ރާއްޖެއިން މަސްތުވާތަކެތީގެ ނެޓްވޯކްތައް ނައްޓާލައި، އެ ވަބާއިން ގައުމު ސަލާމަތް ކުރުމަށް ސަރުކާރުން ކުރަމުންދާ މަސައްކަތްތަކުގެ ދަށުން، ފާއިތުވި 3 އަހަރު ދުވަހުގެ ތެރޭގައި 508 ޓާގެޓެޑް އޮޕަރޭޝަން ހިންގާފައިވާ ކަމަށް ހޯމް މިނިސްޓަރު އަލީ އިހްސާން ވިދާޅުވެއްޖެއެވެ.
މިނިސްޓަރު މިކަން ހާމަކުރެއްވީ ޕީއެންސީގެ މަތީމަޖިލީހުގައި މަސްތުވާތަކެއްޗާ ދެކޮޅަށް ސަރުކާރުން އަޅަމުންދާ ހަރުދަނާ ފިޔަވަޅުތަކާއި ހޯދާފައިވާ ކާމިޔާބީތަކުގެ މައްޗަށް އަލިއަޅުއްވާލައްވަމުންނެވެ. އެމަނިކުފާނު ވިދާޅުވިގޮތުގައި، މި އޮޕަރޭޝަންތަކުގެ ތެރެއިން ޖުމްލަ 1,327 ކިލޯގްރާމުގެ މަސްތުވާތަކެތި ވަނީ އަތުލައިގަނެވިފައެވެ. އަދި މި ތަކެތީގެ މަގުމަތީ އަގު (ސްޓްރީޓް ވެލިއު) ގާތްގަނޑަކަށް 1.4 ބިލިއަން ދިވެހި ރުފިޔާއަށް އަރާކަން ފާހަގަކުރެއްވިއެވެ.
މިއީ ދިވެހިރާއްޖޭގެ ތާރީހުގައި މިފަދަ ކުރު މުއްދަތެއްގެ ތެރޭގައި ހޯދުނު ފުރަތަމަ ފަހަރުގެ ކާމިޔާބީއެއް ކަމަށް މިނިސްޓަރު ފާހަގަކުރެއްވިއެވެ.
Advertisement
މީގެ އިތުރުން، މި ފުޅާ އޮޕަރޭޝަންތަކާ ގުޅިގެން ހިންގުނު ތަހުގީގުތަކުން، މަސްތުވާތަކެތީގެ ވިޔަފާރިން ލިބުނު ނުހައްގު ފައިސާ ދައުރުކުރުމުގެ 23 މައްސަލައެއް (މަނީ ލޯންޑަރިންގެ ކުށުގެ ދަށުން) ވަރަށް ގާތުން ބަލައި ތަހުގީގުކޮށްފައިވާ ކަމަށްވެސް އެމަނިކުފާނު ހާމަކުރެއްވިއެވެ.
މިއިން ދައްކުވައިދެނީ ހަމައެކަނި މަސްތުވާތަކެތި އަތުލައިގަތުމުގެ ބަދަލުގައި، އެ ވިޔަފާރީގެ އަޑީގައި ތިބެގެން މާލީ މަންފާ ހޯދާ ފަރާތްތަކަށްވެސް ގާނޫނީ ގޮތުން ފިޔަވަޅު އެޅެމުންދާކަމެވެ.
