ސައުދީ އަރަބިއްޔާގެ ތާއިފް ސިޓީގައި ހުންނަ ކިންގް ފަހުދު އެއާބޭހަށް ޔަމަނުގެ ޙޫޘީ ޖަމާއަތުން ދިން ވައިގެ ހަމަލާއެއްގައި، އިޓަލީން ސައުދީއަށް ގެންގޮސްފައި އޮތް ޔޫރޯފައިޓާ އެފް-2000 މަރުކާގެ ހަނގުރާމަމަތީ ޖެޓަކަށް ބޮޑެތި ގެއްލުންތަކެއް ލިބިއްޖެއެވެ. މި ހަމަލާގައި އެއްވެސް ސިފައިންގެ މީހަކަށް އަނިޔާއެއް ލިބިފައިނުވާ ކަމަށް އިޓަލީގެ ދިފާޢީ ވަޒީރު ގައިޑޯ ކްރޮސެޓޯ ވިދާޅުވެފައިވެއެވެ.
ގާތްގަނޑަކަށް 100 މިލިއަނަށް ވުރެ ގިނަ ޑޮލަރުގެ އަގުހުރި މި ޖެޓަކީ، ގަލްފް ސަރަހައްދުގެ ވައިގެ ދިފާޢީ ނިޒާމު ވަރުގަދަކުރުމަށްޓަކައި ހިންގާ ބައިނަލްއަޤްވާމީ އަސްކަރީ މިޝަނެއްގެ ދަށުން މިއަހަރުގެ މާރިޗު މަހު ސައުދީއަށް ގެންދިޔަ ބޯޓެކެވެ. މި ޙާދިސާއަކީ ޔަމަނުގެ ހަނގުރާމައިގެ ސަބަބުން ސައުދީގެ އެތެރޭގައި ހުރި ބޭރުގެ އަސްކަރީ މަރުކަޒަކަށް މިފަދަ ބޮޑު ގެއްލުމެއް ލިބުނު ފުރަތަމަ ފަހަރެވެ.
މި ހަމަލާއާ ގުޅިގެން ސަރަހައްދީ މަސްރަޙު އިތުރަށް ހޫނުވެފައިވާއިރު، އިޓަލީގެ ދިފާޢީ ވުޒާރާއިން ދަނީ ލިބުނު ގެއްލުންތަކުގެ އެސެސްމެންޓެއް ހަދަމުންނެވެ. އަދި ސައުދީގައި ތިބި ބޭރުގެ ސިފައިންނާއި އަސްކަރީ ވަސީލަތްތަކުގެ ސަލާމަތީ ކަންކަން ވަރުގަދަކުރުމަށް ސައުދީ ކޯލިޝަނުން ވަނީ ފިޔަވަޅުތައް އަޅަން ފަށާފައެވެ.
