ފަހި ދިރިއުޅުން ކޯޕަރޭޝަން (އެފްޑީސީ) އިން ހުޅުމާލޭގެ ދެވަނަ ފިޔަވަހީގައި ތަރައްގީކޮށްފައިވާ އިޖްތިމާއީ ބޯހިޔާވަހިކަމުގެ ފްލެޓްތައް ތިންވަނަ ފަރާތަކަށް ކުއްޔަށް ދޭނަމަ، އެ ފަރާތްތައް ބައިލައްކަ ރުފިޔާއިން ޖޫރިމަނާކޮށް ފްލެޓް އަތުލާނެ ކަމުގެ އިންޒާރު އެ ކޯޕަރޭޝަނުން ދީފިއެވެ.
އެފްޑީސީން މިފަދަ އިންޒާރެއް ދީފައިވަނީ، ސަރުކާރުން ހެޔޮ އަގުގައި ދޫކޮށްފައިވާ މި ފްލެޓްތައް ބޮޑު އަގުގައި ކުއްޔަށް ދިނުމަށް ބައެއް ފަރާތްތަކުން މީސްމީޑިއާގައި އިޝްތިހާރު ކުރަމުންދާ ދަނޑިވަޅެއްގައެވެ. އެގޮތުން، ސަރުކާރުން 11,500 ރުފިޔާ ކުލީގެ ގޮތުގައި ކަނޑައަޅާފައިވާ 3 ކޮޓަރީގެ އެޕާޓްމެންޓެއް، 23,000 ރުފިޔާއަށް ކުއްޔަށް ދިނުމަށް މީހަކު އިޝްތިހާރުކޮށްފައިވާ މައްސަލައެއް ވަނީ ފެންމަތިވެފައެވެ.
މިކަމާ ގުޅިގެން އެފްޑީސީގެ މެނޭޖިން ޑިރެކްޓަރު ހަމްދާން ޝަކީލް ވިދާޅުވީ، އެފްޑީސީ ފްލެޓްތަކަކީ ތިންވަނަ ފަރާތަކަށް ކުއްޔަށް ދެވޭނެ ތަންތަން ނޫން ކަމަށެވެ. އަދި މިފަދަ ޢަމަލުތައް ކުރާ ފަރާތްތައް 50,000 ރުފިޔާއާ ހަމައަށް ޖޫރިމަނާކޮށް، ފްލެޓްގެ އެއްބަސްވުން އުވާލެވޭނެ ކަމަށް އޭނާ ވިދާޅުވިއެވެ.
ހަމްދާން އިތުރަށް ފާހަގަކުރެއްވި ގޮތުގައި، އިޖްތިމާއީ ބޯހިޔާވަހިކަމަށް ދޫކޮށްފައިވާ ތަންތަން ބޭނުންކޮށްގެން ނާޖާއިޒު ފައިދާ ހޯދުމަކީ އެ މަޝްރޫއުގެ މަގުސަދާ ހިލާފު ކަމެކެވެ. އަދި ފްލެޓްތައް ކުއްޔަށްދީ ފައިދާ ހޯދާ ވިޔަފާރިއަކަށް ހެދުމަކީ ކޮންމެ ދިވެއްސެއްގެ ހައްގަށްވެސް އަރައިގަތުން ކަމަށް އޭނާ ވިދާޅުވިއެވެ.
ހުޅުމާލޭގައި އެފްޑީސީން ތަރައްގީކުރި 4,000 ހައުސިން ޔުނިޓަކީ ފިނިޝިން މަސައްކަތްތައް ނިންމުމަށްފަހު ހަވާލުކުރާ ތަންތަނެވެ. މި ތަންތަނުގެ ލިސްޓު ކަނޑައެޅުމުގެ މަސައްކަތް ކުރަނީ ގެދޮރުވެރިކަމާ ބެހޭ ވުޒާރާއިން ކަމަށްވާއިރު، އެފްޑީސީން ސޮއިކުރަމުންދަނީ އެ ވުޒާރާއިން ފޮނުވާ ލިސްޓުތަކަށެވެ.
