އިސްރާއީލުގެ ޔަހޫދީން އެމީހުންގެ ފުރާނަ ސަލާމަތް ކުރަން ބޭނުންނަމަ، ފަލަސްތީނުގެ ބިން ދޫކޮށް އެމީހުންގެ އަމިއްލަ ގައުމުތަކަށް ދިޔުމަށް އީރާނުގެ އިންގިލާބީ ލަޝްކަރުތަކުން އިންޒަރު ދީފިއެވެ. އީރާނުން ބުނީ އެމީހުން ދޭ ޙަމަލާތަކުގައި ފަލަސްތީނުގެ ބިމަށް ވެރިވެގަނެގެން އުޅޭ ޔަހޫދީންނަށް ލިބޭ ގެއްލުމަށް އީރާން ޒިންމާ ނުވާނެ ކަމަށެވެ.
މިއަދު އިސްރާއީލަށް އީރާނުން ދިން ހަމަލާތަކާ ގުޅިގެން، އިސްރާއީލުގެ ދިފާއީ ވަޒީރު އިސްހާގް ކާޓްސް ވަނީ އީރާނުން އިސްރާއީލުގެ ހޮސްޕިޓަލްތަކަށާއި އާންމުން ދިރިއުޅޭ މަދަނީ ތަންތަނަށް ހަމަލާދީ، އާންމުން މަރަމުން ގެންދާ ކަމަށާއި މިއީ ބައިނަލްއަގްވާމީ ގާނޫނާއި ޚިލާފު ކަމެއްކަމަށް ބުނެފައެވެ. އޭނާ ބުނިގޮތުގައި، އީރާނުން އިސްރާއީލަށް ހަމަލާދީ އިސްރާއީލު މީހުން ޑަޒަންޑަޒަނަށް މަރަމުން ގެންދާއިރު ބައިނަލްއަގްވާމީ މުޖްތަމައު އޮންނަނީ ކުޅިބަލާށެވެ. މި މޭރުމުން ވާހަކަ ދައްކަމުން ކާޓްސް ވަނީ ވަރަށް ރުޅިއައިސްގެން އީރާނަށާއި ބައިނަލްއަގްޥާމީ މުޖްތަމައަށް ބަހުގެ ހަމަލާތައް ދީފައެވެ.
ނަމަވެސް، އިސްރާއީލުން ވަނީ ޣައްޒާގެ 30 ހޮސްޕިޓަލަށް އެތައް ފަހަރަކު ހަމަލާދީ އެތަންތަން ހަލާކުކޮށް، ޑޮކްޓަރުންނާއި ނަރުހުންގެ އެތައް ސަތޭކަ ބަޔަކު ޝަހީދުކޮށްލާފައެވެ. އަދި އިސްރާއީލުގެ ސިފައިން އެއްގަމުން އެ ހޮސްޕިޓަލްތަކަށް އަރައިގަނެ ބަލިމީހުންގެ ގަޔަށް ބަޑިޖަހައި އެތައް ސަތޭކަ ބަލިމީހުންނެއްވެސް ވަނީ ޝަހީދުކޮށްލާފައެވެ. މީގެއިތުރުން އިސްރާއީލުވަނީ ޣައްޒާގެ އާންމުން ދިރިއުޅޭ އިމާރާތްތަކަށް ބޮންއަޅައި އެއްކޮށް ބިމާހަމަކޮށްލައި، ޣައްޒާގެ 60 ހާހަށް ވުރެ ގިނަ އާންމުން ޝަހީދުކޮށްލާފައެވެ.
Advertisement
މިދިޔަ އަހަރު އިސްރާއީލުން ލުބްނާނަށް ދިން ހަމަލާތަކުގައިވެސް ދެ ހޮސްޕީޓަލަކަށް ބޮންއަޅައި ޑޮކްޓަރުންނާއި ނަރުހުންނާއި ބަލިމީހުން ހިމެނޭގޮތަށް އެތައް ބަޔަކު ޝަހީދުކޮށްލިއެވެ. އަދި އިސްރާއީލުން ބައިނަލްއަގްވާމީ ގާނޫނަށް ގޮންޖެހުމަށްފަހު އީރާނަށް އިސްވެ ހަމަލާދީ އީރާނުގެ ހޮސްޕިޓަލްތަކަށްވެސް ވަނީ ބޮންއަޅާފައެވެ. މި ހަމަލާތަކުގައި އީރާނުގެ 500 އަށް ވުރެ ގިނަ މީހުން ވަނީ ޝަހީދުކޮށްލާފައެވެ.
