ހުޅުމާލޭ ފޭސް 2 ގެ ބީޗް ސަރަހައްދުގައި ރައްޔިތުންނަށް ރައްކާތެރިކަމާއެކު މޫދަށް އެރެވޭނެ އިންތިޒާމާއި، މަސްބާނަން ދާ ފަރާތްތަކަށް ހާއްސަ ސަރަހައްދެއް ގާއިމުކުރުމުގެ މަޝްރޫއާ ގުޅޭގޮތުން އާންމުންގެ ހިޔާލު ހޯދުމަށް ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) އިން ހުޅުވާލައިފިއެވެ.

މި މަޝްރޫއު ކުރިއަށް ގެންދިއުމަށްޓަކައި، ތިމާވެއްޓަށް އަސަރު ފޯރާނެ މިންވަރު ބަޔާންކުރާ ރިޕޯޓް (އީ.އައި.އޭ) ތައްޔާރުކުރުމުގެ މަސައްކަތް އެޗްޑީސީން މިހާރު ދަނީ ކުރަމުންނެވެ. މިގޮތުން އީ.އައި.އޭ ރިޕޯޓަށް ބޭނުންވާ މަޢުލޫމާތު އެއްކުރުމަށާއި، އާންމު ރައްޔިތުންގެ ހިޔާލާއި މަޝްވަރާ ހޯދުމަށް ހާއްސަ އޮންލައިން ސާރވޭއެއް މިހާރު ވަނީ ފަށާފައެވެ.

އެޗްޑީސީން މައުލޫމާތު ދޭ ގޮތުގައި މި ސަރވޭގެ މައިގަނޑު ބޭނުމަކީ، އާންމުންނާއި މުނިފޫހިފިލުވުމަށް އެ ސަރަހައްދު ބޭނުންކުރާ ފަރާތްތަކުން މިހާރު އެ ގޮނޑުދޮށް ބޭނުންކުރަމުންދާ ގޮތާއި، އެ ސަރަހައްދުގެ މިހާރުގެ ހާލަތު ދެނެގަތުމެވެ. އަދި އަލަށް ތަރައްގީކުރުމަށް ހުށަހަޅާފައިވާ އާޓިފިޝަލް މޫދަށްއެރޭ ސަރަހައްދާއި މަސްބާނާ ޕްލެޓްފޯމާ މެދު ރައްޔިތުން ދެކޭގޮތް ދެނެގަތުމެވެ. މި ސަރވޭއިން ލިބޭ މައުލޫމާތުތަކަކީ އީ.އައި.އޭ ރިޕޯޓުގެ ހުށަހެޅުންތައް އެކުލަވާލުމަށާއި، މުޖުތަމައުގެ ބޭނުންތަކަށް ރިއާޔަތްކޮށް މި މަޝްރޫއު އެންމެ ފުރިހަމަ ގޮތުގައި ކުރިއަށް ގެންދިއުމަށް ލިބޭނެ ވަރަށް ބޮޑު އެހީއެކެވެ.

ހުޅުމާލެ ފޭސް 2 ގެ ބީޗް ސަރަހައްދު ތަރައްގީކުރުމަށް އެކުލަވާލާފައިވާ ޕްލޭން މައިގަނޑު ދެ ބަޔަކަށް ބެހިގެންވެއެވެ. އެއީ:

އާޓިފިޝަލް ސްވިމިންގ ސަރަހައްދު: މި ބައިގައި ފްލޯޓިންގ ޕޮންޓޫނަކާއެކު ރައްކާތެރިކަމާއެކު މޫދަށް އެރޭނެ ސަރަހައްދެއް ޤާއިމުކުރެވޭނެއެވެ. އަދި އެއްގަމުގައި އައުޓްޑޯރ ފެންވަރާ ތަނަކާއި، މޫދަށް ފަސޭހައިން ފޭބޭނެ ގޮތަށް ހަދާ ޚާއްސަ ރޭމްޕެއް ހިމެނެއެވެ.

މަސްބާނާ ޕްލެޓްފޯމް: މިއީ ކޮންކްރީޓް ޑެކަކާއި، އެ ތަނަށް ދިއުމަށް ހާއްސަކުރެވޭ ވޯކްވޭއެއް އެކުލެވޭ ސަރަހައްދެކެވެ. މީގެއިތުރުން އަރާމުކޮށްލަން އިށީނދެވޭނެ ހިޔާކުރެވިފައިވާ ބެންޗުތަކާއި، ބާނާ މަސް ކެނޑުމަށް ހާއްސަ ސަރަހައްދެއް މި ޕްލެޓްފޯމުގައި ހިމެނެއެވެ.

މި މަޝްރޫއު ނިމިގެންދާއިރު، ހުޅުމާލެ ފޭސް 2 ގައި ދިރިއުޅޭ ގިނަ އަދަދެއްގެ ރައްޔިތުންނަށް ހިތްފަސޭހަކަމާއި ރައްކާތެރިކަމާއެކު ވަގުތު ހޭދަކޮށްލުމާއި މުނިފޫހިފިލުވުމުގެ ފުރުސަތު ތަނަވަސްވެގެންދާނެއެވެ. އެޗްޑީސީން ހާމަކުރި ގޮތުގައި ހުޅުމާލެއަކީ ރައްޔިތުން ދިރިއުޅެން އަމާން އަދި ހިތްފަސޭހަ ތަނަކަށް ހެދުމަށްޓަކައި ކުރަންޖެހޭ އެންމެހައި މަސައްކަތްތައް އެ ކޯޕަރޭޝަނުން މެދުކެނޑުމެއްނެތި ކުރިއަށް ގެންދާނެއެވެ.

މި މަޝްރޫއާ ގުޅޭގޮތުން ހިޔާލު ފާޅުކުރުމަށް ޝައުގުވެރިވާ ފަރާތްތަކަށް ހާއްސަ އޮންލައިން ފޯމު (https://forms.cloud.microsoft/r/Sq0vzEFdWt) މެދުވެރިކޮށް ސަރވޭގައި ބައިވެރިވެވޭނެ ކަމަށް އެޗްޑީސީން ވަނީ ބުނެފައެވެ.