މި ދައުރުގައި ދިވެހީންގެ ތަރިކައިގެ ދާއިރާއެއް އުފެދޭތަން ދެކެން ބޭނުންވާ ކަމަށް ދިވެހިބަހާއި ޘަޤާފަތާއި ތަރިކައާއި ބެހޭ ވަޒީރު އާދަމް ނަސީރު އިބްރާހިމް ވިދާޅުވެއްޖެއެވެ.

ދައުލަތުގެ މީޑިއާއަށް ދެއްވި ޚާއްސަ އިންޓަވިއުއެއްގައި ވަޒީރު އާދަމް ނަސީރު ވިދާޅުވީ، ރާއްޖޭގައި ތަރިކައިގެ ދާއިރާއެއް އުފެދިއްޖެނަމަ، އެކި ތަންތަން ފަރުމާކުރާއިރު ވެސް ދިވެހީންގެ ސިފަތަކުން ފަރުމާ ވެގެންދާތަން ފެންނާނެ ކަމަށް ޤަބޫލުކުރައްވާ ކަމަށެވެ. މީގެ ތެރޭގައި ގެސްޓްހައުސްތައް، ރެސްޓޯރަންޓްތައް، ކާބޯތަކެތި ވިއްކާ ތަންތަން، މަގުތައް އަދި ގަސް އިންދުން ފަދަ ކަންކަން ހިމެނޭ ކަމަށް ވަޒީރު ފާހަގަކުރެއްވިއެވެ.

"އަޅުގަނޑުމެންނަށް ލިބިފައިވާ ތަރިކައިގެ އެންމެ މުހިންމު އެކައްޗެއް އެއީ އަޅުގަނޑުމެންގެ ބަސް. އެހެންވީމާ މިކަން ދޭހަވެ، ކޮންމެ ރަށެއްގެ ފެންވަރެއްގައި ވެސް މިކަމާ ވަކާލާތު ކުރާނެ. މިކަމާ ކަންބޮޑުވެ ނުތަވަސްކަން ހިތުގައި ގެންގުޅޭނެ. މިކަމަށް ހޭލުންތެރިވެ، މިކަން ހެޔޮގޮތުގައި ދަމަހައްޓަން ބޭނުންވާނެ ޖަމާއަތެއް އޮތުން މުހިންމު،" ވަޒީރު ވިދާޅުވިއެވެ.

ދިވެހީންގެ މިނިވަންކަމަށް މަސައްކަތްކުރާނީ ދިވެހީންކަން ފާހަގަކުރައްވާ ވަޒީރު ވަނީ ދިވެހީންގެ އަމިއްލަވަންތަކަން ދަމަހައްޓަން ކޮންމެ މީހަކުވެސް މަސައްކަތް ކުރުމަށް އިލްތިމާސް ކުރައްވާފައެވެ.

މީގެއިތުރުން، އިންޓަރެކްޓިވް މިއުޒިއަމްގެ އަމަލީ މަސައްކަތް މި އަހަރު ތެރޭ ފެށޭނެ ކަމަށް ވެސް ވަޒީރު ވިދާޅުވިއެވެ. އާދަމް ނަސީރު ވިދާޅުވީ، އެ މިއުޒަމް ފެށުމަށް ބޭނުންވާ ކަރުދާހުގެ މަސައްކަތްތައް ނިމިފައިވާ ކަމަށާއި، އެ މަސައްކަތުގެ އަމަލީ މަސައްކަތް މި އަހަރު ތެރޭ ފެށޭނެ ކަމަށެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން ދިވެހި ތަރިކަ ދިރުވައި އާލާކުރުމަށް ޚާއްސަ އިސްކަމެއް ދެއްވާކަން ފާހަގަކުރެވެއެވެ.