ރައީސުލްޖުމުހޫރިއްޔާ ޑރ މުޙައްމަދު މުޢިއްޒުގެ ފަރާތްޕުޅުން ދިވެހި ޙައްޖާޖީންގެ ޙާލު ބެއްލެވުމަށް އިސްލާމީ ކަންތައްތަކާބެހޭ ވަޒީރު ޑރ. މުޙައްމަދު ޝަހީމް ޢަލީ ސަޢީދާއި މިވަގުތު މައްކާގައި ތިއްބެވި ވަޒީރުންގެ ޓީމުން މިނާ ޓެންޓަށް ޒިޔާރަތްކުރައްވައިފިއެވެ.
މި ވަފުދު މިނާ ޓެންޓަށް ޒިޔާރަތް ކުރައްވާފައިވަނީ ރޭގައެވެ. މި ވަފުދުގައި ފޭލިގެއަށް ވަޑައިގަންނަވާފައިވަނީ އިސްލާމީކަންތައްތަކާ ބެހޭ ވަޒީރުގެ އިތުރުން ފޮރިން މިނިސްޓަރު ޑރ. އަބްދުالله ޚަލީލްއާއި ފިނޭންސް މިނިސްޓަރު މޫސާ ޒަމީރުގެ އިތުރުން އިސްލާމީ މަރުކަޒުގެ އިސް އިމާމު ފަޟީލަތުއްޝައިޚް މުޙައްމަދު ލަޠީފްއެވެ.
މި ޒިޔާރަތުގައި ޙައްޖާޖީންނާއި ވާހަކަދައްކަވަމުން ވަޒީރު ޝަހީމް ވިދާޅުވީ ޙައްޖުގެ މަތިވެރި އަޅުކަން އިސްލާމް ދީނުގައި ޝަރުޢުކުރައްވާފައިވަނީ ވަރަށް ގިނަ ޝަރުތުތަކާ އެކު، ކުޅަދާނަކަން ލިބިގެންވާ މީހަކަށް ކަމަށެވެ. އެކަމުން ވެސް ދޭހަވާކަމަކީ މިފަދަ ބޮޑު އަޅުކަމެއްގެ ތެރޭގައި ކެތްތެރިވާންޖެހޭ ވަރަށް ގިނަ ކަންތައްތައް ހުންނާނެކަން ކަމަށް ވަޒީރު ވިދާޅުވިއެވެ. އެގޮތުން ޙައްޖުގެ މަތިވެރިން އަޅުކަން އަދާކުރާއިރު، ހުރިހާ ޙައްޖާޖީންވެސް ކެތްތެރިވުމަށް ވަޒީރު ވަނީ އިލްތިމާސްކުރައްވާފައެވެ.
މާތް ﷲގެ މަތިވެރި ރަހުމަތުގެ ސަބަބުން ހައްޖުގެ މަތިވެރި އަޅުކަން ފުރިހަމަކުރުމުގެ ނަސީބު ހައްޖާޖީންނަށް ލިބިވަޑައިގެންނެވި ކަމަށްޓަކައި މާތް ﷲގެ މައްޗަށް ހަމްދުކޮށް ޝުކުރުވެރިވާން ޖެހޭނެ ކަމަށް ވަޒީރު ވިދާޅުވިއެވެ. އަދި ކުރާ ހެޔޮ ޢަމަލުތައް ޤަބޫލުކުރެއްވުމަށް އަބަދުވެސް ދުޢާކުރެއްވުމަށް ވަޒީރު ވަނީ ޙައްޖާޖީންނަށް ނަސޭހަތްތެރިވެވަޑައިގެންފައެވެ.
ވަޒީރުގެ ވާހަކަފުޅުގައިވަނީ ރައީސްގެ ދެކަނބަލުންގެ ފަރާތްޕުޅުން ހުރިހާ ޙައްޖުވެރިންނަށް ސަލާމް ރައްދުކޮށްދެއްވާފައެވެ. އަދި ރައީސްގެ ހެޔޮ ދުޢާ ޙައްޖާޖީންނާއެކު ވާކަމަށް ވަޒީރު ވިދާޅުވިއެވެ.
މި ޒިޔާރަތުގައި ވަޒީރުން ވަނީ ޙައްޖުވެރިންނާއި ޙައްޖު ކޯޕަރޭޝަން އަދި މުޠައްވިފްގެ ބޭފުޅުންނާވެސް ބައްދަލު ކުރައްވާފައެވެ.
މިއަހަރު ރާއްޖެއިން ޙައްޖުގެ އަޅުކަމަށް ދިޔަ 1000 ޙައްޖުވެރިން، ޢަރަފާތާއި މުޛްދަލިފާގެ ރުކުން ފުރިހަމަ ކުރުމަށްފަހު ބޮޑު ޖަމްރާއަށް ހިލައުކާ އިޙްރާމް ކަނޑާފައިވާކަން ފާހަގަކޮށްލެވެއެވެ. އަދި މިވަގުތު ހުރިހާ ޙައްޖުވެރިންވެސް ތިބީ މިނާ ފޭލިގެތަކުގައެވެ.
