އިންޑިއާގެ ވެސްޓް ބެންގާލްގެ މާލްޑާ ޑިސްޓްރިކްޓްގައި ހުރި، ގާތްގަނޑަކަށް 175 އަހަރު ވެފައިވާ ގަދީމީ ހިންދޫ ފައްޅި (ޝިވާ ޓެމްޕަލް)، ބަލަން ތިބި އެތައް ބައެއްގެ ކުރިމަތީގައި ސިކުންތުކޮޅެއްގެ ތެރޭގައި ގަންގާ ކޯރުގެ ތެރެއަށް ގަނބައިގަނެ، މުޅިން ޣަރަޤުވެއްޖެއެވެ. މިދިޔަ އާދީއްތަ ދުވަހުގެ ހަވީރު ހިނގި މި ހާދިސާގެ މަންޒަރުތައް ދައްކުވައިދޭ ވީޑިއޯތައް މީސްމީޑިއާގައި ދައުރުވަމުންދާއިރު، ގިނަ ބައެއްގެ ސަމާލުކަން މިކަމަށް ވަނީ ހުއްޓިފައެވެ. މިއީ މުސްލިމުންގެ ބާބަރީ މިސްކިތް ފަދަ މުޤައްދަސް ބިނާތައް ތަޅާލައި، މިސްކިތްތައް ހިސާރުކުރަމުންދާ ހަރުކަށި ހިންދޫންގެ ޤައުމުގައި ހިނގާދިޔަ ޢިބުރަތްތެރި ހާދިސާއެއްގެ ގޮތުގައި ގިނަ ބަޔަކު ދަނީ ސިފަކުރަމުންނެވެ.
ވެލިބަސްތާ ޖަހައިގެން އެތައް ހޭދައެއް ކުރުމުން ވެސް އިންޑިއާގެ ޝިވާ ޓެމްޕަލް ސަލާމަތެއް ނުކުރެވުނު - މިއީ ޢިބުރަތެއް.
Advertisement
މި ހާދިސާ ހިނގަން މެދުވެރިވީ އެ ސަރަޙައްދަށް ކުރި ވިއްސާރައިގައި ގަންގާ ކޯރުގެ ފެންގަނޑު އާދަޔާޚިލާފަށް ބޮޑުވެ، އޮއިވަރު ގަދަވުމުގެ ސަބަބުން ކޯރުގެ އައްސޭރިފަށް ވަރަށް ބޮޑަށް ގިރައިގެން ދިއުމާ ގުޅިގެންނެވެ. ފައްޅި ސަލާމަތްކުރުމަށްޓަކައި ހިންދޫން ވެލިބަސްތާ ޖަހައިގެން ކޯރުގެ އައްސޭރިފަށް ވަރުގަދަކުރަން ބުރަ މަސައްކަތްތަކެއް ކުރި ނަމަވެސް، ކޯރުގެ ބާރުގަދަ އޮއިވަރުގެ ކުރިމަތީގައި އެ މަސައްކަތް ވަނީ ނާކާމިޔާބުވެފައެވެ. އަދި ފައްޅީގެ ބިންގާ އެއްކޮށް ކަނޑައިގެން ގޮސް، މުޅި ބިނާ އެއްކޮށް ފެނުގެ އަޑިއަށް ޣަރަޤުވެގެން ދިޔައީ އެއްވެސް އިންސާނަކަށް އަދި އެއްވެސް މަޚްލޫޤަކަށް ވެސް އެއްވެސް ކަމެއް ނުކުރެވޭހާ އަވަހަށެވެ.
ގާތްގަނޑަކަށް 175 އަހަރު ވެފައިވާ ހިންދޫ ފައްޅި (ޝިވާ ޓެމްޕަލް) ގަންގާ ކޯރަށް ޣަރަޤުވެއްޖެ.
އިންޑިއާގައި މިހާރަކަށް އައިސް މުސްލިމުންގެ ތާރީޚީ މިސްކިތްތައް ތަޅާލުމާއި، ކޯޓުތައް މެދުވެރިކޮށް މިސްކިތްތައް އަތުލައި ހިންދޫންގެ ފައްޅިތަކަށް ބަދަލުކުރުމުގެ އަމަލުތައް ހަރުކަށި ޖަމާޢަތްތަކުން ދަނީ އިތުރުކުރަމުންނެވެ. މިފަދަ ދަނޑިވަޅެއްގައި، ހިންދޫންގެ އެންމެ މުޤައްދަސް ކޯރު ކަމަށްވާ ގަންގާ ކޯރުގެ ތެރެއަށް، އެމީހުންގެ ޒަމާންވީ ފައްޅިއެއް ކުޑަހިނދުކޮޅެއްގެ ތެރޭގައި ޣަރަޤުވެގެން ދިޔައީއެވެ.
