މޯލްޑިވްސް ބްރޯޑްކާސްޓިން ކޮމިޝަން (ބްރޯޑްކޮމް) ގެ މެންބަރުކަމަށް ގދ. ތިނަދޫ ޒަމްއަތު އަހުމަދު ވަހީދު ޢައްޔަންކުރުމަށް ރައްޔިތުންގެ މަޖިލީހުން މިއަދު ފާސްކޮށްފިއެވެ.
އެ މަޤާމު ހުސްވެފައިވަނީ އެ ކޮމިޝަންގެ މެންބަރު އާމިނަތު އަމީނާގެ މެންބަރުކަމުގެ މުއްދަތު އިއްޔެގެ ނިޔަލަށް ހަމަވާތީއެވެ.
އެ މަޤާމަށް މިދިޔަ މަހުގެ 12 ގައި ރައީސް ފޮނުއްވި ލިސްޓުގެ އެންމެ ކުރީގައިވަނީ ވެސް ޒަމްއަތެވެ. އަދި ރައީސް ފޮނުއްވި ނަންތައް ދިރާސާކުރުމަށްފަހު މަޖިލީހުގެ މިނިވަން މުއައްސަސާތަކާ ބެހޭ ކޮމިޓީންވެސް އެންމެ މަތިން މާކްސް ލިބިފައިވަނީ ޒަމްއަތަށެވެ.
ޒަމްޢަތަކީ 2005 ވަނަ އަހަރުން ފެށިގެން ނޫސްވެރިއެއްގެ ގޮތުގައި މަސައްކަތްކުރާ ފަރާތެކެވެ. އެންމެ ފުރަތަމަ ޒަމްޢަތު،މަސައްކަތް ފެށީ ދިވެހިރާއްޖޭގެ އަޑުގައެވެ.
މާކްސް ލިސްޓުގައި ހިމެނޭ މީހުންނަށް ރުހުން ދިނުމާއި ގުޅޭ ގޮތުން މިއަދުގެ މަޖިލިސް ޖަލްސާގައި ވޯޓަށް އަހާފައިވާއިރު، އެ މަޤާމަށް ޒަމްއަތު ޢައްޔަންކުރުމަށް ފާސްވެފައިވަނީ ވޯޓުގައި ބައިވެރިވެވަޑައިގެންނެވި 54 މެންބަރުންގެ އިއްތިފާޤުންނެވެ.
ޒަމްއަތަކީ އިސްލާމިކް މިނިސްޓްރީގެ ޗީފް އެގްޒެކެޓިވް އޮފިސަރުކަމުގެ މަޤާމު ފުރުއްވަމުންދާ ބޭފުޅެކެވެ. ޕަބްލިކް ސާވިސް މީޑިއާގައި ވެސް ގިނަ އަހަރުތަކެއް ވަންދެން ނޫސްވެރިއެއްގެ މަސައްކަތް ކުރައްވާފައިވާއިރު، ބައެއް އަމިއްލަ މީޑިއާތަކުގައި ވެސް އޭނާ ވަނީ މަސައްކަތް ކުރެއްވާފައެވެ. މީގެ އިތުރުން އޭނާއަކީ ނޫސްވެރިކަމުގެ ދާއިރާއިން މާސްޓާސް ވެސް ހާސިލުކުރައްވާފައިވާ ބޭފުޅެކެވެ.
ބްރޯޑްކޮމްގެ މެންބަރުކަމަށް މިދިޔަ މަހު ވެސް ވަނީ ބޭފުޅަކު ޢައްޔަންކުރައްވާފައެވެ. އެ މަޤާމު ހުސްވެފައިވަނީ މެންބަރެއްގެ ގޮތުގައި ހުންނެވި މުހައްމަދު ފަޒީން އިސްތިއުފާ ދެއްވުމާއި ގުޅިގެންނެވެ. އެ ނަންތައް ދިރާސާކުރުމަށްފަހު 75 ޕަސެންޓުން މަތިން މާކްސް ލިބުނު 5 ބޭފުޅުންގެ ތެރޭގައިވެސް ޒަމްއަތު ހިމެނިވަޑައިގަންނަވައެވެ.
އެފަހަރު އެންމެ މަތިން މާކްސް ލިބުނު ޒީނާ ޒާހިރު އެ މަޤާމަށް އައްޔަންކުރުމަށް މަޖިލީހުގެ މިނިވަން މުއައްސަސާތަކާ ބެހޭ ކޮމިޓީން ފާސްކުރި ނަމަވެސް ކޮމިޓީގެ ރިޕޯޓުގައި ހިމެނޭ ފަސް މެންބަރުންގެ ނަންތަކަށް މަޖިލީހުގެ ތަޅުމުގައި ވަކި ވަކިން ވޯޓަށް އެހުމުން ގިނަ މެންބަރުން ވޯޓު ދެއްވާފައިވަނީ ޒީނާ އާއި ޝިޔާނާ އަދި ޝިމްލާ އައްޔަންކުރަން ނުފެންނަ ކަމަށެވެ.
ބްރޯޑްކޮމްގެ މެންބަރުކަމަށް މޫސާ ރިޟްވާން އައްޔަންކުރުމަށް ފާސްކޮށްފައިވަނީ 70 މެންބަރުންގެ އިއްތިފާގުންނެވެ. އެއާއެކު އެ ލިސްޓުގައި ދެން އިން ޒަމްއަތުގެ ނަމަށް ވޯޓަށް އަހާފައެއް ނުވެއެވެ.
