ލެޖެންޑުންގެ އިސްތިއުފާއާއެކު އިޓަލީ ގައުމީ ޓީމުގެ މެނޭޖްމަންޓަށް ބޮޑު ހުސްކަމެއް

އިޓަލީ ގައުމީ ފުޓުބޯޅަ ޓީމު ޖެހިޖެހިގެން ތިންވަނަ ފަހަރަށް ވޯލްޑް ކަޕަށް ކޮލިފައިނުވެ ކެޓުމާ ގުޅިގެން، އިޓަލީގެ ފުޓުބޯޅަ ފެޑެރޭޝަނުގެ އެންމެ މަތީ ފަންތިއަށް ބޮޑު ލޮޅުމެއް އަރައި، ނާކާމިޔާބީގެ ޒިންމާ ނަންގަވައި ފެޑެރޭޝަނުގެ ރައީސް ގަބްރިއެލް ގްރަވީނާ އާއި ހެޑް ކޯޗު ޖެނާރޯ ގަޓޫސޯ މަގާމުން އިސްތިއުފާ ދެއްވިއިރު، ގައުމީ ޓީމުގެ ޑެލިގޭޝަން ޗީފްގެ މަގާމުގައި ހުރި މަޝްހޫރު ގޯލްކީޕަރު ޖިއަންލުއިޖީ ބުފޮން ވެސް ވަނީ ވަގުތުން އިސްތިއުފާ ދީފައެވެ. މި ބަދަލުތަކާއެކު އިޓަލީ ފުޓުބޯޅައިގެ މުޅި އިދާރީ ހިންގުން ބޮޑު ހަލަބޮލިކަމެއްގެ ތެރެއަށް ވެއްޓިގެންދިޔައެވެ.

މި ނާކާމިޔާބީން އަރައިގަނެ، ގައުމީ ޓީމު އަލުން ބިނާކުރުމުގެ ބޮޑު މަޝްރޫއު ހަވާލުކުރެވުނީ އިޓަލީގެ ފުޓުބޯޅަ ލެޖެންޑް ޕައޮލޯ މަލްޑިނީއާއެވެ. ނަމަވެސް، ފެޑެރޭޝަނުގެ އާ ރައީސް ޖިއޮވާނީ މަލަގޯ އާއި ސިޔާސީ ނުފޫޒުތަކުގެ ސަބަބުން، އާ ކޯޗަކު އައްޔަންކުރުމުގެ ކަންކަމުގައި މަލްޑިނީ ބޭނުންވި މިނިވަންކަމެއް ނުލިބުނެވެ. މަލްޑިނީ އިސްކަންދިން އަންދްރެއާ ޕިރްލޯ ގެނައުމަށް ފެޑެރޭޝަނުން ހުރަސްއެޅުމުން، ހަވާލުވިތާ އެންމެ 16 ދުވަސް ތެރޭގައި މަލްޑިނީ އާއި އޭނާގެ އެޑްވައިޒަރު ލިއޮނާޑޯ ވަނީ މަގާމުން އިސްތިއުފާ ދީފައެވެ.

ގްރަވީނާ، ބުފޮން، ގަޓޫސޯ، މަލްޑިނީ އަދި ލިއޮނާޑޯ އިސްތިއުފާ ދިނުމުން އިޓަލީ ގައުމީ ޓީމުގެ މެނޭޖްމަންޓަށް ވަނީ ބޮޑު ހުސްކަމެއް އައިސްފަ.

ފެޑެރޭޝަނުގެ އިދާރީ ހިންގުމަށް އާ ރައީސަކު އައްޔަންކުރެވުނު ނަމަވެސް، މަލްޑިނީ އާއި ބުފޮން ފަދަ ނުފޫޒުގަދަ ލެޖެންޑުން އެއްފަހަރާ ވަކިވުމުން ގައުމީ ޓީމުގެ ސްޕޯޓިންގް މެނޭޖްމަންޓް މިހާރު އޮތީ މުޅިން ހުސްކޮށެވެ. މިއީ ހަމައެކަނި މަގާމުތަކެއް ހުސްވުމެއް ނޫނެވެ. މިއީ ކުޅުންތެރިންނަށް އިތުބާރު ހޯދައިދޭނެ އަދި ޓީމަށް ކުރިމަތިވެފައިވާ ފުން ނިޒާމީ މައްސަލަތައް ހައްލުކުރާނެ ހަރުދަނާ ލީޑަޝިޕެއް ނެތުމުގެ ބޮޑު ހުސްކަމެއް ކަމަަށް ރިޕޯޓުތައް ބުނެއެވެ. އިޓަލީން މިހާރު މަސައްކަތް ކުރަމުންދަނީ ކުރީގެ ކޯޗު ރޮބާޓޯ މަންޗީނީ އާއި ޖޯޖިއޯ ކިއެލީނީ ގެނެސްގެން މި ހުސްކަން ފިލުވޭތޯއެވެ.