އަލިފާނުގެ ހާދިސާ ހިނގީ ހަދަމުންދާ ފިހާރައެއްގެ ގުދަނުގައި، އެއްވެސް މީހަކަށް އަނިޔާއެއް ނުވޭ

ހުޅުމާލެ ފޭސް 2 ގެ އުދަރެސް ޓަވަރުގައި ހަދަމުންދިޔަ ފިހާރައެއްގެ ގުދަނުގައި އަލިފާނުގެ ހާދިސާއެއް ހިނގައިފިއެވެ.

މި ހާދިސާ ހިނގާފައިވަނީ އުދަރެސް ޓަވަރު 5 ގެ ގްރައުންޑް ފްލޯގައެވެ. ފުލުހުން މައުލޫމާތު ދެއްވި ގޮތުގައި، އެ އިމާރާތުގައި ހަދަމުންދާ ފިހާރައެއްގެ ގުދަނުގައި އަލިފާން ރޯވެފައިވާ ކަމުގެ ރިޕޯޓް ލިބިފައިވަނީ މިއަދު އިރުއޮއްސި 18:40 އެހައިކަންހާއިރުއެވެ.

ހާދިސާގެ މައުލޫމާތު ލިބުމާއެކު، އެމްއެންޑީއެފް ފަޔަރ އެންޑް ރެސްކިއު ސާވިސްއިން ވަނީ އެ ސަރަހައްދަށް ގޮސް އަލިފާން ނިއްވުމުގެ މަސައްކަތް ކޮށް، ކުޑަވަގުތުކޮޅެއްގެ ތެރޭގައި އަލިފާންގަނޑު އެއްކޮށް ކޮންޓްރޯލްކޮށް ނިއްވާލާފައެވެ.

މި ހާދިސާގައި އެއްވެސް މީހަކަށް ޖިސްމާނީ އަނިޔާއެއް ލިބިފައެއް ނުވެއެވެ. ނަމަވެސް، އަލިފާން ރޯވި ގުދަނުގައި ހުރި ބައެއް ތަކެއްޗަށާއި، އެ އިމާރާތުގެ ފެން ހޮޅިއަކަށް އެކިވަރުގެ ގެއްލުންތައް ލިބިފައިވާ ކަމަށް ފުލުހުން ވަނީ ބުނެފައެވެ.

މި އަލިފާނުގެ ހާދިސާ ހިނގަން މެދުވެރިވި ސަބަބު ދެނެގަތުމަށްޓަކައި ފުލުހުން މިހާރު ދަނީ މި މައްސަލަ އިތުރަށް ތަހުގީގު ކުރަމުންނެވެ.