މިއަހަރު ފާހަގަކުރާ ދިވެހިރާއްޖޭގެ 60 ވަނަ މިނިވަން ދުވަސް ކުލަގަދަކޮށް ފާހަގަކުރުމަށް ގިނަ ހަރަކާތްތަކެއް ކުރިއަށްގެންދިއުމަށް ނިންމާފައިވާކަމަށް ދިވެހި ބަހާއި ސަޤާފަތާއި ތަރިކައާއިބެހޭ ވަޒީރު އާދަމް ނަސީރު އިބްރާހީމް މިއަދު ވިދާޅުވެއްޖެއެވެ.
ވަޒީރު އާދަމް ނަސީރު ވިދާޅުވީ، 60 ވަނަ މިނިވަން ދުވަސް ރަސްމީކޮށް ފާހަގަކުރުމަށް އެ ވުޒާރާއިން މުހިއްމު މަސައްކަތްތަކެއް ކުރަމުން ގެންދާ ކަމަށެވެ. މިގޮތުން މިނިވަން ދުވަސް ކުލަގަދަކޮށް ފާހަގަކުރުމަށްޓަކައި ތަފާތު ހަރަކާތްތައް މިފަހަރު ކުރިއަށްގެންދަން ހަމަޖެހިފައިވާކަން ވަޒީރު ފާހަގަކުރެއްވިއެވެ.
"އެހެން އަހަރުތަކެކޭވެސް އެއްގޮތަށް ޤައުމީ ދިފާއީ ބަރުން ކުރިއަށްގެންދާ ހަރަކާތްތަކާއި މާލެ ސަރަޙައްދުގައި ކުރިއަށްގެންދާ ފުޅަނދުބުރެއްވެސް އޮންނާނެ. އޭގެއިތުރަށް މާލެއާއި ހުޅުމާލޭގައި އިތުރު ހަރަކާތްތަކެއް ބޭއްވުމަށް ވަނީ ރޭވިފައި." ވަޒީރު ވިދާޅުވިއެވެ.
މީގެއިތުރުން، ޓީވީ އަދި ރޭޑިއޯ މެދުވެރިކޮށް ހޭލުންތެރިކަމުގެ ޕްރޮގްރާމްތަކާއި ޝައުޤުވެރި ޕްރޮގްރާމްތައް އާންމުކުރުމުގެ މަސައްކަތްވެސް މިހާރު ކުރިއަށްދާކަމަށް ވަޒީރު ވިދާޅުވިއެވެ.
ވަޒީރު އިތުރަށް ވިދާޅުވީ، މިފަދަ ދުވަސްތައް ރަސްމީކޮށް ފާހަގަކުރުމަކީ މުހިއްމު ކަމެއްކަމަށާއި، މި ކަންކަން އެއް ޖީލުން އަނެއް ޖީލަށް ފޯރުކޮށްދިނުމަކީ އެހާމެ މުހިންމު ހަނދާންތަކެއް ކަމަށެވެ.
"އެބައެއްގެ ތާރީޚް، އެބައެއްގެ ތަރިކަ ނުވަތަ އެބައެއްގެ އަސަރުތައް ޖީލުތަކަށް ވާސިލުވާންޖެހޭ." ވަޒީރު ވިދާޅުވިއެވެ.
60 ވަނަ މިނިވަން ދުވަހު ބޭނުން ކުރާނެ ލޯގޯ ތައްޔާރުކޮށްދޭނެ ފަރާތެއް ހޯދުމަށް ދިވެހިބަހާއި ސަޤާފަތާއި ތަރިކައާ ބެހޭ ވުޒާރާއިން ވަނީ ހުޅުވާލާފައެވެ.
ކޮންމެ އަހަރެއްގެވެސް ޖުލައި މަހުގެ 26 ވަނަ ދުވަސް ދިވެހިރާއްޖޭގެ މިނިވަން ދުވަހުގެ ގޮތުގައި ފާހަގަކުރެވެއެވެ. ނަމަވެސް، މިދިޔަ އަހަރު ދައުލަތުގެ ޚަރަދުތައް ކުޑަކުރުމަށް އެޅި ފިޔަވަޅުތަކުގެ ތެރެއިން މިނިވަން ދުވަހު ފުޅަނދުބުރާއި، ކުޅިވަރުތަކާއި ރިޝެޕްޝަން ފަދަ ކަންކަން ބޭއްވިފައި ނުވާކަން ފާހަގަކުރެވެއެވެ. އެހެންނަމަވެސް، މިނިވަން ދުވަހުގެ ޚާއްޞަ ޖަލްސާ އެ އަހަރުވެސް ވަނީ ބާއްވާފައެވެ.
