ދިވެހި ފުލުހުންގެ ޚިދުމަތަށް ގޮންޖަހައި ޙަރާމާއި ޙަލާލް އޮޅުވާލަން މަސައްކަތްކުރި ރައްޔިތުންގެ މަޖިލީހުގެ އެމްޑީއޭ ތަމްސީލުކުރާ މެމްބަރު މުޙައްމަދު ޢައްބާސް އަށް ސޯޝަލްމީޑިއާގައި ފާޑުކިޔުންތައް އަމާޒުވެ “ހޫނުފެނަށް ވެއްޓިއްޖެ”އެވެ.

ޢައްބާސް “ހޫނުފެނަށް ވެއްޓުނީ” “ޖެމްކިއު” ނަމަކަށްކިޔާ އެޕްލިކޭޝަން ބޭނުންކޮށް އެއިން މަންފާ ހޯދުމަށް މީހުން އެއްކޮށްގެން އެކަން ޕްރޮމޯޓްކުރާ ފަރާތްތަކާއިމެދު ފިޔަވަޅު އަޅާނެކަމަށް ދޭހަވާ ގޮތަށް ފުލުހުން ބަޔާނެއް ނެރެފައި ވަނިކޮށް އެކަމާއި ދެކޮޅަށް އޭނާ ދެއްކި ވާހަކަތަކާއި ގުޅިގެންނެވެ.

ދަންނަބޭކަލުންގެ ރަޢުޔުގައި “ޖެމްކިއު” އަކީ ޙަރާމް އެއްޗެކެވެ.

ވެލިދޫ ދާއިރާގެ މެންބަރު ވިދާޅުވީ ރައްޔިތުންގެ މަޖުލީސްގެ %70 ބޭފުޅުންނާއި ސަރުކާރުގެ ގިނަ ސްޓޭޓް މިނިސްޓަރުންނާއި، ޑެޕިއުޓީ މިނިސްޓަރުންނާއި، ސިފައިންނާއި ޕޮލިހުންގެ %80 ބޭފުޅުންނާއި ޖުމްލަ 70 ވަރަކަށް ހާސް ރައްޔިތުން GEMCE ބޭނުން ކުރަމުންދާ ކަމަށެވެ. ސަބަބަކީ އެއިން ނަފާ ލިބޭތީ ކަމަށާއި ރައްޔިތުން ތިބި ހާލަތަށް ބަލާއިރު GEMCE ބޭނުންކުރުމަކީ ވަރަށް މުހިންމުކަމެއްކަމުގައި ދެކޭ ކަމަށެވެ.

އޭނާއަށް ފާޑުކިޔާ ފަރާތްތަކުން ބުނާ ގޮތުގައި ޙަރާމެއް ޙަލާލެއް ބެލުމެއް ނެތި އެފަދަ ވާހަކަތައް ދައްކަނީ “ޖާކިލު”ކަމުންނެވެ. އަދި ރައްޔިތުންގެ މަޖިލީހުގެ މެންބަރުކަމަށް އައުމަކީ ޙަރާމުގެ މައްޗަށް ޙަލާލް އިސްކުރުމަށް ބާރު ލިބިގެންވާނެ ކަމެއް ނޫން ކަމަށާއި، ޙަރާމް ކަމަކުން ފައިދާ ލިބެއޭ ބުނެ ހަށިވިއްކުމުގެ ވިޔަފާރި ވެސް ހުއްދަކުރަންވީ ނޫންހޭ ބުނެ ބައެއް ފަރާތްތަކުން ސުވާލު އުފައްދާފައި ވެއެވެ.