އުއްތަމަ ފަނޑިޔާރުގެ ރިޓަޔާމަންޓް އެލެވެންސް ބޮޑުކުރަން ފިނޭންސްގެ ލަފާ ހޯދަން ރައްޔިތުންގެ މަޖިލީހުގެ މާލިއްޔަތު ކޮމިޓީން މިއަދު އަންގައިފި އެވެ.
ޝަރަފުވެރިކަމާއެކު މަގާމުން ރިޓަޔާކުރައްވާ އުއްތަމަ ފަނޑިޔާރަށް ގަނޑުކޮށް 500,000ރ. އާއި މަހަކު 70،000ރ. އެލަވަންސެއް ލިބޭ ގޮތަށް ފަނޑިޔާރުންގެ ރިޓަޔާމަންޓް ގަވާއިދު އިސްލާހުކުރުމުގެ ކުރިން ފިނޭންސް މިނިސްޓްރީ އާއި ޕޭ-ކޮމިޝަންގެ ލަފާ ހޯދަން މާލިއްޔަތު ކޮމިޓީން ވަނީ އަންގައިފަ އެވެ.
ފަނޑިޔާރުންގެ ރިޓަޔާމަންޓާ ގުޅިގެން މިހާރު އަމަލުކުރަމުން އަންނަ ގަވާއިދުގައި، ރިޓަޔާކުރައްވާ އުއްތަމަ ފަނޑިޔާރަށް ވަކި ހާއްސަ އިނާޔަތްތަކެއް ކަނޑައަޅާފައެއް ނޯވެ އެވެ. އެ ގަވާއިދުގައިވާ ގޮތުން އުމުރުން 55 އަހަރުވުމުން އަމިއްލައަށް އެދިގެން ވަޒީފާއިން ވަކިވާން ހުށަހަޅާ ފަނޑިޔާރުންގެ ތެރެއިން ރިޓަޔާކުރެވޭ ފަނޑިޔާރުންނަށް އިނާޔަތް ދެވޭނީ 10 އަހަރު ހިދުމަތް ކުރައްވާފައިވާ ނަމަ އެވެ.
ނަމަވެސް، ޖުޑީޝަލް ސާވިސް ކޮމިޝަން (ޖޭއެސްސީ) އިން މިހާރު ނިންމާފައި ވަނީ އެ ގަވާއިދު އިސްލާހުކޮށް، އުއްތަމަ ފަނޑިޔާރުންނަށް ހާއްސަ އެލަވެންސެއް ދިނުމަށެވެ.
ޖޭއެސްސީން ނިންމާފައި ވަނީ ރިޓަޔާ ކުރައްވާ އުއްތަމަ ފަނޑިޔާރަށް ދަތުރުފަތުރުގެ އެލަވަންސާއި ލިވިން އެލެވެންސްއެއްގެ ގޮތުގައި މަހަކު 70،000 ރުފިޔާ ދޭށެވެ. އަދި ރިޓަޔަމަންޓް އެލަވަންސްގެ ގޮތުގައި ފަނޑިޔާރުކަމުގެ މުއްދަތުގެ އިތުރުން ދައުލަތަށް ހިދުމަތް ކުރި މުއްދަތު ހިމަނަން ވެސް ވަނީ ހުށަހަޅައިފަ އެވެ.
އެކަމާ ގުޅިގެން މަޖިލީހުގެ ލަފާ ހޯދުމަށް ޖޭއެސްސީން މާލިއްޔަތު ކޮމިޓީއަށް ފޮނުވާފައި ވާތީ، އެކަން ދިރާސާކޮށް އެ ކޮމިޓީން މިއަދު ފާސްކުރީ އެފަދަ އެލަވަންސެއް ދިނުމަކީ ދައުލަތުން އިތުރަށް ކުރަން ޖެހޭ ހަރަދަކަށް ވާތީ އެކަމާ ގުޅިގެން ފިނޭންސް މިނިސްޓްރީގެ ލަފާ ހޯދައި އެ ލަފާގެ މަތިން ޕޭ-ކޮމިޝަނުން ނިންމާ ގޮތެއްގެ މަތިން ގަވައިދު އިސްލާހުކުރާށެވެ.
