މައްސަލައެއްގައި ދައުވާ އުފުލުނު ފުރަތަމަ ފަހަރެވެ.
މީގެ ކުރިން މިދިޔަ މަހުވެސް ވަނީ އެމެރިކާގެ ސިފައިންގެ މީހެއްގެ މައްޗަށް، އަސްކަރީ ސިއްރު މައުލޫމާތު ބޭނުންކޮށްގެން ވެނެޒުއޭލާގެ ރައީސް ނިކޮލަސް މަޑޫރޯ ހައްޔަރުކުރުމާ ގުޅޭގޮތުން ބާޖީ ހެދި މައްސަލައެއްގައި ދައުވާ އުފުލާފަ އެވެ. ގޭނަން ކެން ވަން ޑައިކް ނަމަކަށް ކިޔާ އެ މީހާ ވަނީ އެ ބާޖީން 400,000 އަށްވުރެ ގިނަ ޑޮލަރު ހޯދާފަ އެވެ.
