ޘަޤާފީ ކުޅިވަރުތައް ކުޅޭއިރު އޭގެ ދިވެހި އަސްލު ގޮތުގައި ކުޅުމަށް ދިވެހިބަހާއި ޘަޤާފަތާއި ތަރިކައާ ބެހޭ ވަޒީރު އާދަމް ނަޞީރު އިބްރާހީމް ބާރުއަޅުއްވައިފިއެވެ.
އެމްއެމްޓީވީގެ ބޮޑު ޚަބަރު ޕްރޮގްރާމެއްގައި، އިހުގެ ބައެއް ކުޅިވަރުތައް ދިވެހީން އޭރު ކުޅެއުޅުނު ގޮތުގެ ބައެއް މަޢުލޫމާތު ހިއްސާކުރައްވަމުން ވަޒީރު ވިދާޅުވީ ދިވެހި ބައެއް ކުޅިވަރުތަކަކީ ހަމައެކަނި ފިރިހެނުން ކުޅެ އެޅުނު ކުޅިވަރު ކަމަށެވެ. އޭގެ ތެރޭގައި ތާރަ، މަންގަލަން، ދިގުމަގުނެގުން، އަދި މަލިކު ދަނޑި ހިމެނޭ ކަމަށާއި އަނެއްބައި ކުޅިވަރުތަކަކީ އަންހެނުންގެ ކުޅިވަރުތައް ކަމަށް ވަޒީރު ފާހަގަކުރެއްވިއެވެ. އޭގެ ތެރޭގައި މިހާރު ބައެއް ރަށްރަށުން އުވިގޮސްފައިވާ ބަނޑިޔާޖެހުން ހިމެނޭކަން ވަޒީރު ފާހަގަކުރެއްވިއެވެ.
ވަޒީރު ވިދާޅުވީ ބޮޑު ބެރަކީ ފިރިހެނުންގެ ގުރޫޕު ކުޅިވަރެއް ކަމަށާއި އަންހެނުން ވެސް ވަކިން ގުރޫޕު އުފައްދައިގެން ވަރަށް މަދު ރަށެއްގައި ވަކިން މި ކުޅިވަރު ކުޅެ އުޅުނު ކަމަށެވެ.
ވަޒީރު ވިދާޅުވީ މި ސަރުކާރުން ބާރު އަޅަނީ އިސްލާމް ދީނުގެ އިންތަކުގެ ތެރެއިން ޢީދު ފާހަގަކުރެއްވުމަށް ކަމަށެވެ. އެގޮތުން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ޢީދު ފާހަގަކުރެއްވުމަށް ވަރަށް ޚާއްޞަ އިސްކަމެއް ދެއްވައިފައި މި ވަނީ ޢީދަކީ އިސްލާމީ މަތިވެރި އިޙްތިފާލަކަށް ވާތީކަމަށް ވަޒީރު ވިދާޅުވިއެވެ. އެހެންކަމުން އިސްލާމީ އިންތަކާއި މިންތަކުގެ ތެރޭގައި ޢީދުގެ އުފާ ފާޅުކޮށް އެއްބައިވަންތަކަމާއި އުފާވެރިކަމުގެ ރޫޙު ވީހާ ވެސް ބޮޑަކަށް އާލާކުރުމަކީ ސަރުކާރުން ވަރަށް ތަރުޙީބުދޭ ކަމެއް ކަމަށް ވަޒީރު ވިދާޅުވިއެވެ.
ޢީދުގައި ކުލަ ޖެހުމަކީވެސް މިހާރު ކުރާ އާންމު ކަމަކަށް ވާއިރު، ވަޒީރު ވިދާޅުވީ އެއީ ވެސް އިހު ދިވެހީންގެ ޘަޤާފަތުގައި ހިމެނޭ ކަމެއް ނޫން ކަމަށެވެ. އެ ޒަމާނުގައި ބޮޑު ޢީދަކީ ފެންކުޅި ކުޅޭ ޢީދެއް ކަމަށާއި، ކުލަ ކުޅުމަކީ ކޮށް އުޅުނު ކަމެއް ނޫން ކަމަށް ވިދާޅުވެ ވަޒީރު ވަނީ އެހާރާއި މިހާރުގެ ބައެއް ތަފާތުތަކުގެ މައްޗަށް ތާރީޚީ ގޮތުން ވެސް އަލިއަޅުއްވައިލައްވާފައެވެ.
ސަރުކާރުން ޤައުމީ ފެންވަރެއްގައި މި އަހަރުގެ ބޮޑު ޢީދު ތިން ރަށެއްގައި ފާހަގަ ކުރާނެއެވެ. އެއީ ލ. ގަމާއި ހއ. ކެލާގެ އިތުރުން ކ. ގުރައިދޫގައެވެ.
