ލ. ގަމުގައި މިރޭ ހިނގި އެކްސިޑެންޓެއްގައި ދެމީހަކަށް ބޮޑެތި އަނިޔާތަކެއް ވެއްޖެއެވެ. ގަމު ލިންކް ރޯޑުގައި މިރޭ 7:03 ހާއިރު ސައިކަލަކާއި ކާރެއް ޖެހި ހިނގި މި އެކްސިޑެންޓުގައި ސައިކަލުގައި ދުއްވަން ހުރި 44 އަހަރުގެ ދިވެހި ފިރިހެނާގެ ކަނާތު ފައިގެ ދެތަނަކުން ބިނދި، ބޯ ފެޅި، އަދި އިތުރު އަނިޔާތަކެއް ވެފައިވެއެވެ. އަދި ސައިކަލުގެ ފަހަތުގައި އިން ހަމަ އެ އުމުރުގެ މީހާގެ ކަނާތު ފައި ވެސް ދެތަނަކުން ބިނދި، އިތުރު އަނިޔާތަކެއް ވެފައިވާކަމަށް ހަބަރު ލިބެއެވެ.
ފުލުހުން ބުނީ، އެކްސިޑެންޓުގައި ހިމެނޭ ކާރު ދުއްވި 62 އަހަރުގެ ފިރިހެނާއަށް އެއްވެސް އަނިޔާއެއް ވެފައިނުވާކަމަށާއި، މި އެކްސިޑެންޓުގައި ދެ އުޅަނދަށްވެސް އެކި ވަރުގެ ގެއްލުން ވެފައިވާ ކަމަށެވެ.
ފުލުހުން ދަނީ މި މައްސަލަ ތަޙްޤީޤް ކުރަމުންނެވެ.
