ގިނަ ބަޔަކަށް ބޯހިޔާވަހިކަމުގެ ފުރުސަތު ހޯދައިދިނަމަށް، ފުލެޓާއި ގޯއްޗަށް ފޯމު ހުށަހެޅުމުގެ މުއްދަތު މިއަދު އިތުރުކުރުމަކީ އެކަމުގެ ސަބަބުން ވަރަށް ގިނަ ބަޔަކަށް ފައިދާ ލިބޭނެ ކަމެއް ކަމެއް ކަމަށް ހުޅުމާލެ މެދު ދާއިރާގެ މެންބަރު ޝަޒީމް ވިދާޅުވެއްޖެއެވެ.

"އަޟްހާ އީދު ބަންދާ ގުޅިގެން ސަރުކާރު ބަންދުވެފައިވާތީ ބޯހިޔާވަހިކަމަށް ފޯމު ފުރަން ބޭނުންވާ ފަރާތްތަކަށް ލިޔެކިޔުންތައް ހަމަކުރުމުގައި ދިމާވާ ދަތިތައް ހައްލުކުރުމަށް ވަގުތު ދިނުމަކީ ގިނަ ބަޔަކަށް ފައިދާ ވާނެ ކަމެއް. މީ ވަރަށް ރަނގަޅު ކަމެއް" އެކްސް ގައި ޝަޒީމް ވިދާޅުވިއެވެ.

ކުރިން ގޯއްޗާއި ފުލެޓަށް ކުރިމަތިލާން ދިން ސުންގަޑި ހަމަވާނީ މި މަހުގެ ނިޔަލަށެވެ.

މިއަދު ހައުސިން މިނިސްޓްރީން ކުރި އިއުލާނެއްގައި ބުނީ އަންނަ މަހު 15 23:59ގެ ނިޔަލަށް އެ މުއްދަތު އިތުރުކޮށްދީފައިވާ ކަމަށެވެ.

އެ އިއުލާނުގައި ބުނީ މުއްދަތު އިތުރުކުރީ، ގޯއްޗާއި ފުލެޓަށް ކުރިމަތިލާން މުއްދަތު އިތުރުކޮށްދިނީ، އަޟްހާ އީދު ބަންދާ ގުޅިގެން ސަރުކާރު ބަންދުވެފައިވާތީ ފޯމު ފުރަން ބޭނުންވާ ލިޔެކިޔުންތައް ހަމަކުރުމުގައި ދަތިތައް ދިމާވާ ކަމަށް ބުނެ، ޝަކުވާ ހުށަހަޅަމުންދާތީ ކަމަށެވެ.

ސަރުކާރުގެ "ބޯހިޔާވަހިކަން އެންމެންނަށް" ސިޔާސަތުގެ ދަށުން ބޯހިޔާވަހިކަމުގެ ފުރަތަމަ ސްކީމަށް ހުށަހެޅުމުގެ ފުރުސަތު ހައުސިން މިނިސްޓްރީއިން ހުޅުވާލީ މި އަހަރުގެ ޖަނަވަރީ މަހުގެ 18 ވަނަ ދުވަހެވެ. އެ ޕްރޮގްރާމުގެ ދަށުން 7،900 ފްލެޓާއި 15،000 ގޯތި ދޫކުރަން ސަރުކާރުން ވަނީ ނިންމާފައެވެ.

އޭގެ ތެރެއިން 4،000 ފްލެޓު ދިނުމަށް ހަމަޖެހިފައި ވަނީ މާލޭގެ ރަށްވެހިންނަށެވެ. އަދި، މާލޭގައި ރަށްވެހިވެފައިނުވާ މާލޭގައި ދިރިއުޅެމުން އަންނަ މީހުންނަށް 1،500 ޕްލެޓު ދިނުމަށް ނިންމާފައިވާއިރު ބާކީ 2،400 ފްލެޓު ދިނުމަށް ނިންމާފައިވަނީ ސަރުކާރުން ކަނޑައަޅާފައިވާ ޚާއްސަ ކެޓަގަރީތަކަށެވެ.