ހުޅުމާލެ ފޭސް 2 ގައި ތަރައްގީކޮށްފައިވާ ސޯޝަލް ހައުސިންގ މަޝްރޫއުތަކުގެ އާންމު ސަރަހައްދުތަކުން މިހާތަނަށް 5،000 އަށްވުރެ ގިނަ ޓަނުގެ ކުނި އުކާލާފައިވާކަން ފަހި ދިރިއުޅުން ކޯޕަރޭޝަން (އެފްޑީސީ) އިން ހާމަކޮށްފިއެވެ.
ސަރުކާރުގެ ސައްތަ އިންސައްތަ ހިއްސާ އޮންނަ އެފްޑީސީން އިއްޔެ އާންމުކުރި ތަފާސްހިސާބުތަކުން ދައްކާގޮތުގައި، 2025 އިން 2026 އަށް ހިނގި މުއްދަތުގެ ތެރޭގައި ޖުމްލަ 5،040 ޓަނުގެ ކުނި ވަނީ އެ ސަރަހައްދުތަކުން ނަގައި ސާފުކޮށްފައެވެ. މީގެ ތެރޭގައި ހިމެނެނީ 3,178 ޓަނުގެ ކުނި އަދި 1,862 ޓަނުގެ ކުންޏެވެ.
ކުނި މެނޭޖްކުރުމަށް ކުރާ މަސައްކަތްތަކަށް ބޮޑު ހޭދައެއް ކުރަމުންދާކަން ފާހަގަކުރަމުން އެފްޑީސީން ބުނީ، މިހާތަނަށް ކުނި އުކާލުމާއި، ވޭސްޓް މެނޭޖްމަންޓް ކޯޕަރޭޝަން (ވެމްކޯ) އާ ގުޅިގެން ހިންގާ އޮޕަރޭޝަންތަކަށް 13,481,557.15 (ތޭރަ މިލިއަން ހަތަރުލައްކަ އަށްޑިހަ އެއްހާސް ފަސްސަތޭކަ ފަންސާސް ހަތް) ރުފިޔާ ހޭދަވެފައިވާ ކަމަށެވެ.
Advertisement
ހުޅުމާލެ ފޭސް 2 ގައި ހުންނަ "އަމާން" ހައުސިންގ ޔުނިޓްތަކުގެ ކައިރީގައި ހުންނަ އާންމު ސަރަހައްދުތަކަށް ގަވާއިދާ ހިލާފަށް ކުނި އެޅުމުގެ މައްސަލަ ވަނީ ބޮޑުވެފައެވެ. ހާއްސަކޮށް ފްލެޓްތަކަށް މީހުން ބަދަލުވުމުގެ މަރުހަލާގައި ގިނަ އަދަދެއްގެ ފޮށިގަނޑާއި ބޮޑެތި މުދަލުގެ ކުނި އާންމު ސަރަހައްދުތަކަށް އުކާލުމުގެ ސަބަބުން ނުބައިވަސް ދުވުމާއި ބަލިމަޑުކަން ފެތުރުމުގެ ބިރު ވަނީ އުފެދިފައެވެ.
މިކަމާ ގުޅިގެން އެފްޑީސީގެ މެނޭޖިންގ ޑައިރެކްޓަރު ހަމްދާން ޝަކީލް މީގެ ކުރިން ވިދާޅުވެފައިވަނީ، ފްލެޓްތަކަށް މީހުން ބަދަލުވާއިރު އުފެދޭ ބޮޑެތި ކުނި އުކާލުމަކީ އެމީހެއްގެ އަމިއްލަ ޒިންމާއެއް ކަމަށެވެ. އަދި ގަވާއިދާ ހިލާފަށް ކުނި އަޅާ ފަރާތްތައް ޖޫރިމަނާ ކުރާނެ ކަމަށާއި، ތަކުރާރުކޮށް ކުނި އަޅާނަމަ ފްލެޓް އެއްބަސްވުން ބާތިލްކުރުމާ ހަމައަށް ފިޔަވަޅު އަޅާނެ ކަމުގެ އިންޒާރުވެސް އެ ކޯޕަރޭޝަނުން ވަނީ ދީފައެވެ.
އެފްޑީސީން ބުނީ މި މަސައްކަތުގެ މަގްސަދަކީ ސާފުތާހިރު އަދި ރައްކާތެރި ދިރިއުޅުމުގެ މާހައުލެއް ރައްޔިތުންނަށް ފޯރުކޮށްދިނުން ކަމަށެވެ. އަދި ކުނި މެނޭޖްކުރުމަކީ ހަމައެކަނި ކުންފުނީގެ ޒިންމާއެއް ނޫން ކަމަށާއި، އެއީ އެ ސަރަހައްދުގައި ދިރިއުޅޭ ހުރިހާ ރައްޔިތުންގެވެސް ފަރުދީ ޒިންމާއެއްކަން އެ ކޯޕަރޭޝަނުން ހަނދާންކޮށްދެއެވެ.
ދިވެހިރާއްޖޭގެ ބިމުގެ ދަތިކަން ހުރި ގޮތުންނާއި ތިމާވެށި ރައްކާތެރިކުރުމުގެ މުހިންމުކަން ބޮޑުވެފައިވާ މި ދަނޑިވަޅުގައި، މިފަދަ ބޮޑެތި ހައުސިންގ މަޝްރޫޢުތަކުގައި ކުނި މެނޭޖްކުރުމަކީ ދެމެހެއްޓެނިވި ތަރައްގީއަށް ކޮންމެހެން ބޭނުންތެރި ކަމެކެވެ.
