ކުޅިވަރު ގާނޫނުގެ ސަބަބުން ދެން ދިވެހި ކުޅިވަރުން ފެނިގެންދާނީ ހެޔޮ ބަދަލެއްގެ ފެށުން ކަމަށް ކުޅިވަރާ ހަށިހެޔޮކަމާ ބެހޭ ވަޒީރު އަބްދުﷲ ރާފިއު ވިދާޅުވެއްޖެއެވެ.

ވަޒީރު ރާފިއު ވަނީ މި ޤާނޫނު ތަންފީޒުކުރުމުގައި ގިނަގުނަ ގޮންޖެހުންތަކެއް ހުރިކަން ފާހަގަކުރެވެއެވެ.

ވަޒީރު ވިދާޅުވި ގޮތުގައި، ކުޅިވަރު ޤާނޫނުގައި ހިމެނޭ ގިނަ ކަންކަމަކީ މިހާރުވެސް ކުރެވެމުންދާ ކަންތައްތަކެވެ. އެހެންނަމަވެސް، މި ޤާނޫނުގެ ދަށުން އިތުރު މަސައްކަތްތަކެއް ކުރަން ޖެހޭކަން އެމަނިކުފާނު ޤަބޫލުކުރެއްވިއެވެ.

ކުޅިވަރު ފަންޑު ޤާއިމުކުރުމަކީ މި ޤާނޫނުގެ މުހިންމު ބައެކެވެ. އެހެންނަމަވެސް، މި ފަންޑަށް ފައިސާ ހޯދުމަކީ ބޮޑު ގޮންޖެހުމެކެވެ. ވަޒީރު ވިދާޅުވި ގޮތުގައި، ޕްރައިވެޓް ސެކްޓަރާއި ބައިނަލްއަޤްވާމީ ޖަމްޢިއްޔާތަކުގެ އެހީތެރިކަން ހޯދުމަށް މަސައްކަތްކުރާނެއެވެ.

ކުޅިވަރު ފަންޑު ބޯޑެއް އުފައްދާއިރު، މި ބޯޑުގެ މިނިވަންކަމާމެދު ބައެއް ފަރާތްތަކުން ސުވާލު އުފައްދައެވެ. އެ ފަރާތްތަކުން ސަބަބެއް ކަމަށް ދައްކަނީ، 7 މެންބަރުންގެ މި ބޯޑަށް މެންބަރުން އައްޔަން ކުރުމުގައި ކުލަބުތަކުގެ މާބޮޑު ދައުރެއް ނެތީމައެވެ.

ދިވެހިރާއްޖޭގެ ކުޅިވަރު ޤާނޫނަށް ގެނައި އިސްލާޙާއެކު އަންނާނެ ބައެއް ބަދަލުތައް:

1. ކުޅިވަރު ކުރިއެރުވުން ލާމަރުކަޒީކޮށް އަތޮޅުތަކާއި ރަށްތަކުގެ ފެންވަރުގައި ކުޅިވަރު ކުރިއަރުވަން އިޚްތިޔާރުތަކަކާއި ފުރުޞަތުތަކެއް ލިބުން.

2. ކޮންމެ ކުޅިވަރެއްގެވެސް ސަރަޙައްދީ އެސޯސިއޭޝަންތައް ރާއްޖޭގެ އެކި ސަރަޙައްދުތަކުގައި މި ޤާނޫނުގެ ދަށުން އުފެއްދުމަށް ކަނޑައެޅުން. އަދި ކޮންމެ ކުޅިވަރެއްގެވެސް ސަރަޙައްދީ މުބާރާތްތައް ބާއްވަން ފެށުން.

3. ކުޅިވަރުގެ ވަކި ފަންޑެއް ޤާއިމުކޮށް، އެ ފަންޑުން ކުޅިވަރު ކުރިއަރުވަން ހޭދަކުރަން ފެށުން.

