ފަލަސްތީނުން ރާއްޖެއަށް ކަނޑައެޅި އާ ސަފީރު މަގާމުގެ ފަތްކޮޅު ރައީސް ޑރ. މުހައްމަދު މުއިއްޒަށް މިއަދު އަރުވައިފިއެވެ.
ރައީސް އޮފީހުން ބުނީ ފަލަސްތީނުން ރާއްޖެއަށް ކަނޑައެޅި އާ ނޮން-ރެޒިޑެންޓް ސަފީރު، އިހާބް އިބްރާހީމް މުހައްމަދު ހަލީލް ސަފީރުކަމުގެ ފަތްކޮޅު ރައީސް ޑރ. މުއިއްޒަށް މިއަދު އަރުވާފައިވާ ކަމަށެވެ
އެ ރަސްމިއްޔާތަށް ޖުމްހޫރީ މައިދާނުން ފެށިގެން ރައީސުލްޖުމްހޫރިއްޔާގެ އޮފީހާ ހަމައަށް ސަފީރު ވަޑައިގެންނެވީ ހަތްކޮޅުގައި، ރަސްމީ އިއްޒަތުގައި، ބެރު ދުންމާރި ތާޅަފިލީގައި، ހެވިކަމުގެ ލަޝްކަރީންނާ އެކު ހިންގަވާފައި ކަމަށް ރައީސް އޮފީހުން ބުންޏެވެ.
Advertisement
ފަލަސްތީނުގެ އާ ސަފީރު، ރައީސަށް މަގާމުގެ ފަތްކޮޅު އެރުވުމުން އާ ސަފީރަށް ރައީސް ތަހުނިޔާ ވިދާޅުވި ކަމަށް ވެސް ރައީސް އޮފީހުން ބުންޏެވެ.
ފަލަސްތީނުގެ ހައްގުގައި ރާއްޖެއިން ސާބިތުކަމާއެކު ދެމުން ގެންދާ އެއްބާރުލުން ފާހަގަކުރައްވައި، އެކަމުގެ އަގުވަޒަންކުރައްވާ ކަމަށް ސަފީރު ވިދާޅުވި ކަމަށާއި ފަލަސްތީނުގެ ހައްގުގައި ރާއްޖެއިން ބައިނަލްއަގުވާމީ މައިދާނުގައި މެދުނުކެނޑި އަޑުއުފުލަމުން ދާދިއުމުގެ މުހިންމު ކަމުގެ މައްޗަށް ވެސް ސަފީރު އަލިއަޅުއްވާލެއްވި ކަމަށް ރައީސް އޮފީހުން ބުންޏެވެ.
އެ ރަސްމިއްޔާތުގައި ރައީސް ވަނީ ފަލަސްތީނުގެ ހައްގުގައި އަޑުއުފުލުމުގައި ރާއްޖެއިން ސާބިތުކަމާއެކު ދެމިއޮންނާނެ ކަމުގެ ޔަގީންކަން ދެއްވާފައެވެ. އަދި ދެ ބޭފުޅުން ވެސް ވަނީ ދެ ގައުމުގެ ގުޅުން އިތުރަށް ބަދަހިކުރެއްވުމަށް ޝައުގުވެރިކަން ފާޅުކުރައްވާފައެވެ.
ރާއްޖެ އާއި ފަލަސްތީނާ ދެމެދުގައި ހާރިޖީ ގުޅުން ގާއިމުކުރީ 4 އެޕްރީލް 1982 ގައެވެ.
