އިއްޔެ އަކީ ޙައްޖު ދުވަހެވެ. މިއަދަކީ ޢިދުގެ ފުރަތަމަ ދުވަހެވެ. މިއީ ތައުޙީދުގެ ބިން ކަމަށްވާ ސަޢޫދީން ޢަމަލުކުރާ ގޮތެވެ. އެހެންނަމަވެސް، ބައެއް ޤައުމުތަކުން ސަޢޫދީއަށް ބޯނުލަނބަން ވެގެން މިއަދަކީ ޢީދުދުވަސް ނޫން ކަމަށް ނިންމައިފިއެވެ. އެ ޤައުމުތަކުގެ ތެރޭގައި ހިންދޫންގެ ސަރުކާރު އޮންނަ އިންޑިއާ އާއި، އެޤައުމާއި އިންވެގެން އޮތް ޕާކިސްތާނާއި ޠާލިބާނުން ވެރިކަންކުރާ އަފްޣާނިސްތާނާއި، ބަންގްލަދޭޝް، މަޣްރިބް ނުވަތަ މޮރޮކޯ ވެސް ހިމެނެއެވެ. އިންޑޮނޭޝިޔާގެ ބައެއް ގަބީލާތަކުގެ ވެސް މިއަދު ޢީދު ފާހަގަ ނުކުރެއެވެ.

^{މިޞްރުގައި މިއަދު ޢީދުކުޅިވަރު ކުޅެނީ.}

މިދެންނެވި ޤައުމުތަކުން ވެސް މައްކާގައި އިއްޔެ ވަނީ ޙައްޖުގެ އަޅުކަން އަދާކޮށް މިއަދު ޢީދު ދުވަސް ފާހަގަ ކޮށްފައެވެ. ނަމަވެސް، އެޤައުމުގެ ސަރުކާރުތަކުން ބުނެފައި ވަނީ ޢީދަކީ މާދަމާއެވެ. މިއީ ސިޔާސީ ނިންމުންތަކެއް ކަމަށް ބެލެވެއެވެ.

މިއަދު ސަޢޫދީ ޢަރަބިއްޔާ އާއި ދިވެހިރާއްޖެ އަދި އެމިރޭޓްސް ފަދަ ޤައުމުތަކުގައި އަޟްޙާ ޢީދު ފާހަގަކޮށް އުޟުޙިއްޔާ ކަތިލާއިރު މިދެންނެވި ޤައުމިތަކުގެ ދީނީ ކޮމެޓީތަކުން (ސިޔާސީ ނުފޫޒު އޮންނަ ކޮމެޓީތަކުން ބުނެފައި ވަނީ) މި ތަފާތުވުން އައިސްފައިވަނީ ހަނދު ފެނުމުގެ މައްސަލައިގައި ޤައުމުތަކުގެ މެދުގައި ދެބަސްވުން އުފެދުމާ ގުޅިގެންނެވެ.

ޕާކިސްތާން، އަފްޣާނިސްތާން އަދި މޮރޮކޯ ވެސް ވަނީ އެ ޤައުމުތަކުގެ ހަނދު ބެލުމުގެ ކޮމިޓީތަކުގެ ނިންމުމާ އެއްގޮތަށް 7 ޖޫން އަކީ ޢީދު ދުވަސް ކަމުގައި އިޢުލާނުކޮށްފައެވެ. މި ޤައުމުތަކުން ވަނީ ސަޢޫދީ ޢަރަބިއްޔާގެ ނިންމުމަށް ތަބާނުވާނެ ކަމަށް ބުނެފައެވެ. އެހެންނަމަވެސް މިޤައުމުތަކުގެ ސަރުކާރުގެ ނިންމުންތަކަށް ގޮންޖަހައި ބައެއް މީހުން މިއަދު ޢީދުކަމަށް ނިންމައިގެން އެބަތިއްބެވެ.

ފާހަގަކޮށްލަން ޖެހޭ މުހިންމު ކަމަކީ ޗެޗްނިއާ އަދި ރަޝިއާ ފަދަ ޤައުމުތަކުގައި މިއަދު ޢީދު ފާހަގަ ކުރިއިރު މަގުތައް ވެސް އޮތީ ޢީދު ނަމާދުކުރަން ތިބި މީހުންނާއިގެން ފުރިފައެވެ. ހިތާމައަކީ މުސްލިމު ވެރިކަން އޮންނަ ޤައުމުތައް ދެބައިވީމައެވެ. ވުމާއެކު، މި ދެބަސްވުމުގެ ސަބަބުން ދުނިޔޭގެ މުސްލިމު އުންމަތް ދެދުވަހަކަށް ބެހިގެން ޢީދު ފާހަގަކުރާ މަންޒަރު ފެންނާނެއެވެ.