މި ފަހުން ވ. އަތޮޅުގެ ކަނޑުއަޑިއަށް ފީނަނިކޮށް މަރުވި އިޓަލީގެ ފަތުރުވެރިންގެ މަރުގެ މައްސަލައިގައި ދިވެހި ސަރުކާރާއި ދެކޮޅަށް ޖިނާއީ ދައުވާކޮށް، ރާއްޖެ އަށް ބިރު ދައްކައި، ގެއްލުމުގެ ބަދަލޭ ކިޔައިގެން ދިވެހި ސަރުކާރުން އެތައް މިލިއަން ޑޮލަރެއް އިޓަލީ އަށް ހޯދައިދިނުމުގެ މަގުސަދުގައި އިދިކޮޅު އެމްޑީޕީން ޔޫރަޕިއަން ޔޫނިއަން އާއި ގުޅިގެން މަސައްކަތްތަކެއް ކުރަމުންދާ ކަމުގެ ހަބަރު ލިބިއްޖެއެވެ.
އެމްޑީޕީން އިދިކޮޅުގައި އޮންނައިރު ރާއްޖޭގެ ޓޫރިޒަމް ބޮއިކޮޓް ކުރުމަށް އަބަދުވެސް މަސައްކަތް ކުރެއެވެ.
“ރާއްޖޭގައި އެކަނިތޯ ކަނޑުއަޑިއަށް މީހުން މަރުވަނީ. ތިޔަށް ވުރެ މާގިނަ މީހުން އެއްފަހަރާ އެބަ މަރުވޭ. އަސްލު މި ވާގޮތަކީ އެމްޑީޕީން ކުރަމުންދާ ކަމެއް މިއީ. ޔާމީނުގެ ވެރިކަމުގައި ވެސް އެމްޑީޕީން ޔޫރަޕާއި ގުޅިގެން ރާއްޖޭގެ ޓުއަރިޒަމް ބޮއިކޮޓް ކުރުމަށް މިފަދަ މަސައްކަތް ކުރީމާ ނޫންތޯ އޭރު ކޮމަންވެލްތުން ވެސް ރާއްޖެ ވަކިވީ. އިޓަލީ މީހުން ވެސް މާ އަޑިޔަށް އޮންނަ މިންވަރަށް ވުރެ މާ އަޑިޔަށް ދިޔައީމާ އެ ވީކަމެއް ވީ. އެއީ ސަރުކާރުގެ މައްސަލައެއް ނޫން އަދި މިނިސްޓްރީ އިން ޒިންމާ ވާން ޖެހޭ މައްސަލައެއް ވެސް ނޫން. މަރު އައީމާ އެޔަކަށް ފިލައިގެނެއް ނޫޅެވޭނެ. ކަނޑުގައި އޮތަސް ގޭގައި އޮތަސް މަރު އައީމާ ގެންދަވާނެ. އިޓަލީ މީހުންގެ މަރާއި ރާއްޖެ އާއި ގުޅުވަން ވެގެން ބޭރު ދުނިޔޭގެ މީޑިއާ ތަކުގައި ހަބަރުތައް ފަތުރަނީ އެމްޑީޕީން. ބޭރުގެ އެއްވެސް ހަބަރެއްގައި ނޯންނާނެ ސަރުކާރުން އެމީހުން ހޯދަން ކުރި މަސައްކަތަށް ކްރެޑިޓް ދީފައެއް. މުޅިންވެސް ބޭރުމީހުންނަށް ކްރެޑިޓް ދީ، ދިވެހި ސަރުކާރާއި މެދު އަދި ރާއްޖެ އާއި މެދު ޝައްކު އުފެދޭ ގޮތަށް ހަބަރުތައް ލިޔެފައި ހުންނަނީ. މިކަމުގެ އަޑީގައި އޮތީ އެމްޑީޕީ” އޭނާ ވިދާޅުވިއެވެ.
ގެއްލުނު މީހުން ހޯދުމަށް އެމްއެންޑީއެފްއިން ހިންގި ސާޗް އޮޕަރޭޝަނުގެ ތެރޭގައި، ސާޖަންޓް ފަސްޓް ކްލާސް މުހައްމަދު މަހުދީ މަރުވި ހާދިސާގައި ޕްރޮޓޮކޯލްތައް ތަންފީޒުކުރެވުނުތޯ ކިޔައިގެން ޑިފެންސް މިނިސްޓަރާއި ވެސް ސުވާލުކުރުމަށް އެމްޑީޕީން މިހާރު ވަނީ ހުށަހަޅާފައެވެ. މިގޮތަށް ހުށަހެޅީ ވެސް މަރުގެ ފަހަތުގައި އޮޕަރޭޝަނަލް ފެއިލިއާއެއް ނުވަތަ ޕްރޮޓޮކޯލާ ޚިލާފު ކަންތައްތަކެއް އެބަހުއްޓޭ ކިޔައި ހެކިތަކެއް އުފައްދައިގެން އެ ހުރިހާ ވާހަކައެއް އިޓަލީގެ ފަތުރުވެރިންގެ މަރާއި ގުޅުވައި ސަރުކާރަށް ބޭރުގެ ޕްރެޝަރު ކޮށްގެން ރާއްޖޭގެ ޓުއަރިޒަމް ހަލާކުކޮށްލުމަށް ކަމަށް މައުލޫމާތު ލިބެއެވެ.
