މިއަހަރަކީ ރާއްޖޭގެ ތާރީހުގައި ވެސް އެންމެ ގިނައިން ޒަކާތް ދެއްކި އަހަރު ކަމަށާއި، ވޭތުވެދިޔަ ދެ އަހަރަކީ ރާއްޖޭގެ ޒަކާތުގެ ނިޒާމަށް ވަރަށް ހެޔޮ ބަދަލުތަކެއް އައި ދެ އަހަރު ކަމަށް އިސްލާމީ ކަންތައްތަކާއި ބެހޭ ވަޒީރު ޑރ. މުޙައްމަދު ޝަހީމް އަލީ ސައީދު ވިދާޅުވެއްޖެ އެވެ.
ވަޒީރު ޑރ. ޝަހީމް އެކްސްގައި ހިއްސާކުރެއްވި ޕޯސްޓެއްގައި ވިދާޅުވީ، މި އަހަރުގެ މިހާތަނަށް މުދަލު ޒަކާތުގެ ގޮތުގައި ބަލައިގަތް އަދަދު ވަނީ 109 މިލިއަން ރުފިޔާއަށް އަރާފައި ކަަމަށާއި އަދި މިދިޔަ އަހަރުގެ މި މުއްދަތުގައި ޒަކާތުގެ ގޮތުގައި 106 މިލިއަން ރުފިޔާ ލިބިފައިވާކަމަށް ވަޒީރު ހާމަކުރި އެވެ.
ރާއްޖޭގެ ޒަކާތުގެ ނިޒާމާ ގުޅޭގޮތުން ވާހަކަދައްކަވަމުން ވަޒީރު ވިދާޅުވީ، މިއީ ހަރުދަނާ އުސޫލުތަކެއްގެ މައްޗަށް އާރާސްތުކުރެވި، ގާނޫނަކުން ރައްކާތެރިކަން ލިބިފައިވާ ނިޒާމެއް ކަމަށެވެ. އެގޮތުން ޒަކާތު ފައިސާ ބަލަހައްޓަމުންދަނީ މަރުކަޒީ ބޭންކު (އެމްއެމްއޭ) އިން ކަމަށާއި، ޒަކާތުން ލިބޭ ފައިސާ ހޭދަކުރަމުން ދަނީ އިސްލާމީ ޝަރީއަތުގައިވާ ގޮތުގެ މަތިން އެކުލަވާލާފައިވާ ޝަރީއާ ގައިޑްލައިނާ އެއްގޮތަށް ކަމަށް ވަޒީރު ފާހަގަކުރެއްވި އެވެ. އަދި މި ފައިސާ ހަރަދު ކުރެވެމުންދާ ގޮތުގެ މައުލޫމާތު މަހުން މަހަށް އާއްމުކޮށް ހާމަކުރަމުންދާ ކަމަށްވެސް ވިދާޅުވި އެވެ.
Advertisement
ވަޒީރު އިތުރަށް ވިދާޅުވީ، ވޭތުވެދިޔަ ދެ އަހަރަކީ ރާއްޖޭގެ ތާރީހުގައިވެސް އެންމެ ގިނައިން ޒަކާތް ލިބުނު ދެ އަހަރުގެ އިތުރުން، ފަގީރުންގެ ދަފުތަރުގައި ޖެހިފައިވާ ފަރާތްތަކަށް އެންމެ ގިނައިން އެހީތެރިކަން ފޯރުކޮށްދެވުނު ދެ އަހަރު ކަމަށެވެ. އެގޮތުން ފަގީރުންނަށް ސީދާ މާލީ އެހީތެރިކަން ދިނުމުގެ އިތުރުން، އެ ފަރާތްތަކުގެ ތައުލީމާއި ސިއްހަތަށް ގިނަ ހަރަދުތަކެއް ކުރެވުނުކަން ވަޒީރު ފާހަގަކުރެއްވި އެވެ. މީގެ އިތުރުން ޝަރީއާ ހުއްދަކުރާ އުސޫލުތަކުގެ ތެރެއިން ޒަކާތު ފަންޑު އިތުރުކުރުމަށް ގިނަ މަސައްކަތްތަކެއް މި މުއްދަތުގައި ފެށިފައިވާ ކަމަށްވެސް ވަޒީރު ފާހަގަކުރެއްވި އެވެ.
ރާއްޖޭގެ ޒަކާތުގެ ނިޒާމަށް ދިވެހި ރައްޔިތުން ދެއްވަމުން ގެންދަވާ އިތުބާރަށް ޝުކުރު އަދާކުރައްވަމުން ވަޒީރު ވަނީ، ގާނޫނީ އޮނިގަނޑެއްގެ ތެރެއިން ޒަކާތުގެ ނިޒާމު ތަރައްގީކޮށްދެއްވުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ކުރައްވަމުން ގެންދަވާ މަސައްކަތްޕުޅަށް ހާއްސަ ޝުކުރެއް އަދާކުރައްވާފަ އެވެ.
ޒަކާތް ބަލައިގަތުމުގެ އެންމެހާ އިންތިޒާމުތައް ހަމަޖައްސަމުންދަނީ ދައުލަތުގެ ޓެކްސް އިދާރާ (މީރާ) އިންނެވެ. މީރާގެ ތަފާސްހިސާބުތަކަށް ބަލާއިރު:
- 2021 ވަނަ އަހަރު: 91,519,250 ރުފިޔާ
- 2022 ވަނަ އަހަރު: 92,696,776 ރުފިޔާ
- 2023 ވަނަ އަހަރު: 90,207,015 ރުފިޔާ
- 2024 ވަނަ އަހަރު: 102,281,507 ރުފިޔާ
- މިދިޔަ އަހަރުގެ ޖުމްލަ: 107,205,043 ރުފިޔާ
އެގޮތުން،ރާއްޖޭގައި ޒަކާތުގެ ކަންކަން ހަރުދަނާ ކުރުމުގެ ގޮތުން މިހާރު ވަނީ ޒަކާތުގެ ފުރަތަމަ ގާނޫނު އެކުލަވާލައި އަމަލުކުރަން ފަށާފަ އެވެ. މި ގާނޫނުގެ މައިގަނޑު މަގުސަދަކީ އިސްލާމްދީނުގައި ޒަކާތް ޝަރުޢު ކުރައްވާފައިވާ މަތިވެރި މަގުސަދުތައް ހާސިލުކުރުމާއި، ޒަކާތް ދެއްކުން ލާޒިމުވާ ފަރާތްތަކާއި މުދަލުގެ ބާވަތްތައް ސާފުކޮށް ކަނޑައެޅުމެވެ. އަދި ދިރިއުޅުމުގެ ހަމަހަމަކަމާއި އިޖުތިމާއީ ފުދުންތެރިކަން އިތުރުކުރުމަށްޓަކައި، ޒަކާތުގެ ގޮތުގައި ލިބޭ ފައިސާއާއި މުދާ އެންމެ ފުރިހަމަ ގޮތުގައި ބޭނުންކުރުމުގެ އުސޫލުތައް އެކަށައެޅުމަކީވެސް މި ގާނޫނުގެ މުހިންމު ބޭނުމެކެވެ.
