ކެމްބޯޑިއާގެ ވެރިރަށް ފްނޮމް ޕެންގައި ކުރިއަށްދާ ދެވަނަ އިންޓަ-ޕާލިމެންޓަރީ ސްޕީކާސް ކޮންފަރެންސް (އައިއެސްސީ) ގައި ދިވެހިރާއްޖޭގެ ރައްޔިތުންގެ މަޖިލީހުގެ ރައީސް ޢަބްދުއްރަޙީމް ޢަބްދުﷲ މިއަދު ތަގުރީރު ކުރައްވައިފިއެވެ.

މި ކޮންފަރެންސްގައި މަޖިލީހުގެ ރައީސް ވާހަކަފުޅު ދައްކަވާފައި ވަނީ "ސުލްހައާއި ތަނަވަސްކަމަށްޓަކައި އެއްބައިވަންތަކަން: ބައިނަލްއަގުވާމީ ގާނޫނުތައް ހަރުދަނާ ކުރުމާއި ސުލްހަވެރިކަމާއި އެކު މައްސަލަތައް ހައްލު ކުރުން" މި މައުޟޫޢުގެ މައްޗަށެވެ. މި ކޮންފަރެންސަކީ މިއަދުން ފެށިގެން ހުކުރުދުވަހުގެ ނިޔަލަށް ކުރިއަށްދާ ކޮންފަރެންސްއެކެވެ.

އައިއެސްސީ ކޮންފަރެންސަކީ ދުނިޔޭގެ ސުލްހަ މަސަލަސްކަން ގާއިމު ކުރުމާއި، ބައިނަލްއަގުވާމީ ގާނޫނުތައް ނެގެހެއްޓުމާއި، ހަމަނުޖެހުންތައް ސުލްހަވެރިކަމާއި އެކު ހައްލު ކުރުމުގެ އިތުރުން ގުޅިފައިވާ ތަރައްގީއާ ގުޅޭގޮތުން މަޝްވަރާ ކުރުމަށްޓަކައި އެކި ގައުމުތަކުގެ ގާނޫނު ހަދާ މަޖިލިސްތަކުގެ ރައީސުންނާއި އިސްވެރިން ބައިވެރިވެވަޑައިގަންނަވާ މުހިންމު ބައްދަލުވުމެކެވެ.

މަޖިލީހުގެ ރައީސް ކެމްބޯޑިއާއަށް ކުރައްވަމުން ގެންދަވާ މި ރަސްމީ ދަތުރުފުޅުގައި އެމަނިކުފާނުގެ އަރިހުގައި ރައްޔިތުންގެ މަޖިލީހުގެ މަތީ ފަންތީގެ ވަފުދެއް ބައިވެރިވެވަޑައިގަންނަވައެވެ. މި ވަފުދުގައި ހިމެނިވަޑައިގަންނަވަނީ ހުޅުދޫ ދާއިރާގެ މެންބަރު މުޙައްމަދު ޝާހިދު، މައްޗަންގޯޅި ދެކުނު ދާއިރާގެ މެންބަރު މުސްތަފާ ޙުސައިން އަދި ފަރެސްމާތޮޑާ ދާއިރާގެ މެންބަރު އަޝްރަފް ރަޝީދެވެ.

މީގެ އިތުރުން، ރައްޔިތުންގެ މަޖިލީހުގެ އިދާރާގެ ޗީފް އޮފް ބިއުރޯ އަޙްމަދު ނިހާން ޙުސައިން މަނިކު އަދި ފޮރިން ރިލޭޝަންސް ޑިޕާޓްމަންޓުގެ އެސިސްޓެންޓް ޑިރެކްޓާ ޖެނެރަލް ޒުއްޔިނާ ބަދުރީ ވެސް މި ދަތުރުފުޅުގައި ބައިވެރިވެވަޑައިގަންނަވައެވެ.