ރާއްޖޭގައި މަސްތުވާތަކެތީގެ ވަބާ ފެތުރި، ޒުވާނުންނާއި އާންމު ރައްޔިތުންނަށް ނުރައްކާ ބޮޑުވަމުންދާތީ، އެކަން ހުއްޓުވުމަށް ސަރުކާރުން އަޅަމުންދާ ހަރުދަނާ ފިޔަވަޅުތަކުގެ ތެރެއިން، މަސްތުވާތަކެތި ބޭނުންކުރުމަށް ހާއްސަކޮށްގެން ހިންގަމުންދިޔަ 11 ތަނެއް މިހާރު ބަންދުކޮށްފައިވާ ކަމަށް ހޯމް މިނިސްޓަރު އަލީ އިހްސާން ވިދާޅުވެއްޖެއެވެ.

މިނިސްޓަރު މިކަން ހާމަކުރެއްވީ ޕީއެންސީގެ މަތީ މަޖިލީހުގައި ވާހަކަފުޅުދައްކަވަމުންނެވެ. އެމަނިކުފާނު ވިދާޅުވިގޮތުގައި، އަލަށް އަމަލުކުރަން ފެށި ހަރުދަނާ ގާނޫނުގެ ދަށުން ބަންދުކުރެވުނު މި 11 ތަނުގެ ތެރޭގައި ވެރިރަށް މާލޭގައި ހިންގަމުންދިޔަ 6 ތަނަކާއި، އައްޑޫ ސިޓީގައި ހިންގަމުންދިޔަ 4 ތަނެއްގެ އިތުރުން ފުވައްމުލަކު ސިޓީގައި ހިންގަމުންދިޔަ 1 ތަނެއް ހިމެނެއެވެ.

މިފަދަ ތަންތަނުގެ ސަބަބުން މުޖުތަމައުގެ އަމަންއަމާންކަން ގެއްލި، ކުށްކުރުން އިތުރުވަމުންދާތީ، ސަރުކާރުގެ އަމާޒަކީ އަންނަ ނޮވެންބަރު މަހުގެ ކުރިން މާލެތެރޭގައި މިފަދަ އަމަލުތައް ހިންގާ ހުރިހާ ތަނެއް މުޅިން ބަންދުކޮށް ނިންމުން ކަމަށް މިނިސްޓަރު އަލީ އިހްސާން ވިދާޅުވިއެވެ.

މި ހާއްސަ އޮޕަރޭޝަންތަކުގެ ތެރެއިން، ޑްރަގްގެ ވަބާގައި ޖެހިފައި ތިބި 18 އަހަރުން ދަށުގެ 50 ކުދިން އެކި ތަންތަނުން ނަގައި، އެ ކުދިން ސަލާމަތްތެރި މާހައުލުތަކަށް ބަދަލުކޮށްފައިވާ ކަމަށްވެސް އެމަނިކުފާނު ފާހަގަކުރެއްވިއެވެ. އަދި މިގޮތަށް ނެގުނު ކުދިންނަށް ޓާގެޓެޑް ރީހެބިލިޓޭޝަން ޕްރޮގްރާމްތަކާއި، ރީއިންޓެގްރޭޝަން ޕްރޮގްރާމްތައް މިހާރު ފަށާފައިވާ ކަމަށް އެމަނިކުފާނު ވިދާޅުވިއެވެ.