ދިވެހި ހައްޖުވެރިންގެ ހައްޖުގެ ރޫޓު ބަދަލުކޮށް، ސައުދި އަރަބިއްޔާގައި ތިބޭ މުއްދަތު ކުޑަކުރީ ސައުދީ ސަރުކާރުގެ އިރުޝާދާއެކު ހައްޖުވެރިންގެ ރައްކަލަކަށްޓަކާ ކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު މިރޭ ވިދާޅުވެއްޖެ އެވެ.
އިސްލާމިކް މިނިސްޓްރީގެ މީޑިއާ ވަޓްސްއެޕް ގްރޫޕަށް ފޮނުއްވި މެސެޖެއްގައި ޝަހީމް ވިދާޅުވީ ހައްޖުގައި ތިބޭ މުއްދަތު ސަރުކާރުން 15 ދުވަހަށް ކުރުކޮށްލި ކަމަށް ބުނެ ދައްކަމުންދާ ވާހަކަތަކަކީ ހަގީގަތާ ޚިލާފު ވާހަކަތަކެއް ކަމަށެވެ.
ސައުދީގައި 15 ދުވަހު ތިބޭ އެއްވެސް ބަޔަކު ނުތިބޭނެ ކަމަށް ހައްޖު ކޯޕަރޭޝަނުން މައުލޫމާތު ދީފައިވާ ކަމަށް ވެސް ޝަހީމް ވިދާޅުވި އެވެ.
ޝަހީމް ވިދާޅުވީ އެއް ފްލައިޓަކުން ދިޔަ މީހުން 18 ދުވަސް، އަނެއް ތިން ފްލައިޓުން ދިޔަ މީހުން 19 ދުވަހު ސައުދީގައި ތިބޭ ކަމަށެވެ.
ހައްޖަށްދާ މީހުން މީގެ އަހަރުތަކެއް ކުރިން 30 ދުވަހު ތިބޭ ނަމަވެސް، މި ފަހުގެ އަހަރުތަކުގައި އާންމުކޮށް 22 އާއި 25 ދުވަހު ދެމެދު ތިބިފައިވާ ކަމަށް ޝަހީމް ވިދާޅުވި އެވެ.
ޝަހީމް ވިދާޅުވީ އެއީ ހައްޖު ނިންމައިފައި މަދީނާއަށް ގޮސް މައްކާއަށް އެނބުރިދާތީވެ ކަމަށެވެ. ނަމަވެސް މިފަހަރު ހައްޖު ނިންމައިފައި މަދީނާއަށް ގޮސް މައްކާއަށް އެނބުރި ނުގޮސް ރާއްޖެއަށް ފުރާ ގޮތަށް ހަމަޖައްސާފައިވާ ކަމަށް އޭނާ ވިދާޅުވި އެވެ.
އެގޮތަށް ހަމަޖައްސާފައި ވަނީ ހައްޖުވެރިންގެ ރައްކާތެރިކަމާއި މަސްލަހަތާއި މޫސުމަށް ބަލައި ސިއްހަތަށް ބެލުމުގެ ގޮތުން ސައޫދީ އަރަބިއްޔާއިން ދެމުން އަންނަ އިރުޝާދުތަކަށް ރިއާޔަތްކުރުމުގެ ގޮތުން ކަމަށް ޝަހީމް ވިދާޅުވި އެވެ.
"ވީމާ ގައުމީ މިފަދަ ކަންކަމުގައި ހަގީގަތް އޮޅޭ ގޮތަށް ވާހަކަ ނުދެއްކެވުން އިލްތިމާސްކުރަން. ރައްޔިތުންގެ ކަންބޮޑުވުން އޮތް ކަމެއް ނަމަ އެކަމާ މެދު މަޝްވަރާކޮށްގެން ހައްލެއް ހޯދާނެ ކަމުގެ ޔަގީންކަން ދެން،" ޝަހީމް އެވެ.
މި އަހަރު ރާއްޖެއިން ހައްޖަށް ދާ 1،000 ހައްޖުވެރިން މިހާރު ތިބީ މައްކާގަ އެވެ.
