ހިޖުރައިގެ އެންމެ މަތިވެރި މާނައަކީ ނުބައިކަންތައް ދޫކޮށް ހެޔޮކަމުގެ މަގަށް ރުޖޫޢަވުން ކަމަށް މިއަދުގެ ހުކުރު ޚުޠުބާގައި ބުނެފިއެވެ.

މިއަދުގެ ހުކުރު ޚުޠުބާ ޚާއްސަކޮށްފައި ވަނީ ހިޖުރައިގެ އިބުރަތްތަކުގެ މައްޗަށެވެ.

ޚުޠުބާގައި ބުނީ މި ފެށޭ ހަފުތާއަކީ ހިޖުރީ އައު އަހަރެއް ފެށޭ ހަފުތާއަށް ވާތީ، ކީރިތި ރަސޫލާ مُحَمَّدُ صَلَّى اللهُ عَلَيْهِ وَسَلَّمَ މައްކާއިން މަދީނާއަށް ކުރެއްވި ހިޖުރައާ މެދު ފުންކޮށް ވިސްނާލުމަކީ މިއަދު ކުރަންޖެހޭ ކަމެއް ކަމަށެވެ.

ހިޖުރައިގެ މަތިވެރި ޒިކުރާ ގުޅިފައިވަނީ، މާތް ނަބިއްޔާ مُحَمَّدُ صَلَّى اللهُ عَلَيْهِ وَسَلَّمَ މައްކާއިން މަދީނާއަށް ހިޖުރަކުރެއްވި މަތިވެރި ޙާދިސާއާ ކަމަށާއި، އެއީ އިސްލާމީ ދައުލަތެއްގެ ބިންގާ އެޅުނު ޙާދިސާއެއް ކަމަށް ޚުޠުބާގައި ބުންޏެވެ.

اللهގެ މަގަށް ގޮވައިލައްވަން، އެކަލޭގެފާނު (مُحَمَّدُ صَلَّى اللهُ عَلَيْهِ وَسَلَّمَ) މައްކާގައި 13 އަހަރު ހުންނެވުމަށްފަހު، އެ ރަށުގެ އަހުލުވެރިންގެ ފަރާތުން އެކަށީގެންވާ އިޖާބައެއް ލިބިވަޑައިނުގަތުމުގެ އިތުރަށް، އެކަލޭގެފާނު (مُحَمَّدُ صَلَّى اللهُ عَلَيْهِ وَسَلَّمَ) އަވަހާރަކޮށްލަން އެބައިމީހުން ދިޔައީ ރާވަމުންނެވެ. އެ ހިނދު މާތް اللهގެ އަމުރުފުޅަށް މައްކާ ދޫކުރައްވައި މަދީނާއަށް ހިޖުރަކުރެއްވިއެވެ. އެ ހިސާބުން ފުރަތަމަ ފަހަރަށް އިސްލާމީ ދައުލަތެއްގެ ބިންގާ މަދީނާގައި އެޅުނީ ކަމަށް ޚުޠުބާގައި ބުންޏެވެ.

ޚުޠުބާގައި ބުނީ ހިޖުރައިގެ މާނައަކީ އަމިއްލަ ވަޒަން ދޫކޮށް އެހެން ރަށަކަށް ދިއުމަށް ވުރެ މާ ފުޅާ މާނައެއް އޮތް ކަމެއް ކަމަށާއި، އޭގެ އެންމެ މަތިވެރި މާނައަކީ ނުބައިކަންތައް ދޫކޮށް ހެޔޮކަމުގެ މަގަށް ރުޖޫޢަވުން ކަމަށެވެ.

ހިޖުރައިން ލިބޭ އަގުހުރި އެއް ފިލާވަޅަކީ، ދީނަށްޓަކައި ޤުރުބާންވުމުގެ މަތިވެރި ފިލާވަޅު ކަމަށް ޚުޠުބާގައި ބުންޏެވެ. ހިޖުރައިން ލިބޭ އަނެއް ފިލާވަޅަކީ ކަމެއް ކާމިޔާބުވުމުގެ އެންމެ މުހިންމު ބަޔަކީ އެ ކަމެއް ފުރިހަމައަށް ރޭވުމާއި ކަންކަން ކުރާނެ ފަރާތްތައް ކަނޑައަޅައި ހަމަޖައްސައިފައި ވުން ކަމަށް ޚުޠުބާގައި ބުންޏެވެ. އަދި ދަތި އުނދަގޫ ވަގުތުގައި ވެސް އީމާންކަމުގެ އަހުލުވެރިން ސާބިތުކަމާ އެކު ދެމިތިބޭނޭ ކަމީވެސް ހިޖުރައިން ލިބޭ ފިލާވަޅެއް ކަމަށް ޚުޠުބާގައި ބުންޏެވެ.

ކަންކަމުގައި މާތް اللهއާ ވަކީލުކުރަންޖެހޭކަމީ، ހިޖުރައިގެ ޙާދިސާއިން އަހަރެމެންނަށް ލިބޭ ފިލާވަޅެއް ކަމަށްވެސް ޚުޠުބާގައި ބުންޏެވެ. އެގޮތުން، މާތް اللهއާ ވަކީލުކުރުމަކީ، އެއްވެސް ޙާލެއްގައި، ވަކީލުކޮށްފީމޭ ބުނެ ދެއަތް އުރައިލައިގެން ތިބުން ނޫން ކަމަށާއި، އެއީ ކަންކަން ކުރުމުގައި ލިބެން ހުރި ވަސީލަތްތަކުގެ ބޭނުން ހިފުމާއެކު، މާތް اللهގެ ޙަޟުރަތުން ރައްކާތެރިކަމާއި ތައުފީޤު ލިބޭނޭކަމަށް ޔަޤީންކޮށްގެން ހުރުންކަމަށް ޚުޠުބާގައި ބުންޏެވެ.

ހިޖުރައިގެ ޘަވާބާއި ދަރުމަ ލިބުން ހުރީ އެކަމުގައި ހިޖުރަވެރިޔާގެ ނިޔަތުގެ މައްޗަށް ކަމަށްވެސް ޚުޠުބާގައި ބުންޏެވެ. ބައެއް މީހުން ދުންޔަވީ ފައިދާއެއް ހޯދުމަށް ނުވަތަ މީހަކާއި ކައިވަނިކުރުމަށް ވެސް ހިޖުރަކޮށް އުޅޭކަން ފާހަގަކޮށް ޚުޠުބާގައި ބުނީ ޘަވާބާއި ދަރުމަ ހުރި ހިޖުރައަކަށް ހިޖުރަ ވާނީ، މާތް الله އާއި އެކަލާނގެ ރަސޫލާ (مُحَمَّدُ صَلَّى اللهُ عَلَيْهِ وَسَلَّمَ) އަށްޓަކައި ކުރި ހިޖުރައަކަށް ވާނަމައެވެ.