ގަވާއިދާ ޚިލާފަށް އުޅޭ ބިދޭސީން އެއްރަށުން އަނެއް ރަށަށް އުފުލާ އުޅަނދުފަހަރުގެ ކެޕްޓަނުންނާމެދު ފިޔަވަޅު އަޅާނެކަމަށް ހޯމްލޭންޑް ސެކިއުރިޓީ އެންޑް ޓެކްނޮލޮޖީ މިނިސްޓަރު އަލީ އިހްސާން ވިދާޅުވެއްޖެއެވެ.
ދައުލަތުގެ މީޑިއާ ޕީއެސްއެމްގެ ޕްރޮގްރާމެއްގައި ވާހަކަފުޅު ދައްކަވަމުން މިނިސްޓަރު އިހްސާން ވިދާޅުވީ، ދަތުރުފަތުރުކުރާ އުޅަނދުފަހަރާއި ފެރީ އުޅަނދުފަހަރުގެ ކެޕްޓަނުން، އެ އުޅަނދަކަށް އަރާ ބިދޭސީންނަކީ ގަވާއިދާ އެއްގޮތަށް އުޅޭ ބައެއްތޯ ޔަގީންކުރުމަކީ ގަވާއިދާ ޚިލާފަށް އުޅޭ ބިދޭސީންގެ މައްސަލަ ހައްލުކުރުމަށް އެޅޭ މުހިންމު ފިޔަވަޅެއް ކަމަށެވެ. އަދި ގަވާއިދާ ޚިލާފަށް އުޅޭ ބިދޭސީއަކު އުފުލައިފިނަމަ އެ ކެޕްޓަނަކާމެދު ފިޔަވަޅު އެޅޭނެ ގަވާއިދުތައް ތަޢާރަފްކުރާނެ ކަމަށްވެސް ވިދާޅުވިއެވެ.
މިނިސްޓަރު އިތުރަށް ހާމަކުރެއްވި ގޮތުގައި، މިހާރު ތަޢާރަފްކޮށްފައިވާ އައު ނިޒާމުގެ ދަށުން ކައުންސިލް އިދާރާތަކުގައި ތިބޭ އެންފޯސްކުރާ މުވައްޒަފުންނަށް ނުވަތަ ފުލުސް އޮފިސަރުންނަށް ފޯނު އެޕްލިކޭޝަނެއް މެދުވެރިކޮށް ބިދޭސީ މީހާގެ ފޮޓޯއެއް ނަގާލުމުން އެ މީހެއްގެ ސްޓޭޓަސް ފެންނާނެއެވެ.
ގަވާއިދާއި ޚިލާފަށް އުޅޭ ބިދޭސީންގެ މައްސަލައަކީ ދިވެހި ރައްޔިތުންގެ ވިޔަފާރިތަކަށް ގެއްލުންވަމުންދާ، އަދި އިޖުތިމާޢީ އެތައް މައްސަލައެއް ދިމާވަމުންދާ ކަމެއްކަމަށް މިނިސްޓަރު ފާހަގަކުރެއްވިއެވެ. އަދި މީގެ ސަބަބުން ޖިނާއީ ކުށްތައްވެސް އިތުރުވަމުންދާކަން މިނިސްޓަރު ފާހަގަކުރެއްވިއެވެ.
މިނިސްޓަރު އިހްސާން އިތުރަށް ވިދާޅުވީ ބިދޭސީން ގަވާއިދުގެ ތެރެއަށް ވަންނަން މިހާރު ހުޅުވާލާފައިވާ ދޮރު ބަންދުވުމަށްފަހު ގަވާއިދާ ޚިލާފަށް އުޅޭ ބިދޭސީންނަށް ގަވާއިދުގެ ތެރެއަށް ވަންނަން ދެން އިތުރު ފުރުސަތު ނުލިބޭނެކަމަށެވެ. އަދި ބިދޭސީންގެ މައްސަލަ ހައްލުކުރުމަށްޓަކައި މަސައްކަތްކުރާނީ އެންމެ ހަރުކަށި ފިޔަވަޅުތަކާއެކުގައި ކަމަށާއި، މި ދައުރުގެ ތެރޭގައި މިކަން ހައްލުކުރާނެ ކަމަށްވެސް މިނިސްޓަރު ވިދާޅުވިއެވެ.
