ރާއްޖޭގެ ހުރިހާ ޖަލުތަކެއް އެއްކޮށްލައި އުތުރު ތިލަފަޅުގައި ހަދަން ނިންމާފައިވާ ސެންޓްރަލް ޖަލު ތަރައްޤީކުރާނީ ބައިނަލްއަޤުވާމީ ފެންވަރުގައި ކަމަށް ދާޚިލީ ސަލާމަތާއި ފަންނިއްޔަތާބެހޭ ވަޒީރު އަލި އިހުސާން ވިދާޅުވެއްޖެއެވެ.
އިހުސާން މިފަދައިން ވިދާޅުވީ ޕީއެސްއެމްގެ ޕްރޮގްރާމެއްގައި ވާހަކަދައްކަވަމުންނެވެ.
އެކި ރަށްރަށުގައި ޖަލުތައް ހަދައިގެން ގައިދީން ގެންގުޅުމަކީ ޚަރަދުބޮޑު ކަމެކެވެ. އެހެންކަމުން ސަރުކާރުން ނިންމާފައިވަނީ އުތުރު ތިލަފަޅުގައި ސެންޓްރަލް ޖަލެއް ތަރައްޤީކުރުމަށެވެ.
އިހުސާން ވިދާޅުވީ ރާއްޖޭގެ އެކި ރަށްރަށުގައި ޖަލުތައް ހިންގުމަކީ ވަރަށް ޚަރަދު ބޮޑު އަދި އުނދަގޫ ކަމެއް ކަމަށާއި، ސެންޓްރަލް ޖަލު ތަރައްޤީކުރެވިގެން ދިޔުމުން ޖަލުތަކަށް ކުރާ ޚަރަދުގެ %40 ކުޑަ ކުރެވޭނެ ކަމަށެވެ.
އިހުސާން ވިދާޅުވީ ސެންޓްރަލް ޖަލު ތަރައްޤީކުރެވިގެންދާނީ ފަރުވާއާއި، ދޭ ޚިދުމަތްތައްވެސް ބައިނަލްއަޤުވާމީ ފެންވަރުގައި ކަމަށެވެ. އަދި ރިހެބިލިޓޭޝަނާއި ކަރެންޝަންސްގެ ޚިދުމަތްވެސް އެންމެ ރަނގަޅަށް އެތަނުގައި ތަރައްޤީކުރާނެ ކަމަށް އިހުސާން ވިދާޅުވިއެވެ.
އިހުސާން ވިދާޅުވީ ސެންޓްރަލް ޖަލުން ފެންވަރު ރަނގަޅު ޚިދުމަތް ދިނުމުގެ މަޤުޞަދަކީ ޖަލު ހުކުމް ނިންމާފައި ނުކުންނަ މީހާއަކީ މުޖުތަމަޢު ބަލައިގަންނަ މީހަކަށް ހެދުން ކަމަށެވެ.
ކުށްކުރާ މީހުންނާއި ކުދިންވެސް ކުށުގެ ވެށިން ދުރުކޮށް، އެމީހުން ހަރުދަނާކުރުމަށް ސަރުކާރުން އަންނަނީ މުހިންމު ފިޔަވަޅުތަކެއް އަޅަމުންނެވެ. އެގޮތުން "ހޯޕް އައިލެންޑް" ގެ ނަމުގައި އުތުރު ތިލަފަޅުގައި ކުރިއަށްގެންދިއުމަށް ނިންމާފައިވާ މަޝްރޫޢު ފާހަގަކޮށްލެވެއެވެ. އެ މަޝްރޫޢުގެ ދަށުން ކުދިން ރިހެބިލިޓޭޓްކޮށް، 18 އަހަރުވުމުން ފުލުހުން ނުވަތަ ސިފައިންގެ ޚިދުމަތަށް ވެއްދުމާއި، ވަކި މުއްދަތަކަށްފަހު އެ ކުދިން ބޭނުންވާ ދާއިރާތަކަށް ނިކުތުމުގެ ފުރުޞަތު ލިބިގެންދާނެއެވެ.
