ކުރީގެ ރައީސް މުޙައްމަދު ނަޝީދު އެމްޑީޕީއާއި ގުޅިގެން ސިޔާސީ ޙަރަކާތްތައް ކުރިޔަށް ގެންދިޔުމަށް ޖަލްސާ ބާއްވާނެ ތަނެއް ނުދިނޭ ބުނެ އެމްޑީޕީން ދޮގުހެދިއިރު، ޖަލްސާ ބާއްވާނެ ދެތަން ސަރުކާރުން ވަނީ ދައްކައިދީފައެވެ.

މީގެ ކުރިން ދުރާލާ ހުއްދަ ނުނަގައި ޖަލްސާ ބޭއްވެނީ ކާނިވާ ސަރަޙައްދުގައި އެކަންޏެވެ. ނަމަވެސް މިސަރުކާރު އައިފަހުން މާލޭގެ ހުޅަނގު ދެކުނުގައިވެސް ސިޔާސީ ޙަރަކާތްތައް ނުވަތަ ޖަލްސާތައް ބޭއްވޭނެ ގޮތް ވަނީ ހަދައިދީފައެވެ.

މިކަން މިހެން އޮތްއިރުވެސް އެމްޑީޕީން ބުނީ ތިމަންނާމެނަށް ޖަލްސާ ބާއްވާނެ އިތުރު ތަނެއް ދީފައި ނުވާކަމަށެވެ. އެބުނާ އިތުރު ތަނަކީ ކޮބައިކަމެއް އެމްޑީޕީއަކުން ނުބުނެއެވެ.

ރައީސް އޮފީހުގެ ސްޕޯކްސް ޕާސަން ހީނާ ވަލީދު އެކްސްގައި ވިދާޅުވީ ފުރިހަމަ ޑިމޮކްރެސީގެ އަސާސްތައް ރާއްޖޭގައި އަށަގެންނެވުމަށްޓަކައި، ޑިމޮކްރެސީގެ ހަމަތައް ދެމެހެއްޓުމަށްޓަކައި، ޒިއްމާދާރު ސިޔާސީ ޙަރަކާތްތައް ހިންގުމާއި، ޤައުމަށްޓަކައި އަޑު އުފުލުމަކީ ނުހަނު ބޭނުންތެރިކަމެއް ކަމަށާއި، ކުރިން ހުއްދަ ނެގުމަކާނުލާ ސިޔާސީ ހަރަކާތް ހިންގޭނެ ދެތަނެއް އެމްޑީޕީއަށް ވެސް ދައްކާފައިވާނެ ކަމަށެވެ.

އެހެންކަމުން މިގޮތަށް ކަނޑައެޅި، ފުރުަަސަތު ފުޅާކޮށްދެވިފައިވާ ކަންކަމާ ގުޅޭގޮތުން ރައްޔިތުންނަށް އޮޅޭފަދަ ގޮތަކަށް ސިޔާސީ ބޭފުޅުން ވާހަކަ ދެއްކުމުގެ ބަދަލުގައި ކަނޑައެޅިފައިވާ ހަމަތަކާއި އުސޫލުތަކާ އެއްގޮތަށް ކަންކަން ކުރިއަށް ގެންދިއުމަކީ ރޫލް އޮފްލޯ އާއި ޑިމޮކްރެސީގެ މި ނިޒާމު ދެމެހެއްޓުމުގެ ވަރަށް މުހިއްމު އަދި އެހާމެ ރިވެތި އަސާސެއް ކަމަށް ހީނާ ވިދާޅުވިއެވެ.

އެމްޑިޕީން ބޭނުންވަނީ ރައްޔިތުންނަށް ޙަޤީޤަތް އޮޅުވާލައި މާލެތެރޭގައި ހަމަނުޖެހުން ހިންގުމަށެވެ. އަދި ރަށްރަށުން މީހުން އެއްކޮށްގެން ފުލުހުންނާއި ކުރިމަތިލައި ލޭއޮހޮރުވުމަށް އެމްޑިޕީން ރާވަމުންދާ ކަމުގެ އަޑުތައް ދަނީ އިވެމުންނެވެ.