އެފްޑީސީން ހުޅުމާލޭގައި އިމާރާތްކޮށްފައިވާ ފަހި ފްލެޓުތަކުގެ ޖަންކްޝަންތަކުން ނަޖިސް ލީކުވަނީ ނެޕީ އާއި ކޮންކްރީޓް ކުނޑި ފަދަ އެކި ކަހަލަ ކުނި އަޅުމުގެ ސަބަބުން، ޖަންކްޝަންތައް ބެނދިގެން ކަމަށް އެ ކޯޕަރޭޝަނުން ބުނެފި އެވެ.

ޖަންކްޝަނުން ނަޖިސް ލީކުވާކަން ފާހަނގަ ކުރެވިފައިވަނީ އެ ފްލެޓުތަކުގެ 11، 12، 15 އަދި 16 ވަނަ ޓަވަރުންނެވެ. އަދި މިދިޔަ ފެބްރުއަރީ މަހުވެސް އެ ޖަންކްޝަންތަކުން ނަޖިސް ލީކުވާ މައްސަލަ ވަނީ ފެންމަތިވި އެވެ. އެފްޑީސީން ވަނީ އޭރު އެ މައްސަލަ ހައްލުކޮށްފަ އެވެ. ނަމަވެސް ސޯޝަލް މީޑިއާގައި އަނެއްކާވެސް ދައުރުވަމުން އަންނަ ވީޑިއޯއެއްގައި ފަހި ޓަވަރެއްގެ ޖަންކްޝަނުން މުޅި ސަރަހައްދަށް ނަޖިހާއެކު ފެންގަނޑު ލީކުވެފާ އޮތް މަންޒަރު ފެނެއެވެ. އަދި ނަޖިސް ފެންގަނޑު މަގާ ހިސާބަށް ފެތުރިފައި އޮތްކަން އެ ވީޑިއޯއިން ފެންނެވެ.

އެކަމާ ގުޅިގެން އެފްޑީސީގެ މެނޭޖިން ޑިރެކްޓަރު ހަމްދާން ޝަކީލް ވިދާޅުވީ އެފްޑީސީން ވަނީ ވޭތުވެ ދިޔަ ހަތަރު ހަފްތާގެ ތެރޭގައި ތިން ފަހަރަށް ހައްލުކޮށްފައި ކަމަށެވެ. ނަމަވެސް ކިތަންމެ ގިނައިން އެ ކޯޕަރޭޝަނުން މައްސަލައަށް ހައްލު ހޯދި ކަމުގައި ވީނަމަވެސް އެ ތަަންތަނަށް ކުނިއަޅާ ހިނދެގައި ޖަންކްޝަން ބުލޮކްވާނެ ކަމަށެވެ. އަދި އެ ބޭފުޅާ ވިދާޅުވީ އެ މައްސަލަ ދިމާވަނީ ޕެޑާއި ނެޕީ އާއި ކޮންކްރީޓު ކުނޑި ފަދަ އެކި އެއްޗެހި އަޅާތީ ކަމަށެވެ.

އެކަމާ ގުޅިގެން ހަމްދާން އިތުރަށް ވިދާޅުވެފައި ވަނީ އެންމެ ފަހުން ޖަންކްޝަން ސާފުކުރި އިރުވެސް އެތަނުން 28 ނެޕީ ނަގާފައިވާ ކަމަށެވެ. އަދި ފަހި ފްލެޓުތައް ހަވާލުކުރިއިރު،އެ ކޯޕަރޭޝަނުން ފްލެޓުތަކުގެ ވެރިންނަށް ދިން އޭސީ ޕްރޮވިޝަންސް ކަވަރުކޮށްފައި ހުންނާނީ ޕީޔޫ ފޯމުން ކަމަށެވެ. ނަމަވެސް އެ ފޯމުތައް ނަގައި އުކާލުމުގެ ބަދަލުގައި ބައެއް ފަރާތަކުން ފާހާނާ ތެރެއަށް ފްލަޝްކޮށްފައި ކަމަށް އެބޭފުޅާ ވިދާޅުވި އެވެ. އެއީ ޖަންކްޝަން ބްލޮކްވާން ދިމާވާ އެންމެ ބޮޑު އެއް ސަބަބުކަމަށް ހަމްދާން ފާހަނގަ ކުރިއެވެ.

ފަހި ފްލެޓްގައި މީހުން ދިރިއުޅެން ފެށިތާ އަދި ގިނަ ދުވަސްތަކެއް ނުވާ އިރު، އެ ފްލެޓްތަކުގައި ދިރިއުޅޭ ފަރާތަކުން ކުނި ނައްތާލުން ފަދަ ކަންކަމަށް ފަރުވާ ކުޑަ ކުރާކަން ފާހަނގަ ކުރެވެ އެވެ. އަދި އެގޮތަށް އަމަލު ކުރުމުގެ ސަބަބުން އެ ފްލެޓްތަކުގައި ދިރިއުޅޭ އެންމެނަށާއި އެފްޑީސީއަށް ގިނަ ތަކުލީފުތަކަކާއި ކުރިމަތިލާން ޖެހެއެވެ.