ރާއްޖޭގައި ކާނާގެ ޔަގީކަން އިތުރުކުރުމުގެ ގޮތުން ސަރުކާރުން ހިންގާ މަޝްރޫއުގެ ދަށުން ހދ. ހަނިމާދޫގައި ބަނބުކެޔޮ ގަސް އިންދުމުގެ ހަރަކާތެއް ފަށައިފި އެވެ.
ދަނޑުވެރިކަމާ ބެހޭ މިނިސްޓްރީން މިއަދު ބުނީ އެ ހަރަކާތް ފައްޓަވައިދެއްވީ މިނިސްޓަރު ޑރ. މަރިޔަމް މާރިޔާ ކަމަށެވެ.
ކާނާގެ ޔަގީންކަން އިތުރުކުރުމުގެ ޕްރޮގްރާމްގެ ދަށުން ހަނިމާދޫގައި ބަނބުކެޔޮ ގަސް ހެއްދުމަށްޓަކައި މިނިސްޓްރީން އެ ރަށު ކައުންސިލަށް 50 ގަސް ހަދިޔާކޮށްފައިވާ ކަމަށް މިނިސްޓްރީން ބުންޏެވެ.
Advertisement
މިނިސްޓްރީން ބުނީ އެ ގަސްތައް އިންދުމުގެ މަސައްކަތް މިއަދު ފަށާފައިވާއިރު، އެ ހަރަކާތުގައި މިނިސްޓަރު ބައިވެރިވެވަޑައިނަވައި، ބަނބުކެޔޮ ގަހެއް އިންދަވައިދެއްވި ކަމަށެވެ.
އެ ހަރަކާތުގައި މިނިސްޓަރުގެ އަރިހުގައި މިނިސްޓްރީގެ ބައެއް އިސްވެރިން ބައިވެރިވެވަޑައިނެވި އެވެ. އަދި ހަނިމާދޫ ކައުންސިލްގެ އިސްވެރިންނާއި މުވައްޒަފުން ވެސް ވަނީ ބައިވެރިވެވަޑައިގެންނެވި އެވެ.
ރާއްޖޭގައި ކާނާގެ ޔަގީންކަން (ފުޑް ސެކިޔުރިޓީ) އިތުރުކުރުމަކީ ރައީސް ޑރ. މުހައްމަދު މުއިއްޒުގެ ވައުދެކެވެ.
ރައީސްގެ އެ ވައުދު ފުއްދުމަށް ދަނޑުވެރިކަމާ ބެހޭ މިނިސްޓްރީން އަންނަނީ ރާއްޖޭގައި ކާނާގެ ޔަގީންކަން އިތުރުކުރުމަށް ކުރެވެންހުރި މަސައްކަތްތައް ރަށްރަށުގެ ކައުންސިލްތަކާއި ކަމާއިގުޅުންހުރި އެހެން އިދާރާތަކާ ގުޅިގެން ކުރަމުންނެވެ.
