މާލޭގައި ހުންނަ ތާރީހީ ބިނާއެއް ކަމަށްވާ އުސްގެކޮޅު، އިމާސިވް މިއުޒިއަމެއްގެ ގޮތުގައި ތަރައްގީ ކުރުމުގެ އަމަލީ މަސައްކަތް ފަހި ދިރިއުޅުން ކޯޕަރޭޝަން (އެފްޑީސީ) އިން ފަށައިފި އެވެ.
މި މަޝްރޫއަކީ މިނިސްޓްރީ އޮފް ދިވެހި ބަހާއި ސަގާފަތާއި ތަރިކައާ ބެހޭ މިނިސްޓްރީން އެފްޑީސީއާ ހަވާލުކޮށްގެން ކުރިއަށްގެންދާ މަސައްކަތެކެވެ.
އުސްގެކޮޅު އިމާސިވް މިއުޒިއަމެއްގެ ގޮތުގައި ތަރައްގީ ކުރުމުގެ މަޝްރޫއަކީ، ރައީސުލްޖުމްހޫރިއްޔާ ޑރ. މުހައްމަދު މުއިއްޒު ދިވެހި ތަރިކަ އިޔާދަކުރުމާއި، ދިވެހި ތަރިކައިގެ ދާއިރާ ތަރައްގީކުރުމަށް ގެންގުޅުއްވާ ހާއްސަ ސިޔާސަތުގެ ދަށުން ކުރިއަށްގެންދާ މަސައްކަތެކެވެ. މި މަޝްރޫއުގެ މައިގަނޑު މަގުސަދަކީ ދިވެހީންނަށް އޭގެ ހަގީގީ މާނައިގައި ތަރިކަ ރައްދުކޮށް ދެއްވުމެވެ.
Advertisement
މި މަޝްރޫއާ ގުޅޭގޮތުން ވާހަކަ ދައްކަވަމުން ތަރިކައާ ބެހޭ މިނިސްޓަރު އާދަމް ނަސީރު އިބްރާހިމް ވިދާޅުވީ، މިއީ ރާއްޖޭގެ ތަރިކައިގެ ދާއިރާއަށް އިންގިލާބީ ބަދަލެއް ގެންނަވަން ރައީސުލްޖުމްހޫރިއްޔާ ފައްޓަވާފައިވާ މަސައްކަތުގެ ތެރެއިން ހާއްސަ މަސައްކަތެއް ކަމަށެވެ. އަދި އުސްގެކޮޅު ތަރައްގީ ކުރެވޭނީ ތަރިކައިގެ ދާއިރާއާ ގުޅުވައި ރައީސް އިއުލާންކޮށްފައިވާ ހާއްސަ ސިޔާސަތުތަކާ އެއްގޮތަށް ކަމަށްވެސް މިނިސްޓަރު ފާހަގަކުރެއްވި އެވެ.
މި މިއުޒިއަމް ތަރައްގީ ކުރަނީ ހުރިހާ އުމުރު ފުރާއަކަށްވެސް ބޭނުންކުރެވޭނެ ގޮތަށް، އެންމެ ޒަމާނީ ވަސީލަތްތަކާ އެކުގަ އެވެ. މިއީ ރާއްޖޭގައި މިފަދަ ގޮތަކަށް ތަރައްގީކުރެވޭ ފުރަތަމަ އިމާސިވް މިއުޒިއަމަށް ވެގެންދާނެ އެވެ.
އުސްގެކޮޅަކީ 1903 ވަނަ އަހަރު ރާއްޖޭގެ ރަސްކަން ކުރެއްވި އަލްސުލްތާނު މުހައްމަދު އިމާދުއްދީން ހަވަނަ މިސްރުން ކައިވެނި ބައްލަވައިގެންނެވި އަނބިކަނބަލުންނަށް ހެއްދެވި ތަނެކެވެ. ނަމަވެސް ގިނަ ދުވަސްނުވެ އެ ރަސްކަން ނިމުމަކަށް އައީ އެވެ. ފަހުން އެ ގެކޮޅު ބޭނުންކުރީ ރަސްކަލުންގެ އެކިއެކި ބޭނުންތަކަށެވެ. އެންމެ ފަހުން ވެސް އެތަނުގައި ހިންގީ ގައުމީ ދާރުލްއާސާރެވެ.
ކުރީގެ ރައީސް އަބްދުﷲ ޔާމިންގެ ވެރިކަމުގައި ސަލްޓަން ޕާކް ޒަމާނީ ފެންވަރަށް ތަރައްގީކޮށް އުސްގެކޮޅުގައި ކެފޭއެއް ހަދަން 13 އަހަރަށް، އަމިއްލަ ކުންފުންޏަކަށް ދިނުމަށް އެއްބަސްވުމެއް ވެސް ހެދި އެވެ.
އެ ކުންފުންޏަށް އެތަން ކުއްޔަށް ދިނީ ޑިޖިޓަލް ލައިބްރަރީއަކާ އެކު ކެފޭއެއް ހިންގުމަށެވެ. އެއީ އާޓިފިޝަލް ބީޗްގައި ބްލޫބޭ ރެސްޓޯރެންޓް ހިންގި ބިން ހުސްކުރަން އަންގައި އޭގެ ބަދަލުގައި ދިން ތަނެކެވެ. ނަމަވެސް މިދިޔަ ސަރުކާރުން އައިސް އެ އެއްބަސްވުން ބާތިލް ކުރީ އެވެ.
