އިސްލާމީ ދައުވަތުގެ މަސައްކަތް ކާމިޔާބުކަމާއެކު ކުރެވޭނީ އެއްބަޔަކު އަނެއްބަޔަކާ ގުޅިގެން، އެއްބައިވަންތަކަމާއެކު މަސައްކަތް ކޮށްގެން ކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވެއްޖެއެވެ.

ޖަމްއިއްޔާތަކުގެ އަހަރީ ބައްދަލުވުން ފެށުމުގެ ރަސްމިއްޔާތު ޝަރަފްވެރިކޮށްދެއްވައި ވާހަކަފުޅުދައްކަވަމުން މިނިސްޓަރު ވިދާޅުވީ، ދައުވަތަށް ބޮޑެތި ގޮންޖެހުންތަކެއް ކުރިމަތިވެފައިވާ މިފަދަ ޒަމާނެއްގައި، އަޅުގަނޑުމެން އެއްބަޔަކު އަނެއް ބަޔަކަށް ވާންޖެހޭނީ އެއްބަޔަކު އަނެއްބަޔަކު ފުރިހަމަކޮށްދޭ ބަޔަކަށް ކަމަށެވެ. އަދި ފާއިތުވެދިޔަ ދެތިން އަހަރު ދުވަހުގެ ތެރޭގައި އިސްލާމިކް މިނިސްޓްރީން ޖަމްއިއްޔާ ޖަމާއަތްތަކާ ގާތުން މަސައްކަތްކޮށް، އެހީތެރިކަން ފޯރުކޮށްދީފައިވާނެކަން އެމަނިކުފާނު ފާހަގަކުރެއްވިއެވެ.

އެގޮތުން، ދީނީ ދައުވަތުގައި މަސައްކަތްކުރާ ޖަމްއިއްޔާތަކަށް ބޭނުންވާ ވަސީލަތްތައް ހޯދައިދިނުމަށް ފާއިތުވެދިޔަ ދެ އަހަރު ތެރޭގައި 1.2 މިލިއަން ރުފިޔާ ހަރަދުކޮށްފައިވާނެ ކަމަށާއި، އޭގެ ތެރޭގައި އިސްލާމީ ސްޓޫޑިއޯތަކާއި ގުރުއާން ކުލާސްތަކަށް ބޭނުންވާ ސާމާނު ހޯދުން ހިމެނޭ ކަމަށް މިނިސްޓަރު ވިދާޅުވިއެވެ. މީގެއިތުރުން، ރަނގަޅަށް ހިންގާ ޖަމްއިއްޔާތަކަށް މާލީ ގޮތުން ދެމެހެއްޓެނިވި ވަސީލަތްތައް ގާއިމުކޮށްދިނުމަށް ވެސް މިނިސްޓްރީން މަސައްކަތް ކުރަމުންދާ ކަމަށް އެމަނިކުފާނު ވިދާޅުވިއެވެ.

ޖަމްއިއްޔާތަކުގެ މި އަހަރުގެ އަހަރީ ބައްދަލުވުމުގައި 53 ޖަމްއިއްޔާއަކުން ވަނީ ބައިވެރިވެފައެވެ.