ޔުގަންޑާއިން ރާއްޖެއަށް ކަނޑައެޅި އާ ސަފީރު މަގާމުގެ ފަތްކޮޅު ރައީސް ޑރ. މުހައްމަދު މުއިއްޒަށް މިއަދު އަރުވައިފި އެވެ.
ރައީސް އޮފީހުން ބުނީ ޔުގަންޑާއިން ރާއްޖެއަށް ކަނޑައެޅި އާ ނޮން-ރެޒިޑެންޓް ސަފީރު ޖޮއިސް ކަކޫރާމަޓްސީ ކިކަފުންޑާ އޭނާގެ ސަފީރުކަމުގެ ފަތްކޮޅު ރައީސް ޑރ. މުއިއްޒަށް މިއަދު އަރުވާފައިވާ ކަމަށެވެ.
އެ ރަސްމިއްޔާތަށް، ޖުމްހޫރީ މައިދާނުން ފެށިގެން ރައީސުލްޖުމްހޫރިއްޔާގެ އޮފީހާ ހަމައަށް ސަފީރު ވަޑައިގެންނެވީ ހަތްކޮޅުގައި، ރަސްމީ އިއްޒަތުގައި، ބެރު ދުންމާރި ތާޅަފިލީގައި، ހެވިކަމުގެ ލަޝްކަރީންނާއެކު ހިންގަވާފައި ކަމަށް ރައީސް އޮފީހުން ބުންޏެވެ.
ރައީސް އޮފީހުން ބުނީ ޔުގަންޑާގެ އާ ސަފީރާއެކު ރައީސް ބޭއްވެވި ބައްދަލުކުރެއްވުމުގައި އިގުތިސާދީ ތަރައްގީ އާއި މޫސުމީ ވިލުންތެރިކަމާއި ތައުލީމާއި ފަތުރުވެރިކަމުގެ ދާއިރާއިން އެއްބާރުލުންދިނުން އިތުރުކުރުމަށް ހާއްސަ ސަމާލުކަމެއް ދީގެން، ދެ ގައުމުގެ ގުޅުން ހަރުދަނާކުރުމާ މެދުގައި ދެ ބޭފުޅުން ވެސް މަޝްވަރާކުރެއްވި ކަމަށެވެ.
ރާއްޖެއާއެކު އޮންނަ ގުޅުން އިތުރަށް ބަދަހިކުރުމަށް ޔުގަންޑާއިން ގެންގުޅުއްވާ ޝައުގުވެރިކަމުގެ އަގުވަޒަންކުރައްވާ ކަމަށް ވެސް ރައީސް ވިދާޅުވި އެވެ.
ރައީސް ވިދާޅުވީ ދެ ގައުމަށް ވެސް ފައިދާކުރަނިވި މޭރުމަކުން އެކުގައި މަސައްކަތްކުރުން މަތީ ދިވެހި ސަރުކާރު ދެމިއޮންނާނެ ކަމަށާއި ފަރުދީ ފެންވަރުގައްޔާއި ސަފާގީ ގޮތުން އަދި ވިޔަފާރީގެ ރޮނގުން ގުޅުން ބަދަހިކުރުމަށް ހުރި ފުރުސަތުތައް ވެސް ބައްލަވާނެ ކަމަށެވެ.
ރާއްޖެ އާއި ޔުގަންޑާއާ ދެމެދުގައި ހާރިޖީ ގުޅުން ގާއިމްކުރީ ނޮވެމްބަރު، 1993 ގައެވެ.
