މިއަހަރުގެ މިނިވަން ދުވަހާ ގުޅިގެން ފަންނާއި ސަގާފަތާއި ތަރިކައާ ބެހޭ ވުޒާރާއިން ކުރިއަށްގެންދާ ހާއްސަ ހަރަކާތެއްކަމަށްވާ "މިނިވަން ރަން" ރަސްމީކޮށް އިފްތިތާހްކޮށްފިއެވެ.
މި ހަރަކާތް އިފްތިތާހްކުރުމަށްޓަކައި މިއަދު ހަވީރު ފަންނާއި ސަގާފަތާއި ތަރިކައާ ބެހޭ ވުޒާރާގެ އިސްވަރު ހޯލުގައި ބޭއްވި ހާއްސަ ހަފުލާ ޝަރަފުވެރިކޮށްދެއްވީ އެ ވުޒާރާގެ ވަޒީރު ހީނާ ވަލީދު އެވެ.
ޖުލައި މަހުގެ 27 ވާ ހޮނިހިރު ދުވަހުގެ ހަވީރު ހުޅުމާލޭގައި ބޭއްވުމަށް ހަމަޖެހިފައިވާ މި ދުވުން އިންތިޒާމުކޮށް ކުރިއަށްގެންދިއުމަށްޓަކައި، މި ހަފުލާގައި ވަނީ "ވީރަން މޯލްޑިވްސް" އާއެކު ތިން އަހަރު ދުވަހުގެ އެއްބަސްވުމެއްގައި ސޮއިކޮށްފައެވެ. މި އެއްބަސްވުމުގައި ވުޒާރާގެ ފަރާތުން ސޮއިކުރެއްވީ ސްޓޭޓް މިނިސްޓަރ އަހްމަދު މުނާޒްއެވެ. ވީރަން މޯލްޑިވްސްގެ ފަރާތުން ސޮއިކުރެއްވީ އެ ޖަމްޢިއްޔާގެ މެނޭޖަރ ހައްވާ ނީލާ އެވެ.
Advertisement
"މިނިވަން ރަން" އަކީ ސަރުކާރުގެ މުއައްސަސާތަކާއި، ކުލަބް ޖަމްއިއްޔާތަކުގެ އިތުރުން އާންމު ފަރުދުންނަށް ވެސް ބައިވެރިވެވޭ ގޮތަށް ހުޅުވާލައިގެން ބާއްވާ ހަރަކާތެކެވެ. މި ހަރަކާތުގެ މައިގަނޑު މަގްސަދަކީ މިނިވަން ދުވަހުގެ ރޫހާއި ގައުމީ އެކުވެރިކަން އާލާކުރުމާއި، ދުޅަހެޔޮ ސިއްހަތެއްގައި ހުރުމަށް ބާރުއަޅައި، ހަރަކާތްތެރި ދިރިއުޅުމަކަށް ރައްޔިތުން އަހުލުވެރިކުރުވުމެވެ.
މި ރަސްމިއްޔާތުގައި ވަނީ "ވީރަން އެޕް" ވެސް ތައާރަފުކޮށްފައެވެ. މި އެޕް މެދުވެރިކޮށް މިނިވަން ރަންގައި ބައިވެރިވާން ބޭނުންވާ ފަރާތްތަކަށް މިހާރުން ފެށިގެން ރަޖިސްޓްރީ ކުރުމުގެ ފުރުސަތު ވަނީ ހުޅުވާލާފައެވެ.
މި ހަރަކާތް އިންތިޒާމުކުރާ ވީރަން މޯލްޑިވްސް އަކީ ރާއްޖޭގެ އެކި ސަރަހައްދުތަކުގައި ކާމިޔާބުކަމާއެކު ދުވުމުގެ ގިނަ ހަރަކާތްތަކެއް ހިންގަމުން އަންނަ، އަދި ދުޅަހެޔޮ ދިރިއުޅުމަކަށް ބާރުއެޅުމުގެ ގޮތުން އިޖްތިމާއީ އަދި ވާދަވެރި ރޭސްތައް އިންތިޒާމުކުރާ ތަޖުރިބާކާރު ޖަމްއިއްޔާއެކެވެ.
