ކެމްބޯޑިއާގެ ނޮމް ޕެންގައި ކުރިއަށްދާ 2 ވަނަ އިންޓަރޕާލަމެންޓަރީ ސްޕީކަރސް ކޮންފަރެންސްގެ އާންމު ބަހުސްގައި، ރައްޔިތުންގެ މަޖިލީހުގެ ރައީސް އަބްދުއްރަޙީމް އަބްދުﷲ ތަގުރީރުކުރައްވައިފިއެވެ.
"ސުލްހައާއި ތަނަވަސްކަމަށްޓަކައި އެއްބައިވަންތަކަން: ބައިނަލްއަގްވާމީ ގާނޫނުތައް ހަރުދަނާކުރުމާއި ސުލްހަވެރިކަމާއެކު މައްސަލަތައް ހައްލުކުރުން" މި މައުޟޫއަށް ވާހަކަފުޅުދައްކަވަމުން މަޖިލީހުގެ ރައީސް ވަނީ ދުނިޔޭގެ ސުލްހައާއި ތަނަވަސްކަން ގާއިމުކުރުމަށްޓަކައި ބައިނަލްއަގުވާމީ ގާނޫނުތަކަށް އިހުތިރާމްކުރުމަށާއި، ހަމަނުޖެހުންތައް ހައްލުކުރުމުގައި ބާރުގެ ބަދަލުގައި މަޝްވަރާކުރުން އިސްކުރުމަށް ގޮވާލައްވާފައެވެ. ވަކިން ހާއްސަކޮށް، ޔޫއެން ޗާޓަރާއި ބައިނަލްއަގުވާމީ ގާނޫނުތަކަކީ ރާއްޖެ ފަދަ ކުދި ޖަޒީރާ ގައުމުތަކުގެ މިނިވަންކަމާއި ސިޔާދަތު ކަށަވަރުކުރުމަށް މުހިންމު އަސާސްތަކެއްކަން އެމަނިކުފާނު ފާހަގަކުރެއްވިއެވެ.
އިންޑިއާ ކަނޑުގެ މުހިންމުކަމަށް އަލިއަޅުއްވާލައްވަމުން މަޖިލީހުގެ ރައީސް ވިދާޅުވީ، އިންޑިއާ ކަނޑަކީ ސަރަހައްދީ ރައްޔިތުންގެ ދިރިއުޅުމާ ގުޅިފައިވާ މައި ނާރު ކަމަށެވެ. އަދި މޫސުމީ ބަދަލުތަކުގެ ސަބަބުން ކަނޑުގެ މާހައުލަށް ލިބޭ ގެއްލުންތަކަކީ ސަރަހައްދީ ސަލާމަތަށާއި ސުލްހައަށް ހުރި ނުރައްކަލެއްކަން ފާހަގަކުރައްވައި، ކަނޑުތަކުގެ ރައްކާތެރިކަން ކަށަވަރުކުރުމުގައި ރާއްޖެ ދެމިއޮންނާނެކަމުގެ ޔަގީންކަން ދެއްވިއެވެ.
Advertisement
މީގެއިތުރުން، މެދުއިރުމަތީގައި ހިނގަމުންދާ ހަނގުރާމައާއި ލާއިންސާނީ އަނިޔާތަކާމެދު ކަންބޮޑުވުން ފާޅުކުރައްވައި، ވަގުތުން ހަނގުރާމަ ހުއްޓާލުމަށާއި އިންސާފުވެރި، ދެމެހެއްޓެނިވި ސުލްހައެއް ގާއިމުކުރުމަށް އެމަނިކުފާނު ގޮވާލެއްވިއެވެ.
ތަގުރީރު ނިންމަވާލައްވަމުން މަޖިލިސް ރައީސް ވަނީ ބައިބައިވުމާއި ދެކޮޅުވެރިކަން ދޫކޮށްލައި، އެންމެންގެ ކުރިއެރުމަށްޓަކައި ގާނޫނު ހަދާ މަޖިލިސްތަކުން ގުޅިގެން މަސައްކަތްކުރުމަށް އިލްތިމާސްކުރައްވާފައެވެ.