4. ދިވެހިރާއްޖޭގެ ޕެރަލިމްޕިކް ކޮމިޓީއަކީ، މޯލްޑިވްސް އޮލިމްޕިކް ކޮމިޓީއާ އެއް ގިންތިއެއްގައި ހިންގާނެ ޤާނޫނީ ބާރުވެރިކަން ފުރިހަމައަށް ލިބިފައިވާ ކުޅިވަރުގެ އިދާރާއެއްގޮތުގައި ހަމަޖެއްސުން.

5. މޯލްޑިވްސް ޕެރަލިމްޕިކް ކޮމެޓީގެ ދަށުން، ހިންގާ ޚާއްޞަ ޑިވިޝަންތައް ކުޅިވަރު އެސޯސިއޭޝަންތަކުގައި އުފެއްދުން.

6. ކުޅިވަރުގެ ދާއިރާގައި އެންމެންނަށް ހަމަހަމަކަން އޮންނާނެކަން ކަށަވަރު ކޮށްދޭ "މޯލްޑިވްސް ނޭޝަނަލް އެންޓި ޑޯޕިންގ އެޖެންސީ" ވަކި މުސްތަޤިއްލު މުއައްސަސާއެއްގެ ގޮތުގައި ހިނގަން ފެށުން.

7. ސްޕޯޓްސް އާބިޓްރޭޝަން ނިޒާމު ރާއްޖޭގައި ޤާއިމުކޮށް ޢަމަލުކުރަން ފެށުމަށް ކަނޑައެޅުން. (މިއީ ކުޅުންތެރީންގެ ހައްގުތައް ރައްކާތެރިކޮށް ދީ އިންސާފު ލިބޭނެ ގާނޫނީ ހައިސިއްޔަތު، ދިނުމަށް ފުރުޞަތު ފަހިކޮށްދިނުމަށް ކަނޑައަޅާފައިވާކަމެއް).

8. ސްކޫލް ސްޕޯޓްސް ރޭވިގެން ކުރިއަށް ގެންދެވޭ ގޮތަށް ފުރުޞަތު ފަހިވުން. (މިގޮތުން 'އިންޓަރ ސްކޮލަރސްޓިކް' ކުޅިވަރު އެސޯސިއޭޝަންތަކާއި ކްލަބުތައް މި ޤާނޫނުގެ ދަށުން އުފައްދައި ހަރަކާތްތެރިވަމުންދާނެ.)

މީގެ އިތުރުންވެސް ކުޅިވަރުގެ ދާއިރާގެ ކަންކަން މިހާރަށްވުރެ ހަރުދަނާ ކުރުމަށް ގިނަ ކަންތައްތަކެއް ކުރުމުގެ ފުރުޞަތު، މި ޤާނޫނަށް ގެނައި އިސްލާހުގެ ތެރެއިން ފަހިވެގެންދާނެއެވެ.

ކުޅިވަރުގައި ޙަރަކާތްތެރިވާ އިސް ބޭފުޅަކު ބުނި ގޮތުގައި ޤާނޫނުގެ ދަށުން ފަންޑުގެ ފައިސާ އިންވެސްޓްކުރުމުގެ ވާހަކަ ދެކެވުނު ނަމަވެސް، މި އިންވެސްޓްމަންޓްތައް ބެލެހެއްޓުމާއި މިކަމުގައި އޮތް ނިޒާމުތަކާއި ބެހޭގޮތުން އިތުރު ތަފްސީލު ބޭނުންވެއެވެ.

ކޮންމެޔަކަސް، ކުޅިވަރު ޤާނޫނަކީ ދިވެހި ކުޅިވަރަށް އައު އުންމީދުތަކެއް ގެނެސްދޭ އެއްޗެއް ކަމުގައި ވިޔަސް، މި ޤާނޫނު ތަންފީޛުކުރުމުގައި ދިމާވެދާނެ ގޮންޖެހުންތަކަށް ސަމާލުވުމަކީ މުހިންމު ކަމެކެވެ. ޤާނޫނުގެ މަޤްޞަދުތައް ޙާޞިލުކުރުމަށްޓަކައި، ދެފުށް ފެންނަ ގޮތަކަށް ކަންކަން ހިންގުން އެއީ ކުލަބުޖަމްޢިއްޔާތަކުން ބޭނުންވާ ގޮތެވެ.