ރާއްޖެއަށް އެތެރެކުރަ އުޅުނު 67 ކިލޯގެ ހަޝީޝް އޮއިލް އާއި ހައިޑްރޯޕޮނިކް ގަންޖާ އިންޑިއާގެ ޓެމިލް ނާޑޫއިން އަތުލައިގަނެ، މި މައްސަލައާ ގުޅިގެން 5 މީހަކު ހައްޔަރުކޮށްފިއެވެ.
އިންޑިއާގެ މީޑިއާތަކުން ރިޕޯޓްކޮށްފައިވާ ގޮތުގައި، ޓެމިލް ނާޑޫގެ ތޫތުކުޑީ އަދި ޗެންނާއީ ސަރަހައްދުގައި އެ ގައުމުގެ ކަމާބެހޭ އިދާރާތަކުން ހިންގި ޚާއްސަ އޮޕަރޭޝަންތަކެއްގައި މި ތަކެތި އަތުލައިގެންފައިވަނީ ކަނޑުމަގުންނާއި ވައިގެ މަގުން ރާއްޖެއަށް ސްމަގަލް ކުރުމަށް ތައްޔާރުވަމުން ދަނިކޮށެވެ.
މި އޮޕަރޭޝަންގައި އަތުލައިގަނެވުނު ތަކެތީގެ ތެރޭގައި ގިނަ އަދަދެއްގެ ހަޝީޝް އޮއިލްގެ އިތުރުން ހައިޑްރޯޕޮނިކް ވިމެޑް (ގަންޖާ) ހިމެނެއެވެ.
Advertisement
މި މައްސަލައާ ގުޅިގެން ހައްޔަރުކުރި ފަސް މީހުންނަކީ ބައިނަލްއަގުވާމީ މަސްތުވާތަކެތީގެ ވިޔަފާރިކުރާ ވިއުގައަކަށް ނިސްބަތްވާ ބައެއް ކަމަށް އިންޑިއާގެ ތަހުގީގީ އިދާރާތަކުން ހާމަކުރެއެވެ. އަދި މި ވިއުގަ މެދުވެރިކޮށް އަވައްޓެރި ގައުމުތަކަށް މަސްތުވާތަކެތި ފޮނުވުމަށް އެމީހުން ދިޔައީ މަސައްކަތް ކުރަމުންނެވެ.
މި އޮޕަރޭޝަނަކީ އިންޑިއާގެ ޑައިރެކްޓަރޭޓް އޮފް ރެވެނިއު އިންޓެލިޖެންސް (ޑީއާރުއައި) އާއި އެހެނިހެން ސަލާމަތީ ބާރުތައް ގުޅިގެން ލިބުނު ޖާސޫސީ މައުލޫމާތެއްގެ މައްޗަށް ބިނާކޮށް ހިންގި އޮޕަރޭޝަނެެއް ކަމަށް އިންޑިއާ ފުލުހުން ބުނެއެވެ.
